منطقه‌نی بحران بورویندن بو یانا تروریستی گروهلار اؤز بیانیه و
خبرلرینی منتشر ائله‌ماق اوچون ارتباطی وسایلدن وسیع صورتده استفاده ائلیرلر.
اخیر آیلاردا دا النصره و داعش گروهلاری بو وسایلدن مخصوصاً فیسبوک و توییتر
کیمی اینترنتده اولان اجتماعی شبکه‌لردن تصویرلرینی و خبرلرینی داغیتماقدا استفاده ائلیرلر. و
جالب بوراسیدیر کی بو تروریستی گروهلار بو شبکه‌لردن دایمی و
رسمی صفحه‌لره صاحبدیلر و بو صفحه‌لر شبکه مسئول‌لاری طرفیندن
باغلانمیر.
دکتر دیوید ابراهیم
لبنانین العهد ساتی اینن دانیشیقدا بو ایشین چتین اولدوغونو دئییر. اونون دئدیغینا
گؤره، بو شبکه‌لرده حساب آچماق چوخ راحت
ایشدیر و بیر ساعتدن آز زمان آپاریر و بو صفحه‌لر ده یارانماق اوچون شبکه دولاندیرانلارین تأییدینه احتیاجی یوخدور.
شبکه
دولاندیرانلاری متعادل دینی صفحه‌لرینن افراطی سایتلاری بیر
بیریندن سئچنمیرلر. اونلار عمومیتده تکفیری جریانلارینان نورمال اسلامی جریانلاری
آراسیندا فرق قویانمیرلار. اونلارین هر ایکی دسته‌نین عین آدلار و اصطلاحلاردان استفاده ائله‌دیغینی گؤرورلر و اونلارین آراسینداکی تفسیر فرقلرینی سئچه
بیلمیرلر.
آیری طرفدن تروریستی
صفحه‌لرین ظاهر دَییشمه‌لری، اونلارین تعقیبینی داها دا
چتینلشدیریر. اونلار ظاهر دَییشماغینان چوخ راحت صورتده تروریستلرین سؤزلرینی
منتشر ائلیرلر.
تکفیری گروهلار هزینه‌سی اولمایان و هئچ
تجهیزاتا احتیاجی اولمایان اجتماعی شبکه‌لردن لاپ یاخجی صورتده
استفاده ائلیرلر. اونلار بو شبکه‌لردن تبلیغاتی کانال و
حتی منبر کیمی جامعه‌نین بوتون عضولری و حتی اونلارینان تک به تک
دانیشماق اوچون استفاده ائلیرلر.