حماس جونبيشي‌نين سياسي
دفتر رئيسي و فلسطين خودگردان تشكيلاتي‌نين رئيسي، ژوئن آيين آلتيسيندا (17 خرداد)
تازا فلسطين دولتين تشكيل وئرمك اوچون گؤروشه‌جكلر. خبري اولان بير مصرلي منبع
دئدي: محمود عباس و خالد مشعل ژوئنين آلتيسيندا تازا فلسطين دولتين تشكيل وئرمك
اوچون گؤروشوب موذاكيره ائده‌جاقلار و قراردي بو گؤروش قاهره‌ده اولسون و موستقيل
تكنوكرات شخصيتلرين بير نئچه‌سي‌ده بو موذاكيره‌ده حاضير اولاجاقلار.
بو بير حالدادير كي حماس
سياسي‌دفتري‌نين بير عضوي اعلام ائله‌دي كي فتح و حماس هيئت‌لري‌نين موذاكيره‌لري
ميلّي دولتين تشكيلي اوچون قاهره‌ده باشلاييب.
«سامي خاطر»، «الحيات» روزنامه‌سيله دانيشيقدا دئدي كي
دانيشيقلار حماس هيئتي بو جونبيشين سياسي دفتر رئيسي‌نين موعاويني «موسي
ابومرزوق»ون باشليغي‌اينن و فتح هيئتي بو حونبيشين مركزي كوميته‌سي‌نين عضوي «عزام
الاحمد»ين باشليغي‌اينن، دونن باشلاييب.
او، دولتين تشكيل تاپماسينا حماس طرفيندن هر جور پيش شرطين
اولماسيني رد ائله‌دي و آيدينلاتدي: وزيرليق پوستلاري اوجومله‌دن باش وزيرليق كيمي
اساسي پوستلار توافوقي حالتده بؤلونه‌جاق و موستقيل و تكنوكرات شخصلرين آدلاري بو
پوستلار اوچون نظرده آليناجاق. او دئدي: 10 گوندن آرتيق اولمايان بو دانيشيقلارين
آخيرينده، ميلّي وحدت دولتين تشكيلي اعلام اولاجاق.
او هابئله خاطيرلادي كي غزه‌ده اينتيخاباتين مركزي كوميته‌سي
ايشيني تازادان باشلاييب و اينتيخاباتين برگوزار اولماسي اوچون رأي وئرنلرين آد
يازديرماسي باشلاييب.
موحاصيره‌نين فوراً لغو اولماسي
آيري طرفدن، غزه نواري ساكينلري‌نين بهداشتي وضعلري‌نين
چتينليغي و كؤمك يئتيرمه‌نين چتين اولماسينا گؤره بين‌الميللي بهداشت سازماني،
صهيونيستي رژيم طرفيندن غزه نواري‌نين موحاصيره اولماسيني محكوم ائديب و بو
موحاصيره‌نين هر نه تئزراق قورتولماسيني ايسته‌ييب.
بين‌الميللي بهداشت سازماني‌نين تصويب ائله‌ديغيندا غزه‌نين
صهيونيستي رژيم طرفيندن موحاصيره اولماسي محكوم اولوب.
بو مصوبه‌ده كي 56 موافيق، 6 موخاليف و 48 مومتنيع رأي‌اينن
72 اؤلكه‌نين غيابيندا تصويب اولدو، صهيونيستي رژيمدن ايسته‌نيليب كي هر نه تئزراق
غزه‌نين موحاصيره‌سينه سون قويسون، نييه كي بو منطقه‌نين موحاصيره‌سي طيبّي كؤمكلر
و داوالارين حددن آرتيق آزليغينا سبب اولوب.
تجاووزونن موقابيله
هابئله عرب ايتحاديه‌سي‌نين فلسطين و ايشغال اولموش اراضي
ايشلري‌نين دبير كول موعاويني، عرب اؤلكه‌لريندن ايسته‌دي صهيونيستي رژيمين
تجاووزلرينه سون قويماق اوچون جيدّي ايشلر گؤرسونلر.
«محمد صبيح» عرب اؤلكه‌لريندن ايسته‌دي آمريكا و دونيا
دولتلري قاباغيندا جيدّي ايشلر گؤرسونلر و بين‌الميللي جاميعه‌يه گروهي پيام
وئرسينلر كي داها عربلر باريشما گئديشي‌نين راكيد قالماسي و شهرك دوزلتمه‌نين
ايدامه تاپماسينا قبول ائله‌ميرلر.