مرحوم مراغالي ماللا حسين دخيل ، اون‌اوچونجو قرنده
استعداد، ايبتيكار و پيغمبرين(ص) اهل‌بيتينه اولان عشق و علاقه‌سيني شعر قاليبينده
بيان ائدن شاعير.
بو شاعير بوتون استعداد و ايبتيكارلاريني عاشيقانه صورتده
اهل بیت عصمت و طهارت (ع) خانيدانينه تقديم ائله‌دي و اونون دؤورانيندان نئچه يوز
ايل كئچسه‌ده هله تانينماميش قاليب و ادبي تاريخي كيتابلاردا اوندان بير آد
چكيلمير.
مراغالي دخيلين ياشاييشي و احوالي ايبهام پرده‌سينده قاليب
و بو امر اونون بوتون مسأله‌لرينه تأثير قويور. بير حالدا كي اونون زولال شعري
زمان چاييندا آخيردي و سؤزلري حضرت ابا عبدالله الحسین(ع) مجليسلري و عزالارين
بزگي‌ايدي.
مراغالي ماللا حسين دخيل آذربايجانين مرثيه و اهل بیت (ع)
مداحليق شاعيري كي تأثيري آذربايجانين رثايي شعرينده اونودلامازدير و اونون
اوسلوبي آيريلاريندان چوخ فرقلي اولوب و بو اوسلوبون تكميل‌لشمه‌سينده موهوم آدديم
ساييلير.
دخيلين شعرلري رثايي شعر قاليبيندا، عاطيفي و مذهبي
احساسلارينان دولو و ايفراط و تفريطدن اوزاق منطيقلي بير تعادول‌اينن، گؤزل و
ثابيت شعرلردير كي مربوط اولان ريوايتلري بيان ائله‌ييب.
او اؤز شعرلرينده حماسه مرزلرينه ياخينلاشيب كربلا
قهرمانلاري و حاديثه‌لرين توصيف ائدنده‌ده تعادولي ساخلير.
مراغالي دخيلين تانينماميش قالماسي‌نين سببي شايد
تاي-توشلاري‌نين ايچينده اونون دوشونجه و افكاري‌نين محجور قالماسيدير كي اونون
ويلادت، وفات و حتّي دفن يئرين تانينماميش ساخلاييب.
او اؤز شعرلرينده حماسه مرزلرينه ياخينلاشيب كربلا
قهرمانلاري و حاديثه‌لرين توصيف ائدنده‌ده تعادولي ساخلير. بو شاعيرين بوتون
شعرلرينده مذهبي احساسلار، عاطيفي فضا و عاشورايي هيجانلار ايفراط و تفريطدن اوزاق
ساخلانيب.
بو شاعيرين بيانيندا جنگ ميدانلاريندا قهرمانلار طرفيندن
اوخونان رجزلرده ده بو تعادول حيفظ اولوب.
بو شاعيرين ديواني آيه‌لر و معصوملاردان(ع) اولان
ريوايتلرله دولودور كي بو شاعيرين قورآن علملرينه واقيف اولماسيندان خبر وئرير.
او اؤز تحصيلاتيني روحانيت ليباسيندا و قديم مكتبلرده
كئچيرديب و او زمانين عادتلري‌اينن علم اؤرگه‌شيب.
اونون شعرلرينده ايهام، تشبيه، ايستعاره و مجاز كيمي
ايستيفاده اولان لفظي صنعتلر و معنوي بزكلر نه اينكي چتينليق ياراتمير بلكه اونون
سوزونون فصاحت و بلاغتينه آرتيرير.
دخيل شعري‌نين بير آيري خصوصيتي بو ايدي كي او بير جور
مثنوي غزلدن ايستيفاده ائديردي كي آزيندان او زماناجن آذربايجانين رثايي شعرينده
راييج دئييلدي.
دخيل رثايي شعري‌نين قولّه‌لرينده اوتوران شاعيرلردندير آما
اونون ياشاييشي موريدينده الده مكتوب اثر يوخدور.
دخيل هيجري قمري اون‌اوچونجو قرنين يوخاري شاعيرلريندنيدي
كي «'كلیم كاشانی» و «عمان سامانی» كيمي شاعيرلرينن بير مرتبه‌ده ساييلير. بو
شاعيرين تانينماميش قالماسي‌نين اصلي عاميلي كئچميش طاغوتلارين دؤورونده توركي
ديلين قاداغان اولماسيدي.
مراغانين ادبي موحيطي قديمدن اوحدی، سهند، آیت الله میرحبیب
حائری، مرحوم دخیل، اشراق، اشرف و عبدالقادر كيمي اهل بيت(ع) شاعيرلر منشأي اولوب.
بو شاعيرين ديواني‌نين بيرينجي و ايكينجي جيلدي داش چاپينان
ياييليب.
موختليف ريوايتلره گؤره مراغالي آخوند ماللا حسين بو
شهريستانين تابعي اولان ساري‌خورما كنديندن اولوب.
مراغانين 250 مين نفر جمعيتي وار و تبريزين 147
كيلومترليگينده يئله‌شيب.