فرض ائدین یاخین دوستوز کی سیزه سؤز وئریب دقیقاً
فیلان ساعتده سیزینن گؤروشه, دلیلسیز و خبرسیز, قرار یئرینه گلمه‌یه و یا چوخ یوبانا و بو ایشی همیشه گؤره, سیزن عکس‌العملیز
نه اولار؟
ایندیه‌جن بونا فیکیرلشمیسیز کی حیات یولداشیز
همیشه سیزه زور دئیه‌نده و یا اؤزگه‌لرین یانیندا سیزی دلیلسیز یئره تحقیر ائدنده,
سیز اعتیراض یئرینه بیر آز دا اونو تعریفله‌ییرسیز. بو عملیزین عیلّتینه دوشونموسوز؟
شاید دینمه‌مزلیغیزی اؤز مناعت طبع و جئنتئلمن اولماغیزا حمل ائلیسیز. و یا شاید
بو ساکیتلیغیزدان خوشوز گلمیر آما بیلمیرسیز نه ائده‌سیز؟
«اؤزونو ایبراز ائله‌ماق» ایرتیباط قورماغین
یاخجی یوللارینداندیر. اؤزونو ایبراز ائله‌ماق سیرتیق اولماق معناسیندا دئییل.
اؤزگه‌نین حقّین آیاقلاماق‌دا دئییل. زور دئماق و ساواشماق‌دا دئییل. اؤزونو ایبراز
ائله‌ماق یعنی بو کی اؤز گوجلر و باشاریقلارینی گؤرسه‌ده‌سن. سیز مؤحکم و قاطع
برخورد ائدنده, حقیقتده اؤزوزو ایبراز ائدیبسیز.
بو مورید ده غلط فیکیرلره باخمایاراق, اؤزونو
ایبراز ائله‌ماق, ایسته‌دیقلارینی هر نه‌یین باهاسینا اله گتیرماق معناسیندا دئییل.
فیکیرلری آیدین, موستقیم و صلاحیّتلی صورتده دئماق, اؤز فیکیر و حیسّلرینه ارزیش
قاییل اولماق, اؤزونه عیزّت و حؤرمت قاییل اولماق و اؤز گوج و ضعف نوقطه‌لری تانیماغا,
اؤزونو ایبراز ائله‌ماق دئییلیر.
خانیواده نوعی و فرهنگی افرادین اؤزلرینی ایبراز ائله‌ماقلارینا
چوخ تأثیری وار. خانیواده بیرینجی و لاپ اساسی منبعدیر کی اوشاق اوردا رفتارلارین
چوخونو آتا آناسیندان اؤرگه‌شیر, اؤزونو ایبراز ائله‌ماق, خانیواده‌دن و ائودن
باشلایا بیلر. معمولاً عضولری‌نین رابیطه‌لری سالیم و موستقیم اولان خانیواده‌لر
-کی مثلاً اوشاق راحات سوروشا بیلر کی «آتا بویون نه اولوب؟ چوخ حیرصلی‌سین»,-
ائله خانیواده‌لر‌دیلر کی اونلاردا اوشاقلار اؤزلرینی ایبراز ائله‌ماغا فورصتلری
اولار. عکسینه او خانیواده‌لرده کی اوشاقلار آتا آنادان قورخورلار, داها اؤزونو
ایبراز ائله‌ماغا مئیدان یوخدور.
خانیواده‌دن سونرا, جامیعه‌لرین, اؤزونو ایبراز ائله‌ماغا
موختلیف تأثیری اولار. ایمکانی وار بیر جامیعه‌ده فیکیرلشمه‌میش سؤزه قولاق آسماق
و ال آیاغی باغلی اولماق ارزیش ساییلا. بئله بیر موقعیتده حیسلری بیان ائله‌ماق و
اؤزونو ایبراز ائله‌ماغین معناسی اولماز. عکسینه بیر جامیعه‌ده کی اؤز حقّینی
تانیماق و اوندان دیفاع ائتمک و اونا ال تاپماغا چالیشماق ارزیش ساییلا, بئله بیر
جامیعه‌ده اؤز حقّیندن دیفاع ائدن اینسان و حیسّلرین صادیقانه ایبراز ائدن شخص,
اؤزگه‌لرین‌ده حقّینی آیاقلاماز.
اؤزوزو ایبراز ائله‌ماق باعیث اولار کی اؤزوزله راحت
اولاسیز و آیریلارینا دا ایمکان وئره‌سیز کی سیزینن راحاتراق رفتار ائده‌لر. لاپ
غنی و سالیم صمیمی رابطه, ایکی جورأتلی شخصین آراسیندا اولار.
اؤزوزو ایبراز ائله‌ماق اوچون گرک بیر اینسان کیمی
بعضی حقلریزی تانیاسیز:
-
سیزین حقّیز وار سیزینله
احتیراملی رفتار اولا. سیز ده گرک آیریلارینا احتیرام قویاسیز.
-
سیزین حقّیز وار یاشاییشیزدا
موستقیل تصمیم توتاسیز, آما کاریخمایین؛ سیزین مشورته احتیاجیز وار آما نهایتده بو
سیزسیز کی تصمیم توتمالیسیز.
-
سیزین حقّیز وار آیریلاریندان
اینتیظاریز اولسون, آما اینتیظارلاریز گرک منطیقلی و اونلارین الیندن گلن میقداردا
اولا.
-
سیزین حقّیز وار آیریلارین
منطیقسیز ایستکلرینی ردّ ائلیه‌سیز. قرار اولسا کی هر غیر معقول ایستگی یئرینه
یئتیره‌سیز, داش داش اوستونده دایانماز.
-
سیزین حقّیز وار آیریلار
طرفیندن گلن ایستکلری گؤتور قوی ائلیه‌سیز. پس اونلارین حقّی یوخدور کی سیزی
تلسدیرسین.
-
سیزین حقّیز وار حیسّلریزی
بیان ائلیه‌سیز. سیزین حیسّلریز منفی اولا یا موثبت, گرک ایبراز اولا.
-
سیزین حقّیز وار ایشتیباه
ائلیه‌سیز, البته ایشتیباه ائله‌مه‌سیز لاپ یاخجی اولار. عین حالدا موغایات
اولمالیسیز کی ایشتیباهلاریز اؤزگه‌یه صدمه وورماسین.
«یوخ»
دئماق, اؤزونو ایبراز ائله‌ماغین موهوم ابزاری
هامیمیز
اوچون ائله واختلار اولوب کی «یوخ» دئماق بیزه چتین اولوب. «یوخ» دئماغا گوجوموز
چاتماسا و اؤزگه‌لرین منطیقسیز ایستکلرینی ردّ ائلیه بیلمه‌ساق, موختلیف
موقعیتلرده بیزی چتین شراییطه سالار.
«یوخ» دئماغا گوج چاتماماغین موختلیف عیلتلری وار.
شاید «یوخ» دئیه‌نده سیزه گوناه احساسی ال وئریر, شاید قورخورسوز دوستلاریزی الدن
وئره‌سیز و شاید ده «یوخ» دئماغی بیر جور تکبّور حئسابلیرسیز. بوننان بئله بیلمه‌لیسیز
کی «یوخ» دئماق و آیریلارین منطیقسیز ایستکلرین ردّ ائله‌ماق سیزین حقّیزدیر,
مخصوصاً او زامان کی بو ایستکلر سیزین اوچون منفی اثرلری اولا. پس موناسیب صورتده
«یوخ» دئماق اوچون بو یوللارا عمل ائدین:
1. جوابیزی ائشیده بیلینن بیر «یوخ»لا باشلایین.
2.
اؤزوزو «یوخ» دئماق اوچون
توجیه ائله‌مه‌یین.
3.
اؤزوزه دئیین کی «یوخ» دئماغا
حقّیز وار.
4.
«یوخ» دئیه‌ندن سونرا مونتظیر
اولمایین کی سیزین فیکریزی دگیشسینلر.
5.
یادیزدا اولسون کی سیز او
شخصین ایستگینه یوخ دئمیسیز, نه اینکی اونون اؤزونه.
6.
«یوخ» دئماق مسئولیتینی
بوینوزا آلین و اونلاری سیزدن منطیقسیز ایستکلرینه گؤره موقصیر بیلین.
7.
«هن» یا دا «یوخ» دئماغا
آرتیق ایطیلاعاتا احتیاجیز اولسا, طرفدن ایسته‌یین کی سیزه آرتیق ایطیلاعات وئرسین.