پروفسور محسن هشترودی
اسماعيل اوغلو 1286 گونش ايلين دي آيي‌نين 22 سينده هشترود شهرينده دونيايا گؤز
آچدي. ايبتيدايي تحصيليني اقدسيه و سيروس مدرسه‌لرينده آلدي و متوسيطه‌ني
دارالفنوندا اوخويوب عالي دانيش‌سرادان ليسانس درجه‌سين آلدي. سونرا درسين ايدامه‌سي
اوچون اوروپايا گئتدي، سوربون دانيشگاهيندان رياضي علملر ليسانسي و پاريس
دانيشگاهيندان علوم دوكتوراسي آلدي. 1315-جي ايلينده وطنه قاييديب و علوم دانيشكده‌سي
دانيش‌سراسيندا تدريسه مشغول اولدو. 1320-جي ايلينده تهران دانيشگاهي‌نين اوستادي
اولدو.
او فرانسه ديلينده
مهارتي واريدي و چوخلي كونفرانسلاردا فرانسه ديلينده صؤحبت ائليردي. او چوخلي بين‌الخالق
كونگيره‌لرده او جومله‌دن:1950 ده آمريكانين هاروارد دانيشگاهيندا اولان بين
الخالق رياضي كونگيره‌سي، 1954 ده آمستردامدا، 1958 ده اسكاتلندين ادينبورگوندا و
فرانسه‌ده لاتين ديللي رياضي عاليملري‌نين بين‌الخالق كونگيره‌سينده شيركت ائله‌دي.
پروفسور محسن هشترودی ايللر بويو كونفرانسلاردا، صؤحبتلرده و پرينسون دانيشگاهي‌نين
عالي موطاليعه‌لر انيستيتوسوندا، هاروارد دانيشگاهيندا، روماني علوم آكادمي‌سينده،
پنجاب دانيشگاهي و پوانكاره انيستيتوسوندا چوخلي خاريجي اوستاد و دانيشجولارا درس
وئرميشدير. اونون تحقيقلري هندسه ، کلاسیک فضایی هندسه ، دیفرانسیل موعاديله‌لري ،
عددلر نظریه‌سي ، آنالیز ، مکانیک و جبر زمينه‌سينده‌ايدي. پروفسور هشترودی‌نين
يوموشاق طبعي واريدي و اونون شعر مجموعه‌سي «سايه» آديندا چاپ اولوب.اونون
چاليشقان بئيني فلسفه و دوشونجه زمينه‌سينده ده گوجلو ايدي. اوندان قالان ايكي
«هونر و دانيش» و «دوشونجه دونياسي» كيتابلاري بو مودعانين شاهيدلريدير. نهايتده
او 1355-جي ايلين شهريور آيي‌نين 13 ده فاني دونيايا گؤز يومدو.