عربستانداکی آل‌سعودون رمز و
رازی
«اونلار نفت دولارلارین ایچینده
چیمیرلر و حتّی توالتلرینی‌ده قیزیلدان دوزلدیرلر.»
بو آل سعود باره‌سینده یاییلان
شایعه‌لرین تکجه بیریدیر. عربستاندا هئچ موهوم منصب یوخدور کی آل سعود طایفاسی
اوردا اولمایا. آل سعود آروادلاری آدام حئسابلامادیقلاری اوچون, بو طایفانین اعضاسی
6000 نفر کیشی اعلام اولور.
اونلار حتّی اؤلکه‌نین رسمی
آدینی‌دا غصب ائدیبلر تا ایبتیدایی قبیله‌لردن اولوشان اؤلکه و 1932-ده یارانان
عربستان یادیندان چیخارتماسین کی بو آل سعود ایدی کی تازا عربستانین بیناسین
قویدولار.
عربستانی موتّحید ائدن شخص محمد ابن سعود
ایدی. آما آل سعود طایفاسینی داها چوخ عبدالعزيز بن
سعودین آدی‌اینن تانیارلار کی ایندیکی عربستانین ایری دانالاری اونون
نسلیندن‌دیر.
او ایدی کی عثمانلی
ایمپراطورلوغون ضعیفله‌مه‌سی نتیجه‌سینده و بریتانیانین حیمایتی‌اینن اؤلکه‌نین
موستقل‌لیغین اعلام ائله‌دی.
آل سعود طایفاسی‌نین آیری
زیرشاخه‌لری‌ده وار : السنيان، فرهان، مشري
تاریخچیلر عربستانین موعاصیر
تاریخین اوچ یئره بؤلورلر؛
بیرینجی پادشاهلیق: وهابیتین
تبلیغی و ایشاعه‌سی.
ایکینجی پادشاهلیق: داخیلی
ساواشمالار.
اوچونجو
پادشاهلیق: عثمانلی ایمپراطورو و آل رشیدینن داعوالار.
1932-ده عبدالعزيز بن سعود اؤزونو سعودی عربستان پادشاهی اعلام
ائدنده, سایسیز آروادلاریندان اولان اوشاقلاری‌نین کؤمگیله دوشمنلرینه پیروز اولدو.
او اؤز حکومتی‌نین تضمینی اوچون بوتون مطرح قبیله‌لردن بیر آرواد
آلمیشدی.
1953-ده عبدالعزيز اؤلدو و
اوغلو سعود حکومته چاتدی و اودا 1964-ده موفتی‌لرین فیشاری نتیجه‌سینده یئرینی
قارداشی فیصله وئردی. فیصل 1975-ده اؤلدورولدو و قارداشی خالد شاهلیق تختینده
اوتوردو و یئددی ایل حکومتدن سونرا سکته ائدیب اؤلدو و فهد اونون یئرینده
اوتوردو.
فهد بیر پارا دگیشیک‌لیقلارا
ال ووردو, او جومله‌دن «اعلا حضرت» عنوانینی «خادم‌الحرمین‌الشریفین» اینن دگیشدی
تا آل سعود طایفاسینی موقدّس نیشان وئرسین. او دا 1995-ده سکته ائدندن سونرا, عملده
قودرتی ولیعهدی «عبدالله»ـا وئردی.
فهد 2005-ده اؤلدو و عبدالله
رسماً پادشاه اولدو.
قودرت قورولوشو
سعودی عربستاندا قودرت
پادشاه الینده موتمرکیزدیر. و او لاپ یاخین آداملارین خاریجی ایشلر,داخیلی ایشلر و
دیفاع ویزارتینه منصوب ائلر. آیری ویزارتخانالار دا آشاغی درجه‌لی شاهزاده‌لرین
پایی‌دیر.
آل سعود چالیشیب کی نفت
ثروتین ائله بؤلسون کی طایفانین ایچینده ایختیلافلار حد اقله چاتسین آما بونونلا
بئله گاهدان ایختیلافلار او قدر چوخ اولور کی سسی ائشیگه چیخیر. بو طایفانین ثروتی
1900 میلیارد دولارا چاتیب.
سون ایللرده آل سعود, خبری
مرکزلره یاخینلاشماغینان اؤز علئیهلرینه اولان شایعه‌لرین قاباغین آلماغا
چالیشیبلار.
سعودی عربستان یارانان گوندن
توده‌لره هئچه قویماغینا گؤره, داخیلده و خاریجده ایستیبدادا موتهّم اولوب. و ائله
بونا گؤره‌ده داخیلده چوخلی اعتیراضلارا شاهید اولوب. بؤیوک شورشلرین بیری 1979-جو
ایلینده 500 سیلاحلی کیشی‌نین قیامی و تقریباً مکه‌نی فتح ائله‌ماقلاری اولدو. بو
500 نفرین چوخو عطیبه قبیله‌سیندن و بیر آزی‌دا آیری قبیله‌لردن و مصرلی ایدیلر کی
موفتی‌لرین فتواسی‌اینن سرکوب اولدولار.
سعودی ارتشی فرانسه و
پاکستانین مخصوص نیرولاری‌نین کؤمگیله قیام ائلیه‌نلره حمله ائدیب, کعبه‌یه پناه
آپارماقلارینا رغماً هامیسینی اؤلدوردولر.