بير حالداكي تونس جماعتي‌نين
اينتيخاباتدا گئنيش شيركتي باعيث اولوب نتيجه‌لرين اعلامي دالي‌يا توشه، رأيلرين
ايلكين ساييسي، ايسلامچي‌لارين چوخ ايختيلافينان پيروزلوغوندان خبر وئرير.
العربيه شبكه‌سي‌نين گوزاريشينه گؤره،
ميلّي شورا مؤسيسلر اينتيخاباتي يكشنبه گونو 217 عضوي سئچماق اوچون برگوزار اولدو.
رأي وئرماغا موجاز اولانلارين 90 درصدي شيركت ائله‌ييبلر. بو يوخاري ميزان،
اينتيخاباتي دولانديرانلاري غافيلگير ائديب. قراريدي اينتيخاباتين نتيجه‌لري دونن
ناهاراجن اعلام اولسون آما جماعتين چوخ شيركتينه گؤره نتيجه‌لرين اعلامي بويونه
قاليب. يكشنبه‌نين آخير ساعتلرينه‌جن رأيگيرليق انجام تاپدي و دوشنبه سحردن رأيلري
سايماق باشلاندي.
ميلّي شورا مؤسيسلر اينتيخاباتي، اساسي
قانون و تازا قانونلارين يازماسي و تازا اساسي قانون چرچيوه‌سينده اولان آيري
اينتيخابات اولونجن، موقّت دؤلتين تشكيلي هدفي‌اينن برگوزار اولدو. بو بير
حالدادير كي رأي سايما مركزلرينه ياخين منبعلر، اعلام ائله‌ييبلر كي لاب يوخاري
رأيي ايسلاما گيراييشي اولان «النهضت» حيزبي و اوندان سونرا «كنگره» سئكولار حيزبي
رأيلرين چوخون اؤزلرينه ايختيصاص وئريبلر.
عبدالحمید الجلاصی، النهضت حيزبي‌نين
تبليغاتي سيتادي‌نين موديري بونا ايشاره ائله‌ماغينان كي اونلارين حيزبي اؤلكه‌نين
خاريجينده بوتون صانديقلاردا فهرستين اوّلينده‌دي، دئدي: بو حيزب رأيلرين يوزده
اللي‌سين اله گتيريب. تونسين سونكي اينتيخابات قانونونا گؤره كورسولرين يوزده
قيرخي گرك موستقيل نامزدلره ايختيصاص تاپا. بو قانون بونا گؤره قويولوب كي تازا
اساسي قانونو يازان مجليسده، هئچ حيزب مجليسين اكثريتين اله گتيره بيلمه‌سين؛ نيه‌كي
اساسي قانون گرك بوتون گروهلار و حيزبلرين حضوري‌اينن يازيلسين.