شرقی آذربایجان اسلامی تبلیغات مدیر کلّی دئدی: اعتکاف فشرده خودشازلیق کلاسی اولماقدان علاوه انسانا روحانی ورزش ساییلیر.
حجت الاسلام سید شهاب الدین حسینی نما جمعه خطبه‌لریندن قاباقکی دانیشیغیندا اعتکاف مراسمی باره‌ده دئدی: بو ایل خوشبختلیغینان کئچن ایله گؤره یوزده 25 آرتیمینان اعتکاف مراسمی‌نین آد یازدیرانلاری 20 مین نفره چاتیب کی شرقی آذربایجانین 124 مسجدینده معتکف اولاجاقلار. اونلارین قیرخی تبریز شهرینده‌دیلر.
او اعتکاف سنّتی‌نین ثمره‌لری باره‌ده دئدی: اعتکاف مستقل بیر عبادتدیر. ائله بیر عبادت کی شخص بیر دفعه اونو امتحان ائله‌سه اوندا تازادان حضور شوقی یارانار. اعتکاف انسانین الله اینن راز و نیاز ائله‌ماغا فرصتدیر.
دکتر حسینی آرتیردی: اسلام پیغمبری‌نین (ص) اوروجلوغون آخر اون گونونو اعتکافا مختص ائله‌ماغی و یا حضرت نوح و یعقوب و ابراهیم و اسماعیل کیمی آیری پیغمبرلرین معتکف اولماقلاری اونون اهمیتینی نشان وئریر.
حجت الاسلام حسینی دئدی: اعتکاف انسانین گونده‌لیق یاشاییشیندان آیریلیب نئچه ساعتلیق کئچمیش تقصیراتینا دوشونوب آیدین گله‌جاق مسیرینی ترسیم ائله‌ماغا بؤیوک فرصتدیر. اوندان علاوه اعتکاف فشرده خودسازلیق کلاسیدیر و انسانا روحانی ورزش ساییلیر. غرب دونیاسی رنسانس، صنعتی، فرا صنعتی، مدرنیته و پست مدرنیته‌نی تجربه ائله‌دیقدان سونرا معنویتدن اوزاق قالیب و معنویت اونون ایتمیشی ساییلیر. حقیقتده اعتکاف انسانین ایتمیشینه چاتماقدا بارز نمونه‌دیر.