دئييرلر ژاپوندا بير وار-دولتلي كيشي ياشيردي كي گؤز
آغريسيندان ياتا بيلميردي و گؤزونون درماني اوچون جوربه‌جور حب و آمپول ايستيفاده
ائديب آما فايدا گؤرمه‌ييب. او چوخلو دؤكتورلر و موتخصيص‌لرينن مشورتدن سونرا
درمانين تكجه يولون بير موقدّس و تانينميش راهيبه موراجيعه ائله‌مكده گؤروب.
راهيبين يانينا گئدير و راهيب دئيير كي بير مودّت ياشيل رنگيندن سونرا آيري رنگه
باخماسين. ائوه قاييداندان سونرا بوتون ايشله‌ينلرينه تاپيشيرير كي ياشيل رنگ
بوشقاسي آلسينلار و ائوين هر يئرين ياشيل رنگده رنگله‌سينلر.
بئله‌ليغينان ائوين بوتون ور-وساييلين ياشيل رنگده
رنگلتديرير. بير مودّت سونرا ماشيني‌نين رنگين، خانيواده عضولرين و موستخديملرين
پالتارلارين و گؤزه گؤروشن زادلارين رنگين ياشيل رنگينه چئويرير و البته گؤزونون
آغريسي تسكين تاپير. بير مودّت سونرا ميليونر كيشي راهيبدن تشكور ائتمك اوچون اونو
ائوينه چاغيرير. راهيب اونون ائوينه گيرنده كي نارينجي رنگده پالتار گئيميشدي،
متوجيه اولور كي گرك پالتارين رنگين دگيشه و ياشيل خيرقه گئيه. اودا بئله ائلير و
ناخوشونون محضرينه گئدير و سوروشور كي گؤز آغريسي تسكين تاپيب يا يوخ؟
وارلي كيشي تشكور ائديب دئيير: «بلي، آما بو اينديه‌جن لاب
باهالي درمانيدي.» راهيب تعجوبله ناخوشونا دئيير كي عكسينه، بو اينديه‌جن لاب
اوجوز درماندير كي تجويز ائله‌ميشم. گؤز آغريزين درماني اوچون كيفايت ائلردي كي
ياشيل شوشه‌لي بير عئينك آلاسيز و بو قدر خرجه احتياج يوخيدي. بونا خاطير
دونياني دگيشه بيلمزسن، بلكه اؤز باخيشيزي دگيشسز دونيا سنين كاميوا اولار.
دونياني دگيشمك آخماق ايشدير آما باخيشيميزي دگيشمك لاب اوجوزلو و اثرلي يولدور.