تبريز، آذرشهر و اوسكو جماعتي‌نين
ايسلامي شورا مجليسينده‌كي نوماينده‌سي دئدي: اروميه گؤلونون نجات طرحي مجليسين
اكينچيليك،سو و طبيعي منابع كومسيونوندا تصويب اولدو.
فارسين تبريزدن اولان گوزاريشينه گؤره،
رضا رحماني خبرنيگارلارينان دانيشيقدا دئدي: مجليسين علني صحنينده ايكي فوريّتليغي
رأي گتيرمه‌ين بو طرح، بويون اكينچيليك كومسيونوندا آراشديريليب و اونون كوليّاتي
اعضا‌نين تصويبينه چاتدي.
او آرتيردي: بو طرح اروميه گؤلونون
بوحراندان قورتولماسينا اهميّتليدير و اومودوم وار اونون جوزييّّاتي
كارشيناسليقدان سونرا تصويب اولا.
رحماني ايدامه وئردي: قاباق ايللرين
بويوندا بي‌توجّوهلوغا خاطير بؤيوك قيسمتي قورويان اروميه گؤلونو ضربتي ايش‌اينن
اؤلومدن قورتارماق اولار و اومودوموز وار بو طرح تصويب اولسا اروميه گؤلونون نجات
وئرمه‌سينه كؤمك اولا.
رحماني اروميه گؤلونون نجات وئرمه طرحي‌نين
ايكي فوريّتليگي‌نين رد اولماسينا ايشاره ائديب دئدي: البته نوماينده‌لر بو طرحين
اصلي‌اينن موخاليف دئييلديلر و تكجه اونون ايكي فوريّتليگيني ردّ ائله‌ديلر كي
خوشبختانه مربوطه كومسيوندا كارشيناسي ايش گؤرمگينن بو طرحين كولّياتي تصويب
اولدو.
اكولوژيك و اؤزونه مخصوص ارزيشلره صاحيب
اولان اروميه گؤلو 1346-نجي ايلينده اؤلكه‌نين موحيط زيست حفاظتي‌نين عالي شوراسي‌نين
بيرينجي موصوّيبه‌سينده حيفاظت اولونموش منطقه و عالي شورانين 63-نجو موصوّيبه‌سينده
ميلّي پاركا ايرتيقاء تاپدي.
هابئله 1356-نجي ايلينده MAB
(اينسان و ياشاملي كوره) طرفيندن دونيا سطحينده كوره‌نين ياشاييش ذخيره‌گاهلاري‌نين
بيري عونوانيندا ثبت اولدو.
بو گؤل بوتون جزيره‌لري‌اينن بيرليكده
1354-نجو ايلينده رامسر كونوانسيونوندا بين‌الميللي تالابلارين بيري عونوانيندا
ثبت اولوب تالابلارين بين‌الميللي مؤسّيسه‌سي طرفيندن قوشلارين لاب موهوم منطقه‌لري‌نين
بيري اينتيخاب اولدو.
ايندي بو گؤلده 27 جوره پستاندار،212
جوره قوش، 41 جوره خزنده، يئددي جوره دو زيست و 26 جوره باليق ياشايير.
اروميه گؤلونده 102 جزيره وار كي
اونلارين هاميسي يونسكو طرفيندن دونيانين طبيعي ذخيره‌گاهي عونوانيندا ثبت اولوب.
اروميه گؤلو آزاد سولارين سطحي
باخيميندان دونيانين ايگيرمينجي گؤلو و شورلوق و گئنيشليك باخيميندان بحر‌الميت‌دن
سونرا قرار تاپيب. گؤلون بويو 130 دان 146 كيلومتره‌جندير و اَني 15 دن 58
كيلومتره‌جندير(زنبيل داغيندان ايسلامي جزيره‌يه‌جن).