اینقیلابین عالی رهبری: بعضیلرینین غرض و یا سادهلوحلوق اوزوندن آمریکانین موذاکیره پیشنهادیندان سئوینماغینا ایشاره ائدیب دئدیلر: من دیپلومات دئییلم. من اینقیلابیم و سؤزو آچیق و دوز دئییرم، سیز (آمریکالیلار) سیلاحی ایرانین اوستونه توتورسوز و موذاکیره ائلهماق ایستیرسیز، ایران جماعتی بئله شئیلریدن قورخمایاجاق.
مهرین وئردیغی خبره گؤره، ایسلامی اینقیلابین عالی رهبرلیق مقامی حضرت آیت الله خامنه ای ارتشین هوایی نیرولار فرماندهلری جمعینده، آمریکالیلارین 34 ایل بویوندا جوربه جور تهدید و فیشارلارینان بئله موذاکیرهدن دانیشماسی آمریکالیلارین حوسن نیّتیلرینین یوخلوغوندان خبر وئریر و ایران جماعتینین هوشیارلیغینا و قورخماماغینا ایشاره ائدیب تأکید ائلهدیلر: ایرانین عزیز، بصیر و موقاویم جماعتی بهمنین ایرمی ایکیسینده مؤحکم صورتده میدانا گلهجاق و اینقیلابی و میلی حرکتده بیر داها دوشمنین، جماعتی نیظامدان آییرما توطئهسینی یاریدا قویاجاق.
بو گؤروش هوایی نیرولارین 1357-جی ایلین بهمنین اون دوققوزوندا ایمامینان (ره) بیعت ائلهدیقلاری گونون ایل دؤنومونده برگوزار اولدو.
اینقیلاب رهبری ایندیکی ایران جماعتین 34 ایل قاباغینان فاصیلهسینی چوخ بیلیب دئدیلر: ایران جماعتی بو 34 ایلده آیری جماعتلره اؤرگتدیلر کی بیگانهلر قاباغیندا دایانماق اولار و گرک دایانماق و آللاها توّکول ائلهماغینان موستقیل و باشی اوجا حرکته ائدامه وئرماق اولار.
حضرت آیت الله خامنه ای فجر دههسی گونلرینی نیظام و جماعتین 34 ایللیق حرکتنی موختلیف ساحهلرده دَیَرلندیرماغی موناسیب فورصت بیلیب آرتیردیلار: بو باخیش گلهجاقداکی یولو نئجه سئچمکده و گئتماقدا کؤمک اولاجاق.
اینقیلاب رهبری دوشمنلرین کودتا، نیظامی تحریک، موهاجیم دوشمندن تماماً حیمایت ائلهماق، یومشاق ساواش، مدیا امپراطورلوغونون آرتیق فیشاری و شیدّتلی تحریملر کیمی توطئهلرینه ایشاره ائدیب آرتیردیلار: اینقیلابین اوتوز دؤرد ایلینده اونلار جماعیتی نیظام و ایسلاما بدبین ائلهماقدان اؤترو اللریندن گلنی ائلهدیلر آما آللاهین فضلینن جماعت داها فعال و داها وفالی اولوبلار.
عالی رهبرلیق مقامی جماعتی نیظامینان اوزلشدیرماق اوچون بعضی تحریملرین شیدّتلنمهسی بارهده آمریکا مسئوللارینین دئدیغی سؤزلره ایشاره ائدیب تأکید ائلهدیلر: جماعت، همیشهیه تای ایرمی ایکی بهمن راهپیمالیغیندا بو سؤزلرین جوابینی وئریب و بو ایلده وئرهجاق.
حضرت آیت الله خامنه ای بصیرت و آییقلیغی بیگانهلر قاباغیندا موفقیّت رمزی ساییب آرتیردیلار: جماعت عمومی بصیرت و هوشیارلیغینان، بوتون حرکتلرده آمریکا و صهیونیستلرین اللرینی چوخ یاخجی اوخویورلار و اؤز کیردارلاریندا و موقعیتلرینده کیریخمیرلار و بو واقعیّت جماعتین عظیم حوسنی ساییلیر.
اینقیلاب رهبری تازالیقدا آمریکالیلارین ایرانلا موذاکیرهیه حاضیر اولماقلارینی مطرح ائلهماقلارینا ایشاره ائدیب آرتیردیلار: البته بو سؤزون تازالیغی یوخدور و اونلار موختلیف واختلار بونو تکرار ائدیبلر و هر دفعهسینده ایران جماعتی آمریکالیلارین عمللرینه باخماغینان سؤزلری بارهده قضاوت ائدیب.