تبيان مؤسيسه‌نين موديري، بو مجموعه‌نين سايتيني ديني و
فرهنگي موضوعلاردا اؤلكه اينترنت ايشله‌دنلرين اصلي مرجعي اعلام ائله‌دي.
شرقي آذربايجان ايسلامي تبليغات كولّ ايداره روابيط
عوموميسي‌نين گوزاريشينه گؤره، دوكتور عليرضا طالب‌پور اوستانين ايسلامي
تبليغاتيندان گؤروشوب تبريز تبياني‌نين فعاليت نحوه‌سينن تانيش اولان زمان بو
مطلبي دئمگينن آرتيردي: بو مجموعه مؤحتوا، ايشله‌دن، فني زير ساختلار و آيري
مساييلده دئمگه اساسي سؤزو وار.
او ايظهار ائله‌دي: اينديليكده تبيان، موخاطبلرين ايچينده
اؤز يئرين تاپيب موختليف زمينه‌لرده و كارشيناسي نظرلر اوچون بير مرجع ساييلير و
البته بو يولون ايدامه وئرمه‌سي فيكرينده‌ييك.
طالب‌پور بوتون ايشله‌دنلره مونسجيم كونسرسيوم قاليبيندا
سرويس وئرمگي تبيانين تازا تجروبه‌لريندن ساييب و دئدي: ايندي‌ده چاليشيلير تا فني
نظردن لازيم اولان توسيعه‌لره ال تاپيلسين.
تبيان مؤسيسه‌نين موديري بو نَويدي وئرمگينن كي گونده‌ليك
آلتي-يئتدي يوز مين نفر بو سايتدان گؤروش ائديرلر، دئدي: ايندي تبيان هاستي‌نين
يوخاري كئيفيّته ماليك اولماسينا گؤره، اؤلكه‌نين بوتون ايجرايي دستگاهلار و
سازمانلاري‌نين ميزبانليغينا آماده‌ليگيميز وار.
طالب‌پور تبيانين اصلي هدفين جوانلاري مجازي فضادا جذب
ائديب آموزش وئرمه‌سي بيليب و آرتيردي: اينديه‌جن بير ميليارد ايشه‌دن بو سايتدان
گؤروش ائديب و بو ساييني آرتيرماق اوچون گرك اونلارين گيراييش و ايستكلرينن تانيش
اولوب لازيم اولان زمينه‌ده مطلب توليد ائدك. او موخاطبلره 40 جوردن آرتيق تربيتي،
عقيده‌تي و خبري موضوعلاردا موشاويره وئرمگي تبيانين آيري خيدمتين ساييب اعلام
ائله‌دي: بيزيم يئددي يوز مين نفر داييم عضوموز وار كي 35 مين‌نفر ايرتيباطلارين
ساخلاييبلار.
طالب‌پور اوستانلارين تبياني باره‌ده دئدي: گرك موشترك ايش
جلسه‌لري قويماغينان مركزلرده موحتوالي مطلب توليد ائله‌مك ظرفيتلري تانينا و
عملياتي اولا.
تبيان مؤسيسه‌نين موديري هابئله آرتيردي: اوستان موقعيتينه
گؤره فايدالي مطلبلرين ايرايه‌سي، اوستانين خبرلري و تاريخي و فرهنگي زمينه‌لرده
شبكه صورتينده آيري اوستانلارينان همكارليق ائله‌مك اولار.
طالب‌پور تبريز تبيانين ايشين چوخ عالي بيليب و دئدي: بو
اوستاندا موهوم ايشلر گؤرولوب كي او بيري اوستانلارا ياخشي اولگو اولا بيلر.
اوستان تبيانين مسؤولو آقاي مجتهدي‌ده بو گؤروشده اوستانين
ايشلريندن بير گوزاريش وئريب دئدي: تئزليگينن اوچ شهريستان مراغه، مرند و اهر
تبيان فرهنگي اينترانت سيستيمينه موجهّز اولاجاقلار و ائليه‌بيله‌جكلر اوچ‌يوزدن
آرتيق فرهنگي و خبري سايتدان موفته صورتده ايستيفاده ائله‌سينلر.