شرقي آذربايجانين تاريخي اثرلرين ميلّي
آثار فهرستينده ثبت شوراسي‌نين رَييسي، تبريزين حاج‌غني مسجيدي‌نين اؤلكه ميلّي
اثرلر فهرستينده ثبت اولماسيندان خبر وئردي.
فارس خبرگوزاريسي‌نين تبريزدن شرقي
آذربايجانين ميراث فرهنگي سازماني‌نين عومومي رابيطه‌لريندن نقل اولان گوزاريشينه
گؤره، تراب محمدي آيدينلاتدي: حاج غني مسجدي‌نين قيدمتي قاجار دؤره‌سينه عاييددير.
او بو مسجيدين آد قويما سببينه ايشاره
ائله‌مگينن دئدي: مسجيد، بانيسي يعني حاج غني آدينا معروفدي؛ بو بينا موستطيل
صورتده 37.5 * 16 متر و ايكي طبقه‌ده دوزليب؛ دامي گونبد صورتينده و شبيستان
قيسمتي اوچ چشمه گونبدينن اؤرتولوب.
او بو مسجيدين خوصوصيتيندن اونون
نوماسيندا كرپيجين ايشلنمه‌سيني عونوان ائديب و دئدي: حاج غني مسجيدي‌نين
ماليكيّتي دولتي‌دير و اوقاف و خيريّه امرلر ايداره‌سي‌نين اختياريندادير. بو
مسجيدده گؤرولن تعميرلردن بونلاري آد آپارماق اولار: گيرش بخشي‌نين طراحليق و
ايجراسي، ايچري نوماسيندا كرپيجلرين بندكش‌ليگي، دامين ايزوگامي و كفين تعميري.
ميلّي اثرلرين ثبت شوراسي‌نين رَييسي
بينايا واريد اولان صدمه‌لره ايشاره ائديب دئدي: صدمه‌لرين چوخو اينساني اولوب كي
گيريش بخشينده نومادا سيمانين ايشلنمه‌سيدير.
محمدي تصريح ائله‌دي:اثرلرين اؤلكه‌نين
ميلّي آثار فهرستينده ثبت اولماسي، اونلارين ياخجي ساخلاماق، تانيتديرماق و مونظم
اولماسينا باعيث اولار، ائله بونا خاطير ده چاليشيريق تاريخي اثرلر بو فهرستده ثبت
اولسون.
اوستانين ميراث فرهنگي رَييسي
خاطيرلاتدي: حاج غني مسجيدي 29574 شوماره‌سينده اؤلكه‌نين ميلّي آثار فهرستينده
ثبت اولوب.
محمدي تأكيد ائله‌دي: ثبت اولان اثرلر
ميراث فرهنگي‌نين نظرات و موراقيبتي آلتيندادير و هويّتيني دگيشديرن هر جور ايقدام
قدغاندير و اونلارين تازادان دوزلتمه‌سي گرك بو سازمانين نظارتي و تأييدي‌اينن
اولا.