انقلابین معظم رهبری «یاخجیلیقلار قوشونو» کتابی‌نین ایشله‌ینلری اینن گؤروشده بویوردولار: مقدس دفاعنین عظمتلی صحنه‌لری یاددان چیخاریلمامالیدیر.

حضرت آيت الله العظمي خامنه‌اي‌نین حفظ و نشر سایتی‌، انقلابین معظم رهبری‌نین بو کتابین راوی، یازان و ایشله‌ینلرینه دانیشیقلارینی منتشر ائله‌دی.

بو دانیشغین متنی بئله‌دیر:

... انشاءالله، الله مقدّس دفاع زمانیندا بو زحمتلری چکن سیز عزیز قارداشلارا اجر وئرسین و انشاءالله سیزین عزّتیزی –هم دنیادا و هم آخرتده- آرتیرسین، هم آقای رضایی‌یه بو کتابی روایت ائله‌دیغی اوچون و هابئله خانم سپهری‌یه اونو یازماق اوچون اجر وئرسین. هم روایت یاخجی ایشدیر و اونون یازماسی چوخ ممتازدیر. بو خانم اوّل‌لر نورالدّین کتابینی یازمیشدی؛ بو قلملرین حقیقتاً چوخ دَیَری وار. بنده انقلاب ادبیّاتی‌نین بو برجسته و شیوا پدیده‌لرینه راست گلنده الله-ـا شکر ائلیرم. دوغرودان دا شکر یئری وار.

مقدّس دفاع قضیه‌لری‌نین هر بیری برجسته‌دیر. یعنی حقیقتده انسان داها چوخ جومدوقجا، داها چوخ دقّت ائله‌دیقجا، داها چوخ مطلع اولدوقجا بو مهم حادثه‌نین عظمتی گؤزلری اؤنونده داها چوخ آیدینلاشیر. بیز او وقتلر جریانلاردا اولوردوق، فرماندهلر گلیب خبر وئریردیلر، بیز بئله خیال ائلیردوق کی هر شئیی بیلیروق، آما آدام بو کتابلاری اوخویاندا معلوم اولور کی او جهاد و چالیشمانین عظمتلی اقیانوسوندان چوخ آزینی بیلیردوق. حقیقتاً چوخ فوق العاده‌دیر.

اوّل‌لر آیری نئچه کتاب‌دا واریدی کی اوخوموشدوق. بو خانم یازان «یاخجیلیقلار قوشونو» کتابی، عاشورا لشکرینه گؤره‌دیر. چوخ یاخجی کتابدیر، چوخ؛ بو جهتدن‌ده اهمیّتی وار خصوصاً اطلاعاتچی و غواّص نیرولاری باره‌ده یازدیغینا گؤره. چونکی اطلاعاتچیلار دانیشمازلار کی؛ «دئییبلر دئمه‌یین» [اصلینی رعایت ائلرلر]. بونا گؤره بونلاردا اولان مطلبلر و اطلاعات معمولاً بو ایللر بویوندا قویولانیب؛ بونلار آچیلسین، آیدینلاشسین. غوّاصلارین جریانی‌دا حقیقتاً عجیب غریب جریاندیر. بو کتاب چوخ گؤزل تشریح اولوب. یازانلارین لاپ بؤیوک هنرلری‌نین بیری، حساس صحنه‌لری ترسیم ائله‌ماقدیر.

بو کتابدا دا حسّاس لحظه‌لر آز دئییل. خصوصاً غوّاصلار و ایشلری‌نین تصویره چکیلمه‌سی، خصوصاً حاج صمدین «غوّاصلار» شعری، بو مضمونو بیلنلر اوچون چوخ تأثیر قویور. هم دئین یاخجی دئییب هم ظاهراً بو حاج اصغر آقاى مدّاح زنجانى بونو چوخ یاخجی اوخویوردو: لاى لاى اى جبهه‌لرين يورغونى / اى خسته جوان‌لار ... لاى لاى اروند كناريندا /  قيزيل قانه باتانلار.