عبدالحسین امینی تبریزی اجتهادا یئتیشمیشدی آما آرام – قراری یوخیدی. دئدیغینا گؤره شیعه‌یه ظلم اولان گونه‌جن تاماشایا اوتورماق اولماز و مبارزه ائله‌ماق لازمدی.
علامه امینی بو گون متواتر حیدثلره دایانماغینان شیعه‌لیغین حقانیت سندی اولان کتابی یازماغا گئجه – گوندوزونو صرف ائلیردی. ایش اورا چاتدی کی بو 11 جلدیق کتابی یازماق اونو گؤز قاباغیندان قیراغا چکدی. آزاراق دوستلار جمعینده گؤروشوردو. چوخ آز یاتیردی و بعضاً کتابخانا یولوندا دا مطالعه ائلیردی و آختاردیغی کتابلاری تاپماق اوچون بعضاً اوزاق اؤلکه‌لره گئدیردی. بعضاً شوخلوغونان دئییردی: «بو الغدیر بیزی آداملیقدان سالدی» آما بو گون علامه امینی‌نین آدی فقط الغدیرینن اسلام دنیاسیندا تانینیر. اونون 40 ایل بویونجا شیعه مخالفلری اینن مبارزه‌سی‌نین ثمره‌سی اولان کتاب کی هله ده شیعه حقانیتینی ثابت ائله‌ماغا لاپ مهم مرجع ساییلیر.
عبدالحسين اميني تبریزی هجری شمسی ایلی 1281-ده دنیایا گؤز آچدی. او سراب کندلرین بیرینده و یا تبریزده آنادان اولدو. 16 یاشاجن وطنده دینی علملر تحصیل ائله‌یندن سونرا مقدس نجف شهرینه یوللاندی و 32 یاشیندا اجتهاد درجه‌سینه چاتاندان سونرا تازادان تبریزه قاییتدی. بیر مدّت تبریزده قالیب تدریس و تحقیق ائله‌یندن سونرا تازادان نجفه گئتدی.
دئییلنلره گؤره، علامه او گؤردوغو ایشه اوقدر جوموردو کی مطالعه و تحقیق زمانی اطرافا اولان دقتی آزالاردی. بؤیوکلرین بیری دئییر: علامه تحقیق اوچون نئچه آیلیق هندوستانا گئتمیشدی. اوردان قاییداندا سوروشورلار هندوستانین ایستیسی اینن نئینه‌دیز؟ او بیر آز دوشونوب دئییر: عجبا، اصلا اورانین ایستیسینی بیلمه‌میشم!»
او زمانین کتابلاری‌نین ال یازما اولدوغو اوچون کتابخانالار هر کسه کتاب امانت وئرمزدیلر. علامه ده کتابلاری سطر- سطر دقتلی اوخودوغو اوچون اولاردی کی امانت آلدیغی کتابلارا صدمه دَیسین. بو اوزدن کتابخاناچیلار بعضاً اونا کتاب امانت وئرماقدان چکینردیلر. علامه‌نین شاگردلرین اولان علامه طباطبایی دئییر: بئله‌نچی زمانلار اوستادیمیز حضرت علی‌نین (ع) زیارتینه گئدیب اوردا حضرته خطاب دئیَردی: «آغا سیزین شیعه‌لریزین آراسیندا دا مظلوم قالمیشام. من سیزه خدمت ائله‌ماغا چالیشیرام آما بونلار مانع اولورلار». آما دفعه‌لرینن اولموشدو کی آز تاپیلان کتابلار صاحبلری طرفیندن علامهیه گؤندریلر کی تحقیقلریندن اونلاردان استفاده ائله‌سین.
دها آرتیق کتابا ال تاپماق اوچون چتین سفرلر
اسلامی و شیعه منبعلرین آز سایدا مختلف شهرلرده اولدوغو اوچون علامه اونلارا ال تاپماق اوچون اوزون سفرلره چیخماق مجبوریتینده قالیردی. بعضاً او کتابلار اوزاق و داغلیق کندلرده اولوردو کی علامه مجبور قالیردی اونلاری اوخواق اوچون چتین سفرلره دؤزسون. حيدرآباد، دكن، جلالي، رامپور، خولمه، معرفه، قاهره، حلب، نيل و دمشق شهرلری علامه‌نین تحقیق اوچون گئتدیغی شهرلردندیر. 11 جلدلیق الغدیر کتابینی یازماق اوچون علامه 20 مین آرتیق کتاب اوخودو. علامه بو 40 ایللیق یولوندا بعضاً شاگرلریندن‌ده کؤمک آلیر و اونلارا دا کتابلارین اوزونو یازماغی و تحقیق ائله‌ماغی تاپیشیریردی. الغدیردن سونرا علامه‌دن آیری کتابلار دا قالیب کی اونلاردان تبریزده یازدیغی فاتحه‌الکتاب تفسیرینی، شهدا الفضيله، السنه و السيره، رياض‌الانس کتابلارینی آد آپارماق اولار.
علامه‌نین کتابیندا هئچ ایراد یوخدور
نجف حوزه‌سی‌نین اوستادلاریندان اولان شیخ محمد رضا مظفردن الغدیر کتابینین نثری باره‌ده جالب بیر نقل قول اولونوب. او دفعه‌لرینن شاگرلری‌نین جمعینده دئیَردی: «من بو مسأله‌یه تعجب ائلیرم کی شیخ محمد حسین کاشف الغطاء جد- آباسی عرب اولماسینا و نثری‌نین روان اولمساینا رغماً اصول شیعه باره‌سینده بالاجا بیر کتاب یازاندا نثری‌نین 7 اشکالی اولور آما علامه امینی تورک و تبریزلی اولا- اولا کی لهجه‌لری‌ده تورکیدیر 11 جلیدلیق الغدیر کتابیندا بیر دانا دا اشکال تاپماق اولمور».
شاگردلری‌نین دئدیغینا گؤره علامه سفرده اولاندا دا مطالعه‌دن ال چکمزدی و همان جدّیت اینن تحقیق ائلردی. بیر دفعه او علامه طباطبائی‌یه دئییر: هندوستان رامپور شهرینه سفر ائله‌ینده گونده 18 ساعت مطالعه و نوت یازماغا مشغول اولوردوم». ائله بو جدّیت الغدیرین رقیبسیز اولماسینا سبب اولدو و بو گونه‌جن غدیر خطبه‌سی و اونا مربوط اولان خبرلرین لاپ جامع کتابی ساییلیر.
بیزیم‌ده اؤز اربابیمیز وار . . .
بیر زمان عراقدا کاغذ قیتلیغی اولدو. علامه 11 جلدلیق الغدیر کتابینین چاپی اوچون کاغذ آلماغا نجفدن بغدادا گئتمه‌لی اولدو. اوردا شیخ محمد رضا مظفر اینن قیسا گؤروشلری اولدو. او علامه‌دن نه اوچون گلدیغینی سوروشاندا علامه الغدیرین چاپیاوچون 300 بند کاغذین آلماق قصدینده اولدغونو دئییر. شیخ مظفر گولومسنیب دئییر: بوتون رابطه و دوستلاریما رغماً «کتاب السقیه» کتابینین چاپینا 15 بند کاغذ آلا بیلمیرم». سؤز بورا چاتیر کی علامه دئییر: «من کاغذ مرکزینه گئدیرم بیزیم‌ده اؤز اربابیمیز وار.» صاباحیسی گون علامه مرکزه گئدیر. اورانین مسؤولو آیریلارین ترسینه علامهیه چوخ احترام قویور و سوروشو نه قدر کاغذه احتیاجیز وار. علامه دئییر: «300بند». او شخص گؤزلنیلمه‌دن دئییر: «بوردا تحویل آلیرسیز یوخسا نجفدن تحویل آلماق ایستیرسیز؟» علامه: « نجفده تحویل آلارام» دئییر و حسابینی گؤروب گئدیر. سونرالار کاغذ مسؤولون انتقاد ائلیرلر کی او قدر کاغذی نییه وئردی؟ جواب وئریر: «بو شیخ من اینن ائله دانیشیدی کی آمبارین بوتونون ایسته‌سه‌یدی وئرماق مجبوریّتینده‌یدیم».
الغدیر کتابینین خصوصیتلری‌نین بیری ولایو شیعه عقیده‌سینی ثابتله‌ماق اوچون سنّی‌لرین اثرلریندن واسطه‌سیز استفاده ائله‌ماق ایدی. علامه‌نین 68 ایل علم یولوندا چالیشماقدان سونرا باشا چاتسا دا اونون الغدیر کتابی هله ده دنیانین باشا باشیندا معتبر و مرجع کتاب کیمی ساییلماقدادیر.
علامه‌نین مطهر پیکری تهران، بغداد، کاظمین، کربلا و نجف شهرلرینده عظمتلی و طنطنه‌لی صورتده تشییع اولاندان سونرا مولاسی‌نین جواریندا نجف شهرینده تورپاغا تاپیشیریلدی.