ايشيز نه‌قدر چوخ‌دا اوسا، بو موديريتي مهارتلر سيزه
ياشاييشي داها ياخشي كونترول ائله‌مگه كؤمك ائدر. و سيز ياواش-ياواش ايضطيرابدان
ويداعلاشاسيز. بو عصرده لاب ايضطيراب يارالدان زاد اودور كي آز فورصتده چوخ ايشلر
گؤرمگه مجبور اولاق.
هئچ بيليرسيز كي بو عصرين اينساني لاب چوخ موشكولو وقتين
آزليغيدير؟ بونا خاطير زمانين موديريتي ضروري بير مسأله‌دير. مخصوصاً اضطيرابيزي
آزالتماق ايسته‌سز.
1. اؤيرنمگه بيرنجي زاد، ايشلري اولويت اساسيندا بؤلمكدير.
بو منظورا گرك موهوم و غير موهوم، فوري و غير فوري-نين فرقلريني بيله‌سيز.
بير ايشه باخماغينان اونون موهوم و غير موهوم و يا فوري
اولوب اولماماسيني تشخيص وئره بيلسز چوخ ساده بعضي ايشلري كنارا قويوب اوّلده
موهوم ايشلري گؤره‌سيز. بو شيوه‌اينن داها ضرب‌الاجل‌لرين نيگراني اولماياجاقسيز.
و فوريت ترتيبي‌اينن بوتون ايشلريزه وقتيز اولاجاق.
2. اولويت اساسيندا بؤلمكدن علاوه «يوخ» دئمگي‌ده اؤيرنملي‌سيز.
بير ايش، وقتيزي توتسا و بيله‌سيز كي بو ايش نه موهوم و نه فوريدير، گرك تصميميزده
قاطع اولاسيز. يا گرك او ايشي كنارا قوياسيز يا كولاً لغو ائده‌سيز. مثلاً دوستوزا
بير ايش گؤرورسوز آما اونا وقتيز يوخدور. يوخ دئمگه اوتانساز اوندان موهوم ايشي
قوربان وئريب او ايشي گؤرمه‌ليسيز. يا دا دوستوزو نا اوميد ائتمك ريسكيني جانيزا
آليب اونا يوخ دئيه‌سيز.
3. سلقه سهمانلي اولماق هميشه‌ده ننه قارنيندان گلمه دئييل،
اونو اؤزوزده يارالدا بيلرسيز. ذاتاً مونظم آدام اولماساز دا برنامه و تقويمدن
ايستيفاده ائله‌مك سيزه كؤمك اولار. مثلاً ميزيزين اوستونده بير تقويم اولا بيلر
كي بوتون گؤروشلريزي اوردا يازاسيز. بو رويش ايشلرين وقتينده يئرينه گتيريلمه‌سينه
كؤمك ائتمكدن علاوه باعيث اولار وقتيزي دوستلاريزين شوماره‌سين آختارماغا و
تازادان مولاقات وقتين و يئريني خاطيرلاتماغا تلف ائله‌ميه‌سيز.
4. ايستيراحت اوچون وقت آييرين. برنامه‌نين وسطينده حتماً
احتياجيز اولار كي اوزاناسيز و يا حتي بير آز هوشله‌نه‌سيز. ايمكاني اولسا حتماً
بو ايشي گؤرون. گؤره‌جكسيز كي برنامه‌زه نه‌قدر اثر قوياجاق و باعيث اولاجاق
ايشلريزين هاميسنا يئنه‌ده وقتيز اولسون. دينجلمگه وقت آييرماقدان قورخمايين، چوخ
ياخجي ايستيراحت ائله‌سز گوجوز چوخالار. بئله فيكيرلشمه‌يين كي ايشلريزي تئز-تئز
گؤرسز و دينجلمه‌سز ايشلريز رديفه دوشر، چون نه‌قدر يورقون اولساز گوجوز آزالار و
ايشلر ياواش-ياواش گؤرولر.
5. موهوم ايتيفاقلاري برنامه‌زده يازين. اولا بيلر باشيز او
قدر قاريشا كي بعضي گونلري مثلاً يولداشيزين تولّود گونو يا ائولنمگيزين ايل
دؤنومون ياددان چيخارداسيز. آما اگر يولداشيزين اينتيظاري وار بو گونلر ياديزدا
اولسون ياخجيسي بودور كي اونلاري برنامه‌زده يازاسيز. البته عزيزلريزه بير آز وقت
قويساز گوجوز چوخالار و ايشلريزين قاباغا گئتمه‌سينه چوخ اثري اولار.
بو ساده ايشلرينن وقتيزدن ياخجي ايستيفاده ائده بيلرسيز و
ايضطيرابيزي اوزون مودّتده آزالدا بيلرسيز.