بين‌الميللي اتومي انرژي آژانسي‌نين،
ايرانين هسته‌اي فعاليتي باره‌سينده كي آخير گوزاريشينده اؤلكه‌ميزه غير منطيقي و
سياسي ايتّهاملارين وورماسي باعيث اولوب تا مجليس، ايرانين بو آژانسينان رابيطه‌سينه
تازادان نظر سالسين.
علي لاريجاني مجليسين رييسي دئدي:اوردان
كي آژانسيان همكارليق ائله‌ماغين و ائله‌ماماغي فرقي يوخدور، مجليس آژرانسينان
همكارليغين ايدامه‌سي باره‌ده تصميم توتاجاق. بو اساسدا ميلّي امنيت و خاريجي
سياستلر كومسيوني بو مسأله‌يه يئتيشماغا مأمور اولوبدور. دوشنبه گونو كومسيونون
سؤز دانيشاني كاظم جلالي بونو دئماغينان كي ميلّي امنيت كومسيونو بو باره‌ده اؤز
آراشديرمالاريني باشلاييب، دئدي كي بو مسأله جيدّي صورتده كومسويندا مطرحدير. بو
باره‌ده مجليسين خاريجي سياستلر و ميلّي امنيت كومسيونونون رييسي علاءالدین
بروجردی‌اينن دانيشميشيق.
* آيا مجليس ايستير آژانسينان قطع رابيطه
ائدك؟
يوخ ! سؤزلر و لفظلر حقوقي و سياسي
بحثلرده حساسديلار. اصلاً آژانسينان قطع رابيطه بحثي يوخدور. همكارليقلارا تازادان
باخماق مجليسين خاريجي سياستلر و ميلّي امنيت كومسيونونون گلن هفته‌ده كي
دستوروندا وار و بونون‌دا عيلّتي بين‌الميللي اتومي انرژي آژانسي‌نين رييسي يوكيا
آمانونون چوخ پيس عملكرديدير. آمانو گرك وظيفه‌لرينه اساساً آژانسين موقرراتي
چرچيوه‌سينده اؤز فني، حقوقي و تخصوصي ايشين گؤره، آما عملده آمريكانين فيشاري‌اينن
سياسي ايش گؤردو. كول مودير طرفيندن بئله حركت، آژانسين گله‌جگينه چوخ خطرليدير و
عضولرين حقلري‌نين ضايع اولماسينا باعيث اولاجاق. بونا خاطير اينديه‌جن كاميل
صورتده اولان همكارليقلاريميز گرك تازادان آراشديريلا.
* آيا بو تازادان باخماق ان پي تي دن
چيخماق معناسيندادير؟
يوخ، آژانسينان همكارليغا تازادان باخماق
ان پي تي دن چيخماغينان فرقلي شئيدير. ان پي تي بين‌الميللي موعاهيده‌دير كي اؤلكه‌لرين
هسته‌اي بومب دوزلتمه‌ماغا تعهودودور آما آژانس بير تشكيلات و سازماندير كي اؤلكه‌لرين
صولح‌آميز فعاليتلري‌نين موقرراتين تنظيم ائدير.
* آمانونون گؤزاريشي‌اينن اگر ايرانين
علئهينه بير قطعنامه صادير اولا مجليس نه تصميم توتاجاق؟
ميلل سازماني اينديه‌جن چوخ قطعنامه
صادير ائديب. تشكيل تاپيلاجاق جلسه، ميلل سازماني‌نين حاكيملر شوراسينا مربوطدور
آما امنيت شوراسيندا دا بيزيم علئهيميزه قطعنامه صادير اولوب آما بيز
سياستلريميزده هئچ زادي دگيشمه‌ميشوق؛ نيه كي اعتيقاديميز وار ايرانين هسته‌اي
فعاليتلري صولح آميزدير. بو ايرانين حقلريندن‌دير و ان پي تي و آژانسين قانونلاري‌دا
اونو تصريح ائديرلر. بيز صولح‌آميز هسته‌اي فعاليتلريميزده اؤز حقلريميزدن دالي
اوتورميه‌جيوق.
* بعضيلري بئله دوشونورلر كي آمانونون
گوزاريشي آژانسين ايكي ايل قاباقكي گوزاريشلريندن شيدّتليدير و بو مسأله باعيث
اولوب ايران همكارليغين ايدامه‌سي باره‌ده تازادان باخا.
بلي، آقاي آمانو ائله مسأله‌لره باش
قوشوب كي اساساً بازرسليقلاردان كنار بير شئيدير چون كول موديرين گوزاريشي آژانسين
بازرسليقلاري اساسيندا اولار و بيزيم‌ده فعاليتلريميزين هاميسي شفاف و قانون
چرچيوه‌سينده‌دير آما آقاي آمانو 2003 ده كي ايبهاملاري كي جواب وئريلميشدي
تازادان مطرح ائديب و بو قبول اولان دئييل.
* كومسيونون دوشنبه گونونده‌كي جلسه‌ده
بو رابطه‌ده نه تصميم توتولدو؟
كومسيونون گلن هفته‌كي جلسه‌سينده
همكارليقلاردا تجديد نظر ائله‌ماق، ايش دستوروندا قرار تاپدي.