بیرینجی محراب شهیدی آیت الله قاضی طباطبایی‌، تبریزین فقید امام جمعه‌سینین شهید اولماسینین ایل دؤنومو مناسیبتییله بو مجاهید عالیمین علمی سالشمارینا نظر سالماق هئچ ده یئرسیز اولماز:

1300 هـ ش

اؤزونون یازدیغینا گؤره تحصیله یئددی یاشیندا باشلاییبدیر. محترم آتاسی حاجی میرزا باقر آغا قاضی، اونو خصوصی بیر معلمه تاپشیردی و معلم اونا الیفبا اؤیره‌دیب حرفلری هؤججولتدی. باجیسی صفیه خانیم دا بو خصوصی تعلیملرده شرکت ائدردی. آتاسیندان سونرا آیت الله قاضی‌نین تعلیم و تربیتینده هرکسدن چوخ سعی و تلاش ائدن ده‌یرلی عمیسی حاجی میرزا اسد الله قاضی طباطبایی ایدی.

آتاسی و عمیسینین اونون تعلیم و تربیتینده دقّت و مواظبتیندن سونرا، او، گؤزل خطی ده گؤزل اولان رحمتلی حاجی میرزا محمد حسین مکتبدارین مکتبینه تاپشیریلدی. بیر نئچه ایلده، فارسی و عربینین مقدماتینی اؤیرندی.

طالبیه مدرسه‌سینده میرزا احمد نوبری هابئله میرزا عبد الوهاب شعاری‌دن علم کسب ائتدی.

فیقه سطحلری واصولو آتاسی حاجی میرزا باقر آغا قاضی‌نین محضرینده کئچیردی. عزیمتیندن قاباق آیت الله حاجی میرزا واعظ خیابانی‌ین ده درس محضریندن فایدالاندی.

1316 هـ ش / 1357 هـ ق

آیت الله قاضی‌نین ایلک روایت اجازه‌سینی مرحوم شئیخ آغا بزرگ طهرانی، بو تاریخده صادر ائدیبدیر.

1318 هـ ش / 1359 هـ ق

علمی و نظری پایه‌لرینی تکمیللشدیرمک اوچون قوم علمیه حوزه‎سینه یوللاندی. آیت الله قاضی طباطبایی قوما گئتدیکدن سونرا، رحمتلیلر حضرت آیت الله مرعشی نجفی‌ و حضرت آیت الله سید محمد رضا گلپایگانی‌نین کفایه درسلرینده حاضیر اولدو. حاجی ملا هادی سبزواری منظومه‌سی شرحی، صدر المتألهین‌نین اسفاری و بعضی آیری کیتابلاری، او گۆنلر« حاجی آغا روح الله الموسوی» آدی ایله تانینان اولان بیر فقیهین یانیندا اؤیرندی.

اونون آیری اوستادلاریندان دا آد چکه بیلریک؛ او جمله‎دن: آيت الله سيد محمد حجت کوه کمری تبريزی، آيت‌ الله سيد صدرالدين صدر اصفهانی(ره)، آيت‌الله شيخ عبدالنبی عراقی‌(ره) و حضرت آيت‌الله بروجردی (ره).

1322 هـ ش / 1363 هـ ق

ایکینجی روایت اجازه‌سی مرحوم «حاجی شيخ مرتضي تبريزي» - «چهرگانی»‌ـه مشهور - طرفیندن بو تاریخده صادر ائدیلیبدیر.

اوچونجو روایت اجازه‎سی آتاسی طرفیندن صدر اولونوبدور کی تاسفله متنی الده دئییلدی.

1326 هـ ش / 1367 هـ ق

دؤردونجو روایت اجازه‎سیمجتهده خانیم، سیده جلیله «علویه هاشمیه» طرفیندن، بو تاریخده صادر اولونوبدور. (نصرت امین خانیم (1265 ـ 1365 هـ ش)، سيد محمد علی امين التجار اصفهانی قیزی اؤز دؤرانینین الک مجتهد خانیمی اولدو).

1326 هـ ش / 1367 هـ ق

بئشینجی روایت اجازه‌سی آیت الله شئیخ عبد النبی عراقی (اراکی) طرفیندن صادر اولوندو. آیت الله قاضی یازار: "...سونرا او نجف اشرفدن قوما مهاجرت ائتدی و من یانیندا حاضیر اولدوم و شریف خطی ایله منه روایت اجازه‌سی صادر بویوردو».

1328 هـ ش / 1369 هـ ق

آلتینجی روایت اجازه‌سی و اجتهاد درجه‌سینی آیت الله سید محمد کوه کمری‌دن بو تاریخده آلدی.

آیت الله قاضی‌نین بو اوستادینا خاص ارادتی واردی؛ اؤزو یازدیغی کیمی بو اوستادینین تشویقی ایله نجفه عازم اولموشدور.

1328 هـ ش / 1369 هـ ق

اوستادی، آیت الله حجت کوه کمری تبریزی‎نین تشویقی و اصراری ایله تحصیلینه دوام ائتدیرمک اوچون نجفـه عازم اولدو.

او اوزون مدت قالماق اوچون سفر یۆکونو باغلاییب آرواد اوشاقلاری ایله او شهره گئتدی. حضرت علی‌نین مطهر مرقدی فیض منبعی ایدی. دیگر طرفدن، شیعه‌نین بؤیوک اوستادلارینین حضورو اقامت فیضینی یۆز قات ائدیردی.

او نجفین علمیه حوزه‌سینه گئدیب آیت الله کاشف الغطا(ره)(آیت الله قاضی اونون یانیندا منزلتی اولان نادر فردلردن ایدی)، آیت الله سید محسن طباطبایی حکیم(ره)، آيت‌الله سيد حسن بجنوردی(ره) و مرحوم آيت‌الله حاج ميرزا باقر زنجانی(ره)، آيت‌الله شيخ عبدالحسين رشتی(ره) کیمی، بویوک مرجعلرو آدلیم فقیهلر محضرینده تحصیل آلدی.

یئددینجی روایت اجازه‎سینی «المهدی» کیتابینین صاحبی اولوب «صدر» آدینا معروف اولان آیت الله سید صدر الدین صادر ائدیبدیر.

1329 هـ ش / 1370 هـ ق

سککیزینجی روایت اجازه‌سینی آیت الله میرزا محمد طهرانی عسکری بو تاریخده وئریبدیر.

آیت الله قاضی اونون باره‎سینده یازار: "اونو جلیل، بویوک و فقیه بیر کیشی ده‎یرلی بیر محقق، علم و عالم سئویب تحقیق وآگاهلیق اهلینی آغیرلایان و سوستلوق و جمود اهلیندن اوزاق گزن گؤردوم.

1329 هـ ش / 1370 هـ ق

دوققوزونجو روایت اجازه‌سی و اجتهاد درجه‎سینی آيت‌الله شيخ محمد حسين کاشف الغطا بو تاریخده صادر ائدیبدیر.

آيت‌الله کاشف الغطانین مبارزاتی دوشونجه‌سی آیت الله قاضی‌ـه مهم تأثیر ائتدی. او جمله‎دن اسراییل‌له دوشمنلییی شاگیردی سید محمد علی‌ـه ده قالدی.

1330 هـ ش / 1371 هـ ق

اونونونجو روایت اجازه‌سینی آيت‌الله سيد عبدالحسين شرف الدين عاملی‎دن آلیبدیر.

1331 هـ ش / 1372 هـ ق

آون بیرینجی روایت اجازه‌سی و اجتهاد درجه‎سینی آيت‌الله سيد محسن طباطبايي حکيم صادر ائدیبدیر. آیت الله حکیم و اونون خاندانی، عصریمیزده شیعه‌نین تقوالی، بؤیوک و پرهیزکار عالیملریندن اولوبدورلار. اونلارین علمی و مذهبی درجه‌لره صاحب اولمالارییلا برابر، سسیاسی و اجتماعی مسله‎لرده ده تأثیرلی ایدیلر. اونونلا آیت الله قاضی آراسیندا محکم رابطه واردی. او اسلامی نهضت جریانیندا قاضی طباطبایی‎دن کامل حمایت ائدیب اونون دالیندا دورار.

آیت الله قاضی‎نین اوندان ایکی مجوزی واردیر:

وکالت‎نامه 1372 هـ ق / 1331 هـ ش؛

اجتهاد اجازه‎سی و امور حسبیه‎ده وکالت‎نامه 1379 هـ ق / 1338 هـ ش.

1331 هـ ش / 1372 هـ ق

اقامتی و تحصیله باشلاماسیندان اۆچ ایل گئچمه‎دن دوشمنلرین دسیسه‌سی و بعضی یاخین قوهوملارینین خیانتینه گؤره، جَدی، حضرت علی‌نین مطهر حرمینین جوارینی ترک ائتمک مجبوریتینده قالدی.

اونون نجف اشرفده قالماسی قومدا قالماسینا گؤره، چوخ آز اولسا دا، بو اوچ ایلده فیقه و اصول بویوکلرینین محضریندن ائتدییی استفاده چوخ بویوک و برکتلی ایدی. بویوک مرجعلردن آلدیغی اجازه‎لر بو سؤزو تأیید ائتمکده‎دیر.

آیت الله قاضی طباطبایی آنا یوردونا قاییتدیقدان سونرا؛ تألیف و تحقیقلرینه ادامه وئردی. او مقبره و شعبان مسچیدلرینین امام-جماعتلییینی عهده‎سینه آلدی.

1333 هـ ش / 1374 هـ ق

اون ایکینجی روایت اجازه‌سی و اجتهاد درجه‌سی آیت الله سید محمد جواد طباطبایی تبریزی طرفیندن صادر اولوندو.

1343 هـ ش / 1384 هـ ق

اون اۆچونجو روایت اجازه‌سی و وکالت‌نامه‌سینی آیت الله سید محمد هادی میلانی صادر ائدیبدیر. بو اجازه و امور-حسبیه‌ده وکالت‌نامه بو تاریخده وئریلیبدیر.

اون دؤردونجو روایت اجازه‌سی حضرت امام خمینی‌دندیر(ره). تأسفله بو اجازه نهضت گۆنلرینده ایتیب و ائله اونا گؤره ده آیت الله قاضی، آیت الله پسندیده‌یه بیر نامه گؤندریب اوندان ایسته‌ییر کی اونون اوچون امامدان(ره) آیری بیر روایت اجازه‌سی آلسین.

بو اجازه‌نین امام طرفیندن صادر اولماسی اونون شاگیردلرینین آذربایجانداکی مبارزه‌لرینین تأییدی معناسینا گلیر.

1343 هـ ش / 1384 هـ ق

اون بئشینجی روایت اجازه‌سی و اجتهاد درجه‌سی آیت الله میرزا حسن بجنوردی طرفیندن صادر اولونوبدور.

1348 هـ ش / 1390 هـ ق

اون آلتینجی روایت اجازه‌سی و وکالت‌نامه‌سی آیت الله سید ابو القاسم خویی‌دندیر. بو هم روایته اجازه هم ده اونون وکالت‌نامه‌سینین آذربایجاندا تعیینیدیر. 

1348 هـ ش / 1390 هـ ق

اون یئددینجی روایت اجازه‌سی آیت الله سید محمد رضا گلپایگانی‌دندیر کی هم روایت اجازه‌سیدیر و هم امور-حسبیه‌ده وکالت‌نامه.

1348 هـ ش / 1390 هـ ق

اون سکیزینجی روایت اجازه‌سینی آیت الله سید شهاب الدین مرعشی نجفی صادر ائدیبدیر کی هم روایت اجازه‌سیدیر هم ده حاکیم-شرع اجازه‌سی ایسته‌ین ایشلرده وکالت.

1348 هـ ش / 1390 هـ ق

اون دوققوزونجو روایت اجازه‌سی آیت الله سید محمود شاهرودی‌دندیر کی بو ایلده صادر اولونوبدور.

ییرمینجی و سونونجو روایت اجازه‎سینی عمی‌اوغلوسو و بؤیوک اوستادی، قرآنین بویوک مفسّری، علامه سید محمد حسین طباطبایی (ره) صادر ائدیبدیر. بو ایکی عمی‌اوغلو آراسیندا هله قوهوملوق رابطه‎سی قالسین، درین اوستاد-شاگیردلیک رابطه‌سی واردی. علامه طباطبایی سیاسی صحنه‌ده فعال اولماسا دا راهنمالیقلارییلا اونو قومون جریانلاریندان آگاه ائدردی.