محمد مورسی مصر رئیس جمهوری، اقتدارا چاتماغی‌نین بیرینجی ایل دؤنومونده سخنرانلیق ائله‌دی و حکومتی‌نین بیرینجی دوره‌سینده اشتباهلاری‌نین اولدوغونو و اونلارین اصلاح ائله‌مه‌سی‌نین لازم اولدوغونو دئدی.
مورسی دئدی: 2011-جی ایلین ژوئن آییندان اقتدارا چاتاندان بیر سئری ایشلر گؤروب کی اونلارین بعضیسی دوز دئییلدی آما اونلارین اصلاحی ممکندیر.
او مصرین سیاسی صحنه‌سی‌نین قطب‌لنمه‌سینه اشاره ائدیب دئدی: بو مسأله مصر اؤلکه‌سی‌نین ثباتینی آرادان آپارار و دموکراسینی تهدید ائلر.
مصر رئیس جمهوری دئدی: هر انقلابین دشمنلری و بوتون ملّتلرین چتینلیقلاری وار و مصر جماعتی و انقلابی دا بو مسأله‌دن استثنا اولمور.
مصر رئیس جمهوری، چوخونو جوانلار تشکیل ائدن اعتراضچیلاری آراملاتماق اوچون دئییردی: بوتون وزیرلر و استاندارلارا امر ائله‌میشم مشکللره سبب اولان مسئوللاری ایشدن برکنار ائله‌سینلر و اؤزلرینه 40 یاشدان آشاغی اولان جوان معاونلر سئچسینلر.
بو سخنرالیق قورتولاندان سونرا مصرین مختلف یئرلرینده مخصوصاً «المنصوره» و «الشرقيه» شهرلرینده، اونون (مورسی‌نین) طرفدارلار و مخالفلری آراسیندا ووروشما باش توتدو کی یوزلر نفرین اؤلوب یارالانماسینن نتیجه‌لندی.
«روسيا اليوم» شبکه‌سی 5 نفرین اؤلمه‌سی و 237 نفرین یارالانماسیندان خبر وئردی.