عفو بين الميلل سازماني كانادالي
مقاملاردان ايسته‌دي «جورج بوش» آمريكانين قاباقكي رييس جومهورون، ترورونان
موباريزه آدلانان جنگده، شيكنجه فرماني صادير ائله‌ماغا خاطير دستگير و موحاكيمه
ائله‌سينلر.
فرانسه خبرگوزاريسي‌نين «اتاوا» دان
نقل اولان گؤرايشينه گؤره، قراردي بوش اوكتوبرون 20-سينده بير ايقتيصادي
ييغينجاقدا كانادانين «سوري» شهرينده شيركت ائليه.
لندنده اولان عفو بين الميلل سازماني
بوشون حوقوقي مسووليّتينه نظر سالماغينان، اونون علئيهينه اينسان حقلرين نقض ائله‌ماغا
خاطير پرونده تشكيل وئريب و كئچن آي رسمي يازي ضيمنينده كانادا مقاملارينا
چاتديريب آما بو يازي ايندي روزنامه‌لرين الينه چاتير.
عفو بين الميلل سازماني‌نين آمريكا
منطقه‌سي‌نين مسوولي «سوزان لي»، بير بيانيه صادير ائله‌ماغينان دئدي: بين‌الميللي
تعهودلره گؤره كانادادان ايسته‌نيلير كي آمريكانين قاباقكي رييس جومهورونو حوقوقي
مسووليتلري و شيكنجه كيمي جورملره مورتكيب اولماغا خاطير، بين‌الميللي قانونلار
اساسيندا اونو دستگير و موحاكيمه ائله‌سين.
او آرتيردي: اوردان كي آمريكالي
مقاملار بوشو موحاكيمه‌يه چكنمه‌ييبلر؛ بين‌الميللي جاميعه گرك بو يولدا قدم
گؤتوره. اگر كانادا بو سفرين جريانينيدا اونو دستگير ائله‌يه بيلمه‌يه معلوم اولار
كي اينسانين اصلي حقلرينه ارزيش قاييل دئييل و ميلل موتحيد سازماني‌نين شيكنجه
علئيهينه اولان كونوانسيونوندان عودول ائله‌ييب.
عفو بين‌الميلل سازماني اعلام ائديب
كي بوش پيشرفته و خشين بازجويي رويشلردن ايستيفاده ائله‌ماق فرمانين وئريب. هابئله
بوغولماق حيسّيني ايلقا ائله‌ماق شيكنجه‌سي، 2002 دن 2009 ايللري آراسيندا اونون
فرماني‌اينن آمريكانين مركزي جاسوسلوق سازمانيندا حبسده اولانلارين اوستونده ايجرا
اولوب.
زينداني‌لرين بازداشت برنامه‌سي،
شيكنجه ، آيري غير اينساني و خشين ايشلره ال وورماق و هابئله توهين‌آميز رفتارا
شاميل اولوردو.
بو سازمان اؤز يادداشتيندا
توتولانلارين نئچه موريد «گووانتانامو» خليجينده و عراق و افغانيستاندا كي
نيظامي پايگاهلاردا آمريكالي نيظاميلارين الي‌اينن شيكنجه اولماقلارينا ايشاره
ائلير.