«علامه امینی»‌نی «الغدیر» کتابی اینن تانییروق. بو عظمتلی کتابی یازماق اوچون مختلف سفرلرین رنجینی جانینا آلان عالم کی شیعه و سنّی روایتلرینه و سندلرینه استناد ائله‌ماغینان غدیر خم واقعه‌سینی یازماغا، 10 مین حدیث کتابینی اوخودو.

امیرالمؤمنین (ع) حرمی‌نین قبله قاپیسیندان چیخاندا «شارع الرسول» خیابانینا چاتیرسیز. بو خیابان اؤزونده شیعه‌نین معاصر تاریخی اندازه‌سینده عظمتلی خزانه‌لر یئرلشدیریب. امام خمینی‌نین (ره) ائوی و آیت الله حکیمین (ره) مزاریندان توتدو علامه امینی‌نین (ره) کتابخاناسی و مزارینا قدر.

علامه امینی‌نی داها چوخ سلیس عرب دیلینده 20 جلدده یازیلان عظمتلی کتابی، «الغدیر»اینن تانیروق. او بو کتابی یازماق اوچون 24 ساعتین 17 ساعتینی گئجه گوندوز مطالعه‌یه صرف ائدیب. او الینده اولمایان کتابلاری اوخوماق اوچون مختلف سفرلرین رنجینی جانینا آلیب.

علامه امینی بو کتابین یازماسیندا اوزلشن چتینلیقلارا اشاره ائدیب دئییر: «من الغدیر کتابینی یازماغا 10 مین کتابی بسم الله‌-ین «باء» سیندان تمّت‌-ین «تاء»سینا قدر اوخودوم و 100 مین کتابا تکراراً باش ووردوم».

شبهه‌سیز بو بؤیوک کیشی‌نین یوخاری همّتیندن علاوه بو عظمتلی اثرین یارانماسیندا آیری عامللر ده واریدی. علامه امینی و اطرافینداکیلاردان تکراراً نقل اولوب کی هر واخت بو کتابین یازماسیندا چتینلیغا راست گلیردی، حضرت علی‌(نین) حرمینه پناه آپاریدی و عالمی ایشیقلاندیران گونشدن کؤمک ایستیردی.

بو ربّانی عالم، هجری قمری ایلین ربیع‌الثانی آیی‌نین 28-ده جمعه گونو (1349 شمسی 12 تیر) فانی دنیادان کؤچدو و مطهر جسدی مولاسی حضرت علی (ع) کناریندا تورپاغا تاپیشیریلدی.