حاج میرزا جواد آقا ملکی تبریزی حاج
ميرزا شفيع‌نين اوغلو ايدي. تبريزده دونيايا گليب و ملك‌التجار تبريزي خانيواده‌سينه
منسوب اولدوغونا گؤره ملكي‌يه معروف اولدو.
اونون دوغوم ايلي دقيقاً بللي دئييل، آما
اونلارين تأليفاتينداكي قرائن و شواهيده گؤره 1312 هيجري قمري ايلينده جوانليق
دؤرانيني كئچيريردي.
میرزا جواد ملکی اؤز تحصيلاتيني نجفده
بؤيوك عاليم و اوستادلارين محضرينده اؤرگشدي. او عيرفان و اخلاق زمينه‌سينده آخوند
ملا حسينقلي همداني مكتبي‌نين لاب ياخجي شاگيردلريندن‌ايدي.
میرزا جواد ملکی تبريزي 1321 هيجري قمري
ايلينده ايرانا گلدي و اؤز شهري تبريزده علم و معاريف ترويجينه مشغول اولدو.
مشروطه‌نين اوّل‌لرينده تبريزين ناموساعيد اولماسينا گؤره «قم» شهرينه گئديب و
اوردا ساكين اولدو. «قم»دا فيقه و اخلاق درسي‌نين تدريسينه مشغول اولدو و فيقه
درسيني‌نين مئحوري فيض كاشاني‌نين مفاتيح كيتابيدي.
آیه الله العظمی حاج شیخ عبدالکریم حایری
«قم»ـا گلنده رحمتليق ملكي‌نين دوستلاريندان اولان شیخ محمد تقی بافقی‌نين ايصراري‌اينن
بو شهرده قاليب و علميه حوزه‌سي‌نين بيناسيني قويدو. حاج میرزا جواد آقا اخلاق و
تهذيب مكتبين تشكيل وئردي كي فايدالي ثمره‌لري اولدو و چوخلو شاگيردلر نظرلري
آلتيندا تربيت اولدو.
بو بؤيوك اينسانين اخلاق درسي ايكي قيسمت
ايدي:
ائولرينده تشكيل تاپان درس كي بير عيده
مخصوص شاگيردلرينه ايدي؛ و فيضيه مدرسه‌سينده جماعتين هاميسينا اولان درس و
دئييرلر كي او مجليسده دؤرد يوز نفرجن آدام اولاردي.
آیه الله میرزا جواد آقا ملکی تبریزی
گئجه نامازلاري و عيبادتلري‌اينن چوخ مأنوسيدي و ريسالت خانيدانينا مخصوصاً ايمام
زمانا (عج) يانيقلي عشقي واريدي. اثرلري‌نين آراسيندا موناجاتلار بو يانيقلي عشقي
حيكايت ائدير.
نهايتده او بوزورگوار 1343 هيجري قمري
ايلي‌نين ذيحجه‌سي‌نين اون‌بيرينده دونيايا گؤز يومدو و موقدس پئيكري «قم» شهرينده
شيخان قبريستانيندا ميرزاي قمي‌نين قبرينين ياخينليغيندا توپراغا تاپيشيريلدي.
اوندان چوخلو اثرلر قاليب كي اونلاردان
مشهور «المراقبات» و «رساله لقاءالله» كيتابلاريني آد آپارماق اولار. میرزا جواد
آقانين كيتابلاري‌نين ارزيشينده بو بس ائلر كي ايمام خميني(ره) اونلارين
كيتابلارين اوخوماغيني توصيه ائله‌ييرديلر.