اینقیلابین موعظم رهبری دولت
اعضاسی‌نین گؤروشونده تأکید ائله‌دی
چوخ ایشله‌ینه مشهور اولان
دولت خیدمت فورصتینی آخیر لحظه‌یه‌جن حیفظ ائله‌سین/ باهالیق و خرید قودرتین
آزالماسی علاج اولمالیدیر.
اینقیلابین موعظم رهبری دولتین
بعضی قَوی نوقطه‌لرینی سایماغینان, موقاویمت ایقتیصادینی اؤلکه‌نین قاباغا
گئتمه‌سی‌نین تکجه یولو بیلدی و میلّی اینسیجام و وحدته تأکید ائله‌ماغینان
آرتیردی: مسؤولیتلرین حوزه‌سی موشخصدیر, قوّه‌لرین اوچو ده هماهنگ عمل
ائله‌مه‌لیدیلر.
موعظم رهبری مقامین ایطلاع رسانی
سایتی‌نین گوزاریشینه گؤره, ایسلامی اینقیلابین موعظم رهبری حضرت آیت الله خامنه ای
پنجشنبه گونو رئیس جومهور و دولت اعضاسی‌نین گؤروشونده دولتین بعضی قَوی
نوقطه‌لرینی سایماغینان, موقاویمت ایقتیصادینی اؤلکه‌نین قاباغا گئتمه‌سی‌نین تکجه
یولو بیلدی و تأکید ائله‌دی: دولتی و غیر دولتی بخشلرین بوتون ظرفیتلریندن
ایستیفاده ائله‌ماق, جماعتین معیشت موشکوللرین حلّی اوچون جیدی تصمیم, ایقتیصادی
مفسده‌لرله موباریزه, میلّی تولیددن حیمایت و ایسرافینان موباریزه, موقاویمت
ایقتیصادی‌نین لازیمه‌لریدیر.
اونلار بو گؤروشده شهیدلر رجائی و
باهنر و هابئله عراقی‌نی یاد ائله‌ماغینان بو عزیزلردن یاد ائله‌ماغی اینقیلاب
دیالوگون و شهادت ارزیشینی دیری ساخلاماق سایدی.
اینقیلابین رهبری دولت هفته‌سینی,
موجریّه قوّه‌سی و مسؤوللار و اورگانلارین ایشله‌ینلریندن تشکور ائله‌مک اوچون
فورصت بیلدی و آرتیردی: بو هفته علاوه بر بوکی گوزاریش وئرماق و جماعتی دولتین
فعالیتلری‌اینن تانیش ائله‌ماغا بیر فوصتدیر, موجریّه قوّه‌نین داخیلی ارزیابلیق و
گوج و ضعیف نوقطه‌لرین آراشدیماسینا بیر فورصتدیر.
حضرت آیت الله خامنه ای خیدمت
فورصتی‌نین یئیین کئچمه‌سینه ایشاره ائدیب, دولت اعضاسینی اونونجو دولتدن قالان بیر
ایلی غنیمت سایماسینا توصیه ائله‌دی و بویوردو: بو بیر ایلده ده چوخ موهوم و بؤیوک
ایشلر گؤرمک اولار.
او حضرت, دولتین دؤردونجو فعالیت
ایلینی ایکی داخیلی و خاریجی جهتدن موهوم ساییب و آرتیردیلار: ایستیکباری قودرتلر
بوتون گوجلرینی ایرانین دالی اوتورماسینا ایشه سالیبلار کی دولت‌ده گرک بوتون
گوجونو و ظرفیتینی ایشه سالماغینان و قاباغا گئتمه‌نی ایدامه وئرماغینان دوشمنین بو
باطیل خیالینی بیر-بیرینه وورا.
او حضرت, اونونجو دؤلتین
آخیر ایلینی‌ده ایشلرین شیرازه‌سین باغلاماق جهتیندن‌ده موهوم بیلیب و وزیرلره
تأکید بویوردولار: سیز چوخ ایشله‌ماغا مشهورسوز بو خاصیتی, جیدیتله فورصتین آخیر
لحظه‌لرینه‌جن, جماعت و اؤلکه‌یه خیدمت ائتمک اوچون ساخلایین.
حضرت آیت الله خامنه ای
صؤحبتلرین آیری بؤلومونده بعضی موشکوللره ایشاره ائدیب آرتیردیلار: بو موشکوللرین
چوخو ضعیف و متوسیط طبقه‌نین معیشتلرینده اولان چتینلیقلارا قاییدیر کی گرک اونو
آرادان گؤتورماق اوچون جیدّی صورتده هیمّت و برنامه اولسون.
او حضرت, موجود موشکوللرین
ریشه‌سی باره‌ده بویوردولار: بو موشکوللرین بعضیسی باهالیقدان گلیر البته بیزیم
اؤلکه‌ده کالا آزلیغی یوخدور آما باهالیق و جماعتین خرید گوجونون آزلیغی گرک علاج
اولسون کی بو زمینه‌ده بوتون سیتادی و عملیاتی بخشلر مسؤولدولار.
اینقیلابین رهبری بونا
ایشاره ائله‌ماغینان کی دولتین داخیل و خاریجینده‌کی نظر صاحیبلری نقدینه‌لیغین
چوخالماسینی ایندیکی موشکوللرین ریشه‌سی بیلیرلر, تأکید بویوردولار: گرک تجروبه و
علم و هم‌فیکیرلیغا دایانماغینان نقدینه‌لیغی کونترول ائله‌ماغا بیر چاره تاپاسیز و
ایضافه اولموش نقدینه‌لیغی تولید مرکزلرینه هیدایت ائلیه‌سیز.
حضرت آیت الله خامنه ای
ایقتیصادی مفسده‌لرله موباریزه‌نی سالیم سرمایه‌دارلارین ایستیقبالی و ایقتیصادی
رونقه سبب بیلیب آرتیردیلار: گرک ایتی گؤرن, نارین گؤرن و اوزاق گؤرن گؤزله
ایقتصادی مفسده‌دن موغایات اولاسیز و اونونلا موباریزه ائلیه‌سیز کی بو زمینه‌ده
دولت و قضایی دستگاهین همکارلیغی ضروریدیر.
تولیددن حیمایت, موشکوله
دایانان کرخانالار و ایقتیصادی واحیدلره یئتیشماق, کیچیک و متوسیط واحیدلری فعال
ائله‌ماق, ارزی منبعلری مودیریت ائله‌ماق و میلّی تولیددن هر طرفلی حیمایت
ائله‌ماق, اینقیلاب رهبری‌نین دولته تأکیدلی توصیه‌لریندن ایدی.
او حضرت موقاویمت
ایقتیصادیندا ایسرافینان موباریزه‌نی‌ده موهوم ساییب و آرتیردیلار: بو زمینه‌ده, هم
فرهنگ یارادان دستگاهلار مخصوصاً صدا و سیما و هم ایجرایی دستگاهلار
مسؤولدولار.
حضرت آیت الله خامنه ای
دولتین صرفه‌جویلوغا دیقّت یئتیرماغیندان ریضایتین بیلدیریب آرتیردیلار: میلّی
تولیددن ایستیفاده ائله‌ماغی جیدّی صورتده ایش برنامه‌سینده قرار وئرین و
اورگانلاردا خاریجی کالالارین مصرفینی قدغان ائدین.
اینقیلاب رهبر, فرهنگی
زمینه‌لرده سطحی ایشلردن پرهیز ائله‌ماغا و درین ایشلره دیقّت یئتیرماغا توصیه
ائدیب بویوردولار: کامیلاً موغایات اولون کی موهاجیم فرهنگ, عمومی فرهنگه صدمه
وورماییب اونو تأثیر آلتینا آلماسین.
اینقیلاب رهبری‌نین رئیس
جمهور و وزیرلریه آخیر توصیه‌سی بو ایدی: آللاه اوچون ایشله‌یین و بیر لحظه‌نی ده
جماعت و نیظاما خیدمت ائله‌ماق اوچون الدن وئرمه‌یین. هئچ کس‌ده گؤمه‌سه آللاه
گؤرور و بوتون بوفعالیتلره موضاعف پاداش وئرر.