هر انسان عمرو بویو نفرلری سئچیب اونلارینان ارتباط قورمالیدیر. یولداش، حیات یولداشی، کوره‌کن، گلین، شریک و . . . سئچماق هر انسانین باشینا گلن سئچیملریدیلر. آما چوخ اولور کی انسانلار سئچدیقلاریندان پشیمان و اوننان ارتباطدا اولماقدان ناراضی‌دیرلار.

پشیمان شخصدن سوروشسان کی « بو قدر ناراضی اولارکن نه‌دن اونو سئچدین؟» معمولا بئله جواب وئرر: «اوّلدن بوجور دئییلدی کی. اوّل‌لر چوخ ادبلی و خوش صحبت ایدی. یالان دانیشان دئییلدی و . . .» بو جوابلار گؤزو آچیق سئچیملرینده کیریخا بیله‌جاقلارینی گؤرسدیر. هله قالسین کی  گؤزو باغلی و شیفته‌لیغینان سئچن انسانلار.

سئچیمین لاپ یاخشی اولماسی اوچون پیغمبریمیزدن (ص) نقل اولان بیر روایته باخاق.

ابن عباس پیغمبردن (ص) سوروشور: هانسی یولدا یاخجیدیر؟ پیغمبر (ص) بویوردو:

«مَنْ یُذَکِّرُکُمُ اللَّهَ رُؤْیَتُهُ وَ یَزِیدُ فِی عِلْمِکُمْ مَنْطِقُهُ وَ یُرَغِّبُکُمْ فِی الْآخِرَةِ عَمَلُهُ»

ائله انسان کی 1. اونو گؤرنده الله یادینا دوشه‌سن. 2. دانیشیغی علمینه آرتیرا. 3. عملی سنی آخرته ترغیب ائله‌یه.  (اصول کافی، ج۱، ص۳۰)

پیغمبر بو درین سؤزلری‌ اینن بؤیوک سؤژلری بیان بویورور. بویورمور اوزو گولر اولسون و یا مرتب اولسون بلکه مقابل طرفی تانیماق اوچون اساس آچارلاری اؤیردیر.

مرتب اولماق یاخجیدیر آما حقیقتین اؤلچوسو ظاهر دئییل. انسانین نه قدر ظاهری وضعی الله‌ین ذکری اینن سنخیتلی اولسا بیر او قدر قابل اعتماد اولار.

ایکیمینجی آددیمدا گؤره‌جاغی اونو علمی نه‌قدردیر. اونونلا دانیشاندا علمیمزه آرتاجاق یا یوخ. نیاز دئییل مقابل طرفیمیز علامه دهر اولسون بلکه سؤزلری‌نین علمه دایانماسی کفایت ائلر.

اوچومونجو آددیم مقابل طرفین عملیدیر. باخ گؤر عمل‌لری فقط شخصی منفعت دالیسیجان گئدیر یوخسا آخرتی و دینی‌ده نظرده آلیر. جامعه‌نین و انسانلارین سعادتیندن دانیشماق چوخ راحت ایشدیر آما باخ گؤر عملده ده دئدیغی کیمی وار یا یوخ؟

بیر انسان سئچدیقلاریندا بو اوچ مفهوم درین شکلده رعایت ائله‌یه بیلسه سئچدیغی یولداشدان هئچ واخت پشیمان اولماز.