یئددینجی هیجری قمری ایلین
بؤیوک عاریفین یاشاییشی و احوالاتی
شیخ شهاب الدین محمود اهری 580 هیجری
قمری ایلین شعبانین اون بئشینده اهرده دونیایا گؤز آچدی و صرف و نحو تحصیلاتینی ملا
حسن اهری‌نین محضرینده اؤیرندی. او 25 یاشی اولاندا تحصیلاتی‌نین تکمیلی اوچون
تبریزه گئتدی و شیخ رکن‌الدین سجاسی‌نین حضوروندا علم و فیض کسبینه باشلادی و
قوطبلوق درجه‌سینه چاتاندان سونرا اوستادین امری‌اینن اؤز وطنینه
قاییتدی.
دوغوم یئری
دهخدا لوغتنامه‌سی و رحمتلیق
کاشفی اهری و نئچه آیری منبع, اونون دوغوم یئرین اهر شهری یازیبلار. و بوتون
موحقیقلر و مؤلیفلر اونو تبریزی اهری آدی‌اینن تانی‌ییبلار. حضرت شیخ اؤزونو
قره‌داغلی تانیتدیریب.
اوشاقلیق, جوانلیق,
تحصیل
حضرت مولانا شیخ شهاب‌الدین
اهری اوشاقلیقدا موتّقی آناسی معصومه سلطانین خاص دیقّتی‌اینن تربیت اولدو و آتاسی
میرزا احمد, اوشاقلیق یاشلاریندان اونا قورآن اؤرگتدی و او 10 یاشیندا قورآنی
ازبرله‌دی. سونرا 14 یاشاجن کرامتلی عالیم ملا حسن اهری‌نین محضرینده عربی
قایدالاری و ساییر علملری اؤرگشدی.
او معلوماتین تکمیلی اوچون
25 یاشیندا ایکن تبریزه گئتدی و سورخاب محله‌سینده کی «وحدتیه» مدرسه‌سینده اؤز
تحصیلاتین تکمیل‌لتدی و بو مدرسه‌ده اوچ چیلله ریاضت چکدی.
ریاضتلر
حضرت شیخ عشق‌نامه
مثنوی‌سینده ریاضتی, نفس‌اینن موباریزه و ازلی معشوقا چاتماق اوچون لازیم
بیلیر.
شیخ شهاب الدین اوستادی شیخ
رکن‌الدین سجاسی‌نین محضرینه چاتداندان سونرا اونون امری‌اینن اوچ چیلله ریاضت چکدی
ائله کی دریسی موبارک بدنیندن آیریلیردی. ریاضت قورتولاندان سونرا اوستادی
سجاسی‌نین یانینا گئتدی و شیخ اونو تحسین ائله‌دی و بویوردو کی «خاصلار قیرخ ایل
گئدن یولو, سن بو قیسا مودّتده گئتدین. آللاه سنه توفیق وئریب.» و بئله‌لیغینان شیخ
طرفیندن قاییم مقاملیق و مورشیدلیق درجه‌سینه تعیین اولدو.
چیلله ساخلاماق عاریفلرین
خاص عمل‌لریندن‌دیر کی پیغمبردن(ص) ریوایت اولان بیر حدیثه گؤره اینسانین کمالینا
کؤمک ائدر:
من اخلص لله
اربعین صباحآ ظهرت ینابیع الحکمه من قلبه علی لسانه .
(مناقب اوحدالدین ،ص 74 )