ايسلامي معاريف و فرهنگ پژوهشگاهي‌نين علمي هئيأت عضوي
دئدي: ايران ايسلام اينقيلابي پيروز اولاندان سونرا، ايمام خميني(ره) نيظامين
ساختاريندا آروادلار اوچون مخصوص يئر قاييل اولدو.
نيره قوي فارس خبري باشگاهي «توانا»-نين آروادلار
خبرنيگاري‌اينن دانيشيقدا دئدي: ايمام خميني (ره)-نين آروادلار باره‌ده دوشونجه و
فيكيرلري ايسلام اصل‌لريندن آلينيب؛ ايمام (ره) –ين اعتيقادي واريدي كي آروادلار
كيشيلري‌اينن بلكه اونلاردان قاباق اينقيلابين پيروزلوغوندا سهملري واريدي.
او آرتيردي: آروادلارين باره‌سينده ايمام خميني (ره) –نين
نظري آروادلار حقّينده ظولم بسترين آماده ائله‌ين ايفراط، تفريط و تجدّودلردن
اوزاق ايدي؛ ايمام(ره)-ين ايناميندا آروادلارين شخصي و خانيواده ياشاييشلارينا
هويّت وئرماقدا درين بير باخيشي وار ايدي. اونلار هميشه آروادلارين اصلي
اولويّتلرين اينسانسازليق -كي همان انبيانين نقشيدي- بيليرديلر.
ايسلامي معاريف و فرهنگ پژوهشگاهي‌نين علمي هئيأت عضوي بونو
دئماغينان كي ايسلامدا خانيملارين جاميعه‌ده حاضير اولماقلارينا هئچ مانع يوخدي،
دئدي: ايمام خميني (ره)-نين ده دوشونجه‌سي بئله‌ايدي، اونلارين ايناميندا گرك
آروادلار موختليف عرصه‌لرده حاضير اولسونلار؛ ايسلامين صدرينه باخاندا آروادلارين
خانيواده‌ده حاضير اولماقلاري و اوشاق تربيت ائله‌ماغينان اينسانسازليق نقشلري
اولويّتده ايدي. هابئله نومونه خانيملارين حضرت زهرا (س) كيمي هر زمان لازيم
اولوردو جاميعه‌ده گؤزه‌گليم نقشلري اولوردو.
بو دانيشگاه اوستادي ايدامه وئردي: آيت‌الله مطهري دئيير
«اينقيلابين پيروزلوق عرصه‌سينده آروادلارين تظاهوراتلاردا حاضير اولمالاري باره‌ده
توصيه‌لر اولوردو آما ايمام (ره) آروادلارين حوضورونو اينقيلاب و تظاهورات عرصه‌سينده
واجيب بيليرديلر» بو دوشونجه نيشان وئرير كي ايسلامدا آرواد و كيشيه بير منظردن
باخيليب.
قوي بونا ايشاره ائله‌ماغينان كي اينقيلاب پيروز اولاندان
سونرا ايمام (ره) نيظامين ساختارلاريندا آروادلار اوچون مخصوص يئر قاييل اولدولار،
دئدي: قانون اساسيني يازاندا اونلار تأكيد ائليرديلر كي آروادلار باره‌سينده بحث
ياددان چيخماسين و گؤروروك كي اونلارين دوشونجه‌لري قانون اساسيدا عملياتي اولوب.
او دئدي: ايسلامي اينقيلاب قانونوندا آروادلار كيشيلرينن
بيرليقدا حوقوق صاحيبيديلر و بعضي بندلرده آرواد و كيشي آراسيندا بير پارا فرقلر
وار كي اونون دا دليلي بودور كي ايسلام بعضي موريدلرده آروادلاردان تكليفي گؤتوروب
و بو فرقلر تبعيض معناسيندا دئييل بلكه عدالت ايجراسي اوچون زمينه حاضيرلاماقدير.
ايسلامي معاريف و فرهنگ پژوهشگاهي‌نين علمي هئيأت عضوي آروادلارين
سياسي موشاريكتي باره‌ده دئدي: ايمام (ره)-ين اعتيقادي واريدي آروادين گرك اؤز گله‌‌جگينده
دخالتي اولا و نئجه كي كيشيلر گرك سياسي ايشلرده دخالت ائده‌لر و جاميعه‌ني حيفظ
ائده‌لر، آروادلار دا گرك جاميعه‌ني حيفظ ائده‌لر.
قوي آيندينلاتدي: آروادلار جاميعه‌نين موهوم و بؤيوك بير
بخشي كيمي گرك آگاهليغينان و مسوولانه سياسي و ايجتيماعي عرصه‌لرده حاضير اولالار
و خطالارا نيسبت عكس‌العمل نيشان وئره‌لر. ايمام خميني (ره) قورآن آموزه‌لري و
ايسلامي معاريفيندن بهره آپارماق و آروادا اينساني بير باخيشينان، باعيث اولدولار
اونلارين بالقوه ايستعدادلاري بالفعل اولسون و بو طريق‌اينن آروادا اينساني باخيشي
ترويج وئرماغينان اونلارين جاميعه‌ده موشاركتي اوچون مانعلري آرادان آپارديلار.