1320 ه ق، 1281 ه ش ایلینده، سراب شهرینده، علم و تقوا دولو بیر ائوده بیر اولدوز ایشیلداییب ائو اهلینی سئویندیردی.

شئیخ احمد امینی تبریزی، علامه امینی‎نین محترم آتاسی، تقوالی عالیملردندی. انسانلار اونا احترام ائدردیلر. میرزا احمد، 1287 ه ق-ده آنادان اولدو. او اؤز زامانینین فقیه ومجتهدلریندن اولوب زهد و پارسالیقدا دیللره دۆشموشدو. او 1304ـده تبریزه مهاجرت ائدیب همیشه‎لیک بورادا ساکین اولدو. بو بؤیوک کیشی،    1370 ه ق-ده دونیادان گئدیب مقدس قوم شهرینین "نو" قبرستانیندا قویلاندی.

علامه امینی‎نین ده‎ده‎سی (پدربزرگ)، این الشرعـه آدلیم اولان ملا نجفقلی‌دور کی علامه‎نین ده آدی بو لقبدن (امین الشرع) آلینمیشدیر. او 1257 ه ق‎ده تبریزین تابعه‎سی اولان "سردها" کندینده دونیایا گؤز آچدی. ائله او کندده ده درس اوخوماغا باشلادی. سونرالار تبریزده ساکین اولدو. زاهید، فاضل، پرهیزکار و ادیب بیر کیشی ایدی.ائمه-اطهار خبرلرینی ییغماغا چوخ علاقه‎لی ایدی. بیر نئچه روایت مجموعه‎سی ده تدوین ائدیبدیر. اوندان فارسجا و تۆرکجه شعرلر یادگار قالیبدیر. او شعرده "واثق" تخلص ائدردی و مؤهورو ده – بعضی رساله‎لرینین دالیندا گؤرولدویو کیمی - "الواثق بالله الغنیِ عبدهُ نجفقلی" ایمیش. او 1340 ه ق‏دا، 83 یاشیندا دۆنیادان گئدیب نجف-اشرفین وادی السلام‌ـیندا توپراغا تاپشیریلدی.

 

علامه‎نین اوشاقلیق و جاوانلیق چاغی

عبد الحسین‌ین اوشاقلیغی یاشیدلارینینکی کیمی کئچمه‌دی؛ بلکه او، ائله اوشاقلیغیندان، اؤز هوش و استعدادینی گؤرستدی. او حیاتینا باشلادیغیندان بری، دینی مسله‌لری آنلاماقدا، گۆجلۆ حافظه و عجیب سرعتییله هرکسی حئیران ائدردی. محقق روحو، آیری اوشاقلار کیمی یاشاما سینا اجازه وئرمیردی. اونو گؤرن هرکس چوخ هوشلو اولدوغونو دئیردی.

 مذهبی، علم،، بیلم ومعرفت‌‌سئورخانواده‎سی عبدالحسین‎ین گلیشمه‏‌سی (رشد و تعالی) اۆچون زمینه‌نی  حاضیرلادیلار. تحصیله آتاسینین یانیندا باشلاییب علمین پایه‌لرییله تانیش اولدو.

آتاسی ، اونا، فارس ادبیاتی، عربجه، منطق و بیرآز دا فیقه و اصول اؤیرتدی. عبدالحسین حدیث و اعتقاد کیتابلرینا چوخ علاقه گؤرستسه ده «بو جاوان طلبه‎نین اؤیرتیمی اوچون، قرآن و نهج البلاغه لاپ ده‎یرلی کیتابلاردی».

ائله اوشاقلیغیندان اعتباراً، عبدالحسین‌ین وجودو، قرآن آیه‌لری و امیرالمومنین علی‌نین – علیه السلام – ودیگر اماملارین – علیهم  السلا م – حدیثلری ایله دولوب اهل ــ بیت محبتی قانینا و روحونا ایشله‎دی؛ اونلار اسلام اولسون.

بئله جه، عبدالحسین، استعدادی، علمی چالیشمالاری و اراده گوجویله، خانواده و دؤوره-برینده کیلری، اؤز گلجه‎ینیه امیدوار ائدردی.

عبدالحسین اون دؤرد یاشیندایکن، شئیخ محمد خیابانی، اینگیلیستانین شوم استعمارس علیهینه قیام ائتدی. خیابانی‎ین نهضتیندن قاباق، مشروطه انقلابی باش وئرمیشدی؛ بو انقلابدا تبریز خالقی، چوخ مۆهۆم بیر نقش عهده‌لنمیشدی. ایندی ایسه، خیابانی، شهیدلرین قانینین احترامینا، آیری بیر قیاملا انحرافین قاباغیندا دورماق ایسته‌ییردی. پس، 16 رجب 1338، مصادف 17 فروردین 1299-دا، وثوق‎الدوله‌نین مرتجع دولتی، هم ده اینگیلیس امپئریالیستلری علئیهینه قیام ائتدی. بو قیام آذرباجانین آیری شهرلرینه ده سرایت ائدیب  دولت اداره‎‏لری بیرر بیرر انقلابچیلارین الینه دۆشدۆ. شهرین اداره‎سی، آلتی آی بویونجا، خیابانی‌نین رهبرلییی ایله میللی کومیته‌نین الینده‌ایدی‌. او، ا‌ینگیلیس، روس، آلمان و عثمانلی قاباغیندا دوران مستقل موضعلی بیر مبارزدی. وثوق‌الدوله‌نین سقوطوندان سونرا، مشیرالدوله پیرنیا باش‌وزیرلییه (نخست‌ وزیری) چاتدی. او حاجی مخبر‌‌‌السلطلنه هدایتی، تبریزه گؤندریب یورولماز مجاهدی دفع‌ ائتمه‌سینی ایسته‌دی. 28ذیحجة الحرامدا، انقلابچیلارین مرکزی آرادان گئتدی. اۆچ گوندن سونرا دا، اونو، شئیخ حسن میانجی‌نین ائوینده شهید ائتدیلر.

عبدالحسین، شئیخ محمد خیابانی‎نین متعالی یؤزلری و فیکیرلری ایله تانیش ایدی؛ اونون سئورلری کیمی عزا توتدو. آتاسیندان اؤیرندی کی قیام و شهادتدن سونرا، دوعا مکتبی ایله، اسلامین سیاسی واجتماعی فرهنگینی، اجتماعدا یایماق گرک.

امینی ایسته‌ییردی کی عتبات-عالیاتدا درس اوخوماقلا، علمی جهاد ائدیب حاق یولونا دوام ائتسین.

علام، 16 یاشیندا تحصیلینه ادامه وئرمک اۆچون نجف-اشرفــه گئدیب تقریباً 32 یاشیناجان اورادا درس اوخودو.

بو ایللرده آیة الله سید محمدبن محمدباقر الحسینی فیروزآبادی، آیة الله سید ابوتراب بن ابوالقاسم خوانساری، آیة الله میرزا علی بن عبدالحسین ایروانی و آیة الله میرزا ابوالحسن بن عبدالحسین مشکینی کیمی اوستادلاردان فایدالانیب بیلیم آلدی.

علامه، بعضی اوستادلاردان اجتهاد اجازه‎سی آلمیشدیر:

1-     آيت الله سيد ميرزا علي بن مجدد شيرازي

2-     آيت الله شيخ ميرزا حسين نائيني نجفي

3-     آيت الله شيخ عبدالكريم بن ملا محمد جعفر يزدي حائري

4-     آيت الله سيد ابوالحسن بن سيد محمد موسوي اصفهاني

5-     آيت الله شيخ محمد حسين بن محمد حسن اصفهاني نجفي مشهور به كمپاني

6-     آيت الله شيخ محمد حسين بن علي آل كاشف الغطاء.

او، 32 یاشیندا، آنا یوردو تبریزه قاییدیب قیسا بیر مدت اورادا قالدی. او زامانلار، واختی، تحصیل و تدریسه صرف اولدو. جانی امیرالمومنین علی – علیه السلام – عئشقینده یانان علامه امینی، اوزون زامان فراغا دؤزه‎ممه‌ییب گینه ده نجف-اشرفــه گئتدی. علامه امینی‌ین اجتهاددا، منزلتلی مقامی واردی. اونون واختینین چوخو مطالعه و تحقیقله گئچردی و اسلام منبعلریندن توشه آلاردی. او تفسیر، تاریخ و رجال علمینده نظر صاحبی ایدی.

 

علامه‌نین تحقیق و تألیفلری

شئیخ عبدالحسین 1335-ده، «شهداء الفضیلة» آدلی ده‎یرلی اثرینین تألیفینی باشلادی. 33 یاشلی عبدالحسین، بو دؤورده تازا و ابتکاری بیر ایش گؤردو. او، قدیم کیتابلاردان حاق یولوندا شهید اولان قدیم ومعاصر علیملر باره‎سینده، بو اثری یازدی. او بو کیتابی یازماق اۆچون چوخ زحمت چکدی. شهید عالیملر باره‎سینده، آز یا دا چوخ مطلب تاپماق اوچون ایران و عراقدا بیر چوخ کیتابخانایا باش ووردو. علامه امینی، بو کیتابدا دؤردونجو عصردن اون دوردونجو عصره قدر یۆزدن چوخ امام علی (ع) پیروو و شیعه علیملرینین، حیات و فیکیرلرینی یازماغا چالیشدی. بو معاصر محدّث، مفسّر، متکلّم و فقیه اؤز گئنیش دایره‎لی تحقیقلرینه ادامه وئریب ابن قولویه قمی‎نین «کامل الزیارات» کیتابینیا بیر تعلیقه یازدی. او بو تعلیقه‎نی شیعه فرهنگینده زیارت مفهومونو تانیدیب باره‌سینده بحث ائتمک اوچون قلمه آلدی. سونرا دا «ادب الزّائر» آدلی اثرین تألیفییله، اؤز ارادتینی امام حسینـه (ع) ثابت ائتدی.

فلسفه زمینه‌سینده ده ایکی جلدده «ثمرات الاسفار»ـی تألیف ائتدی. فیقه و اصولدا، شئیخ انصاری‌نین ده‎یرلی «مکاسب» و «وسائل» کیتابلارینا حاشیه یازدی. ائله بو زامانلاردا ده‎یرلی بؤیوک علمی چالیشمالارینا گؤره  آدلارینی چکدیییمیز اوستادلاریندان، اجتهاد اجازه‎سی آلیب تبریزه دؤندو.

بو زامانلاردا قرآن تفسیرینه جذب اولار. اعراف، واقعه و مؤمن سوره‎لرینین  بعضی آیه‌لریندن بحث و اونلاری تحلیل ائدر؛ فقط بو تحقیقلرین هامیسی اونون بؤیرک ایشینه بیر مقدمه‎دیر.

علامه امینی، تحصیلاتینا باشلایقدان بری، اسلامین معیارلارییلا اداره اولوناجاق بیر جامعه‌نین ایجادینی دۆشونوب دوراردی. ائله بیر جامعه کی اوندا قارداشلیق عینی‌له‎شسین و مسلمانلار تبعیض و تفرقه‌سیز، آرمانی بیر جامعه دۆزه‌لتمه‌یه چالیشسینلار. او، بو هدفی اوچون عراق، هندوستان، پاکستان، مغرب، مصر و... اؤلکه‎لره سفر ائدرک اونلارین کیتابخانالاریندا اوّلده، تبلیغ آیه‎لری (مبارک مائده سوره‎سی: 67-جی آیه)، اکمال (مائده: 5-جی آیه)، مبارک معرج سوره‎سینین 1-3-جۆ آیه‎لری، ولایت (مائده 55-جی آیه) و هل اتی سوره‎سی باره‎سینده تحقیق ائتمه‌یه باشلار.

سونرا، غدیر، ولایت، منزلت، ثقلین، انذار العشیره و... حدیثــلری تاریخ و سـنـد باخـیمیندان تحلیل ائدیب آراشدیریبدیر. الغدیر کیتابی‎نین بیرینجی چاپی ه ش 1324-ده نجفـده باشلانیب دوققوزونجو جیلده قدر چاپ اولوندو. علامه امینی الغدیر کیتابی‎نین 1-جی جیلدینین نشریندن یئددی ایل سونرا امیرالمومین علیه (ع) اراده‎تینی اثبات ائتمک اۆچون 42000-دن چوخ ال‎یازما (خطی) و باسما (چاپی) کیتابلا امام امیرالؤمنین کیتابخاناسی‌نی (مکتبة الامام امیرالمؤمنین) تأسیس ائدر.

 

علامه امینی‎نین چاپ اولونموش کیتابلاری:

1- شهداء الفضیله

اسلام و دین یولوندا شهید اولان 130-دان چوخ دین علیمینین زندگینامه‎سی.

2- سيرتنا و سنتنا سيره نبينا و سنته

بو کیتاب، شیعه‏نین اهل-بیتـه (ع) محبّتـی و و حضرت سیدالشهدایا یاس ساخلاماق باره‌سینده سوروشولان سواللارا، علامه امینی‎نین جوابلاریدیر.

3-     كامل الزيارات ابن قولويه (تصحيح و تعليق)

4-     ادب الزائر لمن يمم الحائر

5-     الغدير في الكتاب و السنه و الادب

6-     تفسير فاتحه الكتاب

اونون چاپ اولونمامیش اثرلری ده وار:

1-     اعلام الانام في معرفه الملك العلام (توحید باره‎سینده و فارس دیلینده.)

2-     تفسير آيۀ و لله الاسماء الحسني

3-     تفسيرآيۀ و كنتم ازواجاً ثلاثه ...

4-     تفسير آيۀ و اذ أخذ ربك من بني آدم ...

5-     تفسير آيۀ قالوا ربنا امتنا اثنين ...

6-     ثمرات الاسفار(ایکی جیلدده)

7-     رسائل شيخ انصاریه حاشيه

8-     مكاسب شيخ انصاریه حاشيه

9-     زیارتلر حققینده زیارت (پاكستان عالیملرینه جواب اولاراق یازیلیبدیر).

10-  علم درايه رساله‎سی

11-  نيت رساله‎سی

12-  رياض الانس(ایکی جیلدده هره‎سی مین صحیفه)

13-  العتره الطاهره في الكتاب العزيز

14-  سليم بن قيس هلالي كتابی باره‎سینده رساله‎سی‌

 

امام علی کیتابخاناسی

الغدیر صاحبی ه ق 1373-ده، الغدیرین ایل جیلدینین نشریندن سککیز  ایل سونرا، بیر کیتابخانا تأسیس ائیب آدینی مکتبة الامام امیرالمؤ منین علیه السلام قویوب غدیر بایرامیندا افتتاح ائتدی. بو کیتابخانا، ایشینه، 42000 جیلد ال‌یازما (خطی) و باسما (چاپی) کتابلا باشلادی. کیتابخانانین تأسیسی اوچون الیازما کیتابلاری معتبر کیتاخانالاردان تهیه اولوندو؛ بعضیلری:

ناصریه کتابخاناسی، 000/30 جیلد کیتاب، لکنهو

مدرسة الوعظین کیتابخاناسی، 000/20 جیلد کتاب، لکنهو

سلطان المدارس کتابخاناسی، 000/5 جیلد کتاب، لکنهو

معتازالعلماء کتابخاناسی، 000/18 جیلد کتاب، لکنهو

محل فرنگی کتابخاناسی ، 000/9 جیلد کتاب، لکنهو

ندوة العلماء کتابخاناسی، 000/60 جیلد کتاب، لکنهو

امیرالدوله کتابخاناسی، 000/110 جیلد کتاب، لکنهو

دانشگاه اسلامی علیگره کتابخاناسی، 000/500 جیلد کتاب، علیگره

رظلا عمومی کتابخاناسی، رامپو

خدابخش کتابخاناسی، 000/50 جیلد کتاب، پتنه

عثمانلی دانشگاهی عمومی کتابخاناسی، 000/111 جیلد کتاب، حیدرآباد

آصفیه عمومی کتابخاناسی، 000/125 جیلد کتاب، حیدرآباد

سالار-جنگ کتابخاناسی، 000/52 جیلد کتاب ، حیدرآباد؛

بونلاردان سونرا، ايران و عراقدا مختلف عمومی و خصوصی کیتابخانالار دا گؤرولوب فایدالانیلیبدیر.

 

علامه‎نین زهد و عبادتی

او، زهد، تقوا و ورعده چوخ دقتـلی ایدی. عابددی و آللاه امریندن چیخمازدی. اخلاغی خوش و همّتـی اوجایدی. بلکه ده ائله بو همتی سایه‎سینده موفقیتـلره چاتمیشدی؛ هدفی یولونداکی مانعلر اونو دوردورمازدی، ناامید ائدمزدی. بو قدر علم وبیلیمه صاحب اولسا دا چوخ آلچاق کؤنوللو (متواضع و به دور از کبر و غرور) ایدی.

رحمتلی علامه دیلیندن چوخ مییاغیت اولاردی. تعریفـلفــله‎یرلر کی کیمسه آغزیندان چیرکین بیر سؤز ائشیتمه‎میشدی. آتاسی باره‎سینده ده دئیرلر کی او قدر اخلاقلی و نفسی-سالیم بیر آدامدی هئچ کس اونو عصبانی گؤره‎ممدی مگر دینی مسله‎لرده. ائله ادبلی ایدی کی کیمسه پیس بیر سؤز اوندان ائشیتمه‎دی.

علامه امینی‎نین آللاها توکّلۆ و اوندان سووایدان انقطاعی هرکسین دیلینده ایدی. او بیر مشکله توش گلدییینده اهل-بیت خصوصاً امیرالمؤمنین علیه (ع) متوسّل اولاریدی.

علامه امینی یارانیشین تملینین محبّت اولدوغونا اینانیردی. او "بوتون عبادتــلر محبّتــدندیر" دئیردی (هل الدین الا احب؟). آللاها محبت نه قدر چوخ اولسا او قدر گۆناه و معصیتـدن اوزاق اولونار. رحمتلی دئیردی: نامازدا توجّهسۆز اولانین محبّت مشکلۆ واردیر.

او عبادتـده ده چالیشقان و گئجه نامازینا مقیّددی. همیشه، صبح نامازیندان سونرا قرآن اوخویاردی کی تدبیر و تأمّل ایله اولاردی. حیاتـدا لاپ مۆهۆم مسله‌لریندن بیری قرآن اوخوماسی و اونونلا مأنوس اولماسی ایدی. اوروجلوقدا، اوروج توتوب عبادت ائتمک اۆچون اؤزلرینی هر ایشدن فارغ ائددیلر. بو آیدا اون بئش قرآن ختمی اولاردی.؛ اون دؤرد ختم اون دؤرد معصوم نیّتـینه و بیری ده آتا آناسی آدینا. آیری آیلاردا دا هئچ اولمازسا بیر قرآن ختمی اولاردی. بو قرائتـلر و قرآنلا مأنوسلوغون تأثیری اونون قلمینده گؤرۆنۆر: یازیلاری چوخ آخیجی (روان) و محکمدیر؛ البته بو تأثیرلر الغدیرده داها بارزدیر؛ الغدیرده بعضی آیه‏لره ائله استشهاد ائدیبدیر کی ائله بیل بو آیه ائله او موضوع اوچون نازل اولوبدور.

توسّللره چوخ تأکید ائدردی. جامعه-کبیره، امین الله وعاشورا زیارتلرینی اینانیر و اوخومسینا مقیّددی. بیر چوخ دوعانی دا حیفظ ایدی.

 

زیارلر و توسل‎لر

علامه امینی بویوراردیلار کی زیارتلر و دوعالار شیعه مکتبــینده طرح اولوندوغو کیمی آیری مکتبــلر و مذهبــلرده یوخدور. بیریسی بو زیارتـلر و دوعالارلا مأنوس اولسا و نه اوخودوغونو و اونون فلسفه و حیکمتینی بیلسه، ساواوادسیز شیعه اولماز؛ دینین نه اولدوغونو بیلر.

علامه امینی توسّللره چوخ تأکید ائدردی؛ جامعه-کبیره، امین الله وعاشورا زیارتلرینی اینانیر و اوخومسینا مقیّددی. بیر چوخ دوعانی دا حیفظ ایدی.

رحمتلی علامه‎نین حیاتـینین مۆهۆم بیر قیسمتینی دوعالار، توسل‎لر، اهل-بیته یالوار-یاخار و خصوصاً زیارتـلر تشکیل ائدر. او، هر گئجه امیرالمؤمنین علی‌نین (ع) حرمینه مشرف اولدوغو زامان او قدر دبـلری رعایت ائدردی کی انسانلار زیارت دبلرینی اؤیرنمک اوچون دوروب اونا باخاردیلار. آلچاق کؤنوللولوک و حۆزن ایه امامین باشی طرفینده اوتوروب زیارتده‎کی لفظلرله اماملا دانیشیب او قدر آغلارذی کی ساققاللاری بئله ایسلاناردی  و اوقدر مشغول اولاردی کی چوخ واخت بیر ساعاتدان دا چوخ چکردی.

علامه امینی «‌اشهد انّک تسمع کلامی و ترد سلامی» لفظینی حرمده اوخودوغو زامان حضرتین قاباقدا اوتوروب اونونلا دانیشدیغینا و حضرتدن جواب آلابیله‎جیینه اینانیردی؛ بو دا ولایتـده بؤیوک بیر مقامدیر.

حضرت سیدالشهدانین (ع) حرمینه مشرف اولدوغو زامان یئرده گئدردی. توجه اولوناسی مسله ده بوئور کی اصلی یولدان گئتمه‎ییب ده کندلر آراسیندان گئدردر و گئجه‎لری ده اؤزونو تانیتمادان او کندلرده قالیب اورادا دین معارفی و اهل-بیت (ع) باره‎لرینده سخنرانلیق ائدیب الهی معرفتـلرین شیرین دادینی اونلارا دادیزاردی.

 

توسّلدن جواب آلاجاغینا یقینی

عربین بؤیوک شاعیرلریندن و میصیر (مصر) عالیملریندن اولان دوکتور محمد عبدالغنی حسن – علامه امینی‎نین الغدیری اونا گؤندردیییندن سونرا – بیر شعر قوشوب علامه‎یه گؤندریب اوندان تقدیر ائتدی.

علامه امینی بیر نامه گؤندردی کی من سیزدن ممنونام کی بو شعری قوشوب منه گؤندیبسینیز آما نییه اصلی قویوب فرعدن یاپیشمیسینیز؟ کشکه سیز ده غدیریه دئییب آدینیزی غدیریه-دئینلر آراسیندا ثبت ائدیب قالارقی اولایدینیز امیالمؤمنینه ده دوستلوغونوزو گؤرسه‎ده‎یدینیز.

دئیرلر ایکی آی جواب وئرمه‎دی. ایکی آیدان سونرا بئله جواب گلدی کی من سیزین نامه‎نیزین جوابینی بونون اۆچون گئج وئردیم: بو دونیادا آنجاق بیر قیزیم وار او دا مریض اولوب و دوکتورلار جواب ائدیبلر قیزیم دا اؤلوم حالیندادیر. اونا گؤره، شعر دئمک حالیم یوخدو آما سیزین بویوردوغونوزا گؤره بو غدیریه‏نی آغلار گؤزلرله دئییب  سیزه گؤندردیم.

بو نامه پنجشنبه گونو علامه‎نین الینه چاتدی. علامه امینی امیرالمؤمنین (ع) حرمینه گئتدی. صاباح، اوغلو حاج آغا رضایا بیر نامه وئریب محمد عبدالغنی حسنه پست ائتمه‎سینی ایسته‎ییب دئدی: من دۆنن حرمده غدیریه‎نی امیرالمؤمنینه (ع) اوخودوم و قیزین شفاسینی آلابیلدییمی دوشونورم؛ ان شاءالله.

نامه گؤندریلدی و ایکی هفته سونرا، محمد عبدالغنی حسن‎ین جوابی گلدی: سبحان الله، ائله او گئجه کی سیز بویورورسونوز منیم غدیریه‎می حرمده اوخیوبسونوز قیزیم شدتـلی بیر تب ائدیب سونرا توختادی. ایندی  ده ائویمین چیچگیدیر بو دا مولا امیرالمؤمنین‌ین معجزه‎لریندندیر.

رحمتلی علامه دئیدی کی جامعه-کبیره زیارتینی اوخویان و نه دئدییینی بیلن شیعه ساوادسیز دئییل چۆنکو دینین نه اولدوغونو بیلیر.

 

گۆنشین باتماسی

علامه امینی‎نین بیر عؤمور، دورمادان چالیشماسی، اونون جیسمینین ضعفـینه و عؤمرونون سون ایکی ایلینده مریض و اوتوراق اولدوغونا سبب اولدو. اسلام دینی، شیعه مذهبی و اهل-بیت (ع) یولوندا چکدییی یورغونلوقلار وچتینلیکلر نهایت جۆمه 12 تیر 1349 (ربیع الثانی 1390) سونونا چاتیب او آغساققال ده‎یرلی عالیم آلمیش سککیز ایل دین یولوندا چالیشدیقدان سونرا، یار گؤروشونه گئتدی. غدیر صاحیبی الیندن کوثر سویو ایچیب یورغونلوغونو چیخارماغا گئتدی. گئتدی آما الغدیری صفالی اۆرکلرین چیراغی و ولایت گۆنشی چیخینجایا دک اۆمّتین هدایت مشعلی اولدو.حتضار حالیندا علامه‏نین دوداقلارینی مقدس کربلا تۆربتـلی سو ایله ایسلاتدیلار. اوغلو – حاجی شئیخ رضا امینی – ده عدیله دوعالارینی و متوسلین و معتصمین دوعالارینی اوخویوردو علامه ده حۆزنلو اولاراق و گؤزلریندن یاش آخاراق دوعالاری تکرار ائدیردی.

او بؤیوک کیشینین آغزیندان چیخان سون سؤزلر بئله ایدی:

"اللهم هذه سکرات الموت قد حلّت فاقبل الیّ بوجهک الکریم، و اعنّی علی نفسی بما تعین به الصالحین علی انفسهم ... " آللاهیم، بو، منه ساری گلن اؤلوم سکراتیدیر. پس منه نظر ائله و صالئلحلره کؤمک ائله‎دییینله منه ده کؤمک ائله.

 

بو دوعانی قورتاردیقدان سونرا آللاه چاغریسینا لبّیک دئییب گؤزل روحو آللاها قوووشدو.

 

قایناقلار (منابع)

سيري در الغدير؛ ابوالفضل اسلامي

 ترجمه الغدیر

 شهیدان راه فضیلت 

 تبيان سايتي

علمای بزرگ شیعه

ربع قرن مع العلامه

گلشن ابرار؛ جمعى از پژوهشگران حوزه علميه قم 

حوزه‌‏نین سايتي

http://www.hawzah.net/Hawzah/Scientists/Scientists.aspx?id=1978 

علامه اميني عالي أموؤش موسسه‎سي‎نين سايتي  

  http://www.aab.ac.ir/0401/sec_1/p_9.aspx?lang=Fa

حماسه غدير؛ محمدرضا حكيمي

ابنا خبر سايتي