آيت الله
علامه محمد تقي جعفري نين اؤلومو 1377 جي هيجري شمسي ايلينده.
اوستاد علامه
محمد تقي جعفري(ره) نين ياشاييشيندان خولاصه
اوستاد علامه
محمد تقي جعفري(ره) 1304-جو ايلده تبريزده دونيايا گؤز آچدي و تبريز، تهران، قوم و
نجف اشرف شهرلرينده ايسلامي علملرين عالي تحصيلاتيندان سونرا بؤيوك عاليملرين
محضرينده او جومله دن آيات عظام، ميرزا فتاح شهيدي، شيخ محمدرضا تنكابني، شيخ كاظم
شيرازي، سيد عبدالهادي شيرازي، سيد ابوالقاسم خويي و سيد محسن حكيم كيمي بؤيوكلردن
فئيض آپاردي. اينديه كيمي اوستادين اثرلريندن 80 اثر چاپ اولونوب و اونلارين
بعضيسي نين چاپي مثنوي شرحي كيمي كي 15 جيلدده نئچه دفعه تجديد چاپ اولوب. هابئله
اونلارين نيظارتي آلتيندا 12 ايل بويوندا مولانا مثنويسي نين كشف الآياتي 4 جيلدده
«دريادان دريايا» عونوانيندا يايليبدير.
اوستادين
گؤركملي اثرلريندن نهج البلاغه شرح و تفسيريدير كي 27 جيلدده چاپ اولوب. اوستاد
جعفري نين آيري نفيس اثري مولانانين دوشونجه لري، شرق و غرب جهانبيني و فلسفه لري
نن موقاييسه سي زمينه سينده دير كي «مولانا و جهانبيني لر» عونوانيندا چاپ اولوب.
اينسان حاقلاري
و اونون ايسلامدا اولان اينسان حاقلاري نن موقاييسه سينده، موفصّل و شرحلي كيتاب
اوستادين قلمي اينن مونتشير اولوب كي اونون تازا نظرلري ايسلامي كونفرانسدا مطرح و
ايستيفاده اولوب. بو كيتاب اينگيليسي ديلينه ترجومه و چاپ اولوب و ژاپوني ديلينه
ده ناكويا دانيشگاهين اوستادلاري نين بيرينين اليله ترجومه اولماقدادير.
اوستاددان 60
دان آرتيق كيتابدا هله چاپ اولماييب و گله جاقدا چاپ اولاجاق. كي بو ترتيب اينن
چاپ اولماميش اثرلري 150 عونوان اولور. اوستادين كيتابلاري بو زمينه لرده ديلر:
فيقه ، سياسي علملر ، روانشيناسي، تربيتي علملر ، ايسلامي معاريف، ايسلامدا هونر و
گؤزلليك نظريه سي، فلسفي و كلامي بحثلر كي دولودور تازا و بديع نظريه لري نن.
دونيانين
باشا باشيندان اونلارجا اوستاد و دوشونجه صاحيبلري اوستاد جعفري نن علمي موذاكره
لري واريدي كي بو دانيشيقلارين 50دن چوخو 2 جيلد كيتابدا «دوشونجه لر تكاپوسو»
آديندا ياييليب.
ذيكر ائتماق
لازيمدير كي علامه جعفري نين مشهور اينگيليس فيلسوفو برتراند راسل اينن اولدوغو
علمي موكاتيبه لر، كي اوستاد جعفري راسلين بعضي نظرلرينه اينتيقاد ائديب،
كيتابلاري نين بعضي سينده مثلاً «راسلين دوشونجه لرين آراشديرماق» كيمي كيتابلاردا
تيكرارلي اولاراق چاپ اولوب. هابئله اوروپانين بؤيوك فيلسوفلارندان اولان، رياضي
منطيقي نين آتاسي «آلفرد نورت وايتهد» ين نظريه لريني تحليل و نقد ائدن بير كيتاب
«دوشونجه لرين سرگوذشتي نين نقد و آراشديرماسي» عونوانيندا اوستاددان چاپ اولوب.
غربين
موعاصير پوزيتيويستي و نئوپوزيتيويستي فلسفه سي نين تحليل و نقدينده اولان نئچه
كيتاب دا يايليب. كي او جومله دن« كانت» ، «هگل» ، « دكارت» و« ديويد
هيوم»ون نظريه لري نين شرح و نقدينه ايشاره ائتمك اولار.
فقيد اوستاد
علامه محمد تقي جعفري (ره) نوخوشلوق اثرينده 25/8/1377 ده آللاهين رحمتينه قووشدو.
روحو شاد و يولو گئدرلي اولسون.