ثقةالاسلاما معروف اولان ميرزا علي آغا تبريزي 1239-جی شمسی ایلینده تبریزده دونیایا گلدی. او23 یاشیندا عالی عتباتا یوللاندی و شيخ محمد حسين فاضل اردكاني، ميرزا حبيباللَّه رشتي و شيخ زينالعابدين مازندراني محضرلرینده ایسلامی تحصیلاتینی تکمیل‌لشدیریب ایجتهاد درجه‌سینه چاتدی. ثقةالاسلام تبریزی سککیز ایلدن سونرا تبریزه قاییدیب دانیشیق و موعظه اینن جماعت افکاری‌نین هیدایتینده چالیشدی.
ایراندا صغیر ایستیبدادین باشا چاتماسی و مشروطه نیظامی‌نین قورولماسینن، تازا دؤور باشلامیشدی. میلّی شورا مجلیسی آمریکالی مورگان شوسری اؤلکه خزانه‌دارلیغینا ایستیخدام ائله‌ماغینان تزار روسیه اعتیراض ائدیب شیدّتلی اولتیماتومونان شوسرین ایخراجینی ایسته‌دی. بو زماندا مجلیسینن دولت آراسیندا چوخ موباحیثه اولدو بیر حالداکی روس قوشونو اؤلکه‌نین غرب و شیمال غربی‌نین بیر قیسمتینی ایشغال ائله‌دی.روس قوشونون تبریزه داخیل اولماسی اینن جماعتین چوخو اونلارین الینن قتل عام اولدولار و ثقه‌الاسلام چالیشیردی جماعتین قتل عامی‌نین قاباغینی آلسین.
روسلار نهایتده1290-جی شمسی ایلین دی آیی‌نین دوققوزوندا 1330-جی قمری ایلین موحرّمین تاسوعا گونونده ثقة الاسلامی توتدولار. اوندان ایسته‌دیلر اؤز مقام و جانی‌نین موقابیلینده تبریز موجاهیدلرینی جنگی باشلایان اعلام ائلیه آما او بو تقاضانی شیدّتینن ردّ ائله‌دی.
بئله‌لیغینان روسیه‌نین جینایتکار قوشونو بو موجاهید عالیمی اهانت و بوهتاندان سونرا بیر گون سونرا یعنی عاشورا گونو دارا چکیب شهادته چاتدیردیلار.
ميرزا علي آقا ثقةالاسلام فضیلتلی، صبیرلی و عین حالدا قورخماز و جسارتلی اینسانیدی. اؤز جماعتینه عشقی واریدی و ظالیملردن نیفرت ائدردی. جامیعه‌ده داخیلی ایختیلافلار اولان زمان چالیشیردی اونلاری بیر بیرینه یاخینلادا. ثقة الاسلام ادب ساحه‌سینده‌ده قودرتلی قلمی واریدی و تورک دیلیندن سونرا عرب و فارس دیللرینه موسلّط ایدی. مِرآةُ الكُتُب و مقتل سيد الشُّهدا بو اینقیلابی موجاهیدین اثرلریندندیر.