اوشاقلارین قوناقلیق زمانی ادبسیزلیق ائله‌ماقلاری‌نین عمده سببی اونلارا دقّت ائله‌ماماقدیر. اونلار آیری زمانلار آتا-آنانین دقّت مرکزی و محبتی آلتیندا اولورلار آما قوناق گلن زمان دقّتلر اونلارین اوستونده گؤتورولوب قوناغا چؤنور و بو زمان اوشاق همان دقّتی جلب ائله‌ماق اوچون بیر سئری هنجارسیز ایشلری گؤرماغا ال وورور.
بیر اوشاق جمع ایچینده یاراشمایان سؤزلر دیله گتیرنده و یا نا هنجار ایشلر گؤرنده والدین محبت اینن اونا یاخینلاشیب اونو تحقیر ائله‌مه‌دن آرامشله اونون بو ایشی‌نین اشتباه اولدوغونو تذکر وئرمه‌لیدیلر. بئله‌نچی زمانلاردا سویوق قانلی اولماق چوخ مهم مسأله‌دیر. اوشاغین قاباغیندا دایانماق عوضینه اونون دقّتینی اونا علاقه‌لی اولان مسأله‌لره چکماق لازمدیر. مثلاً اونا بیر کتاب وئرماق، دیواردان آسیلان قوش دیلی ایله اونونلار دانیشماق و . .. کیمی ایشلر.
خطرلی وسیله‌لر اوشاغین الی چاتمایان یئره قویولمالیدیر کی سونرا اون اونون الیندن آلماق مجبوریتینده اولمایاسیز. اونا نه قدر «یوخ» ، «دَیمه» ، «ائله ائله‌مه» کیمی سؤزلر آز ایشلتسز بیر او قدر یاخشی اولار. بیر شئیدن دقّتینی داغیتماق ایسته‌سز، دقّتینی اوندان داها جالب بیر شئیه طرف چکین.
اوشاقلاری هئچ واخت آما هئچ واخت جمع ایچینده تحقیر ائله‌مه‌یین و اشتباهلارینی هامی‌نین ایچینده دانیشمایی. بیر عملی‌نین اشتباه اولدوغونو بیلدیرماق ایسته‌سز اونو خلوت یئرده دانیشمالیسیز.
بیر ده هر قوناقلیقدان قاباق، قوناقلیقدا نئجه داورانماغین یاخجی و مطلوب اولدوغونو اوشاغینان دانیشین و اوندان قایدالاری رعایت ائله‌ماغا سؤز آلین.