محسن هشترودی 1286-جی ایلین دی آیی‌نین 22-سینده هشتری شهرینده دنیایه گلدی. آتاسی شیخ محمد خیابانی‌نین مشاورلریندن، مجتهد شیخ اسماعیل ایدی.
محسن هشترودی ابتدایی تحصیلینی تبریز شهری‌نین سیروس و اقدسیّه مدرسه‌لرینده اوخویاندان سونرا تهرانین دارالفنونوندا طبابت اوخودو. او 1304-جو ایلده دولتی بورسیه‌سی اینن ریاضیات اوخوماغا فرانسه‌یه یوللاندی.
او، 1314-ده فرانسه‌نین سوربون دانشگاهیندان لیسانس درجه‌سی اینن وارغ التحصیل اولدو. سونرا پروفسور «الی کارتان» نین باشچیلیغی اینن دیفرانسیل هندسه‌سی زمینه‌سینده تحقیقه باشلادی و 1316-جی ایلینده ریاضیات رشته‌سینده اؤز دکتراسینی آلدی.
پروفسور هشترودی وطنه قاییداندان سونرا عالی دانشسرانین علوم دانشکده‌سینده اوستادیار کیمی ایشه باشلادی. 1320-ده عالی دانشسرانین اوستادلیغینی آلدی. 1320-ده تبریز دانشگاهی‌نین رئیسی اولدو و 1336-دا تهران دانشگاهی‌نین علملر دانشکده‌سی‌نین رئیسی اولدو.
پروفسور هشترودی عمرو بویو، رابطه‌سینی بین المللی علمی مجمعلرینن ساخلادی. او 1329-دا تهران دانشگاهی‌نین نماینده‌سی کیمی هارواردین بین‌المللی ریاضیچیلار کنگره‌سینه قاتیلدی. مؤسسه‌نین رئیسی پرفسور اوپنهايمرین ایستگی اینن پرینسون دانشگاهی‌نین پیشرفته مطالعه‌لر مؤسسه‌سینه عضو اولدو و هاروارد دانشگاهیندا دا بیر ترم درس وئردی.
پروفسور هشترودی دیفرانسیل هندسه‌سینده متخصص ایدی. اونون لاپ مهم علمی اثری، دیفرانسیل هندسه‌سی زمینه‌سینده یازدیغی دکترا تزیدیر. بو تزده اوستادی الی کارتالینین مدل‌لری‌نین بیرینی تعمیم وئریب کی بو گون Hachtroudi Connection هشترودی التصاقی آدینا تانینیر.