اخير ماجرادا، كي آمريكا ايراني
عربستانين سفيريني ترورونا چاليشماغا موتهم ائلير، تحليل‌لرين ديقتي آمريكانين بو
سناريودان اولان پرده داليسي هدفلريدير؛ حال بوكي آرادا موهوم اويونچي وار كي
ايصطيلاحاً آمريكالي‌لارين سناريوسون آسانلانديرير.
عربستان بير اؤلكه كيمي كي
سناريودا قراريدي اونا حمله اولسون، اولاً موطلق صورتده آمريكانين ايدعاسيني
تيكرار ائلير و بو اؤلكه‌دن بو «توطئه»ني تاپماق اوچون تشكور ائلير و ايدعانين
دوز-يالاني بللي اولماميش، عوض چيخماقدان دانيشير. ايندي اصلي سوآل بوردادير كي
سعودي‌لارين بو ماجرادا سابيقه‌سيز (البته عراقي اؤلكه‌ميزه حمله ائله‌ماغا تحريك
ائتمكدن سونرا) فعال شيركت ائله‌ماقدان مقصدلري نمنه‌دير؟
عربستانليلار بير قديمي سوءظنه
گؤره، ايرانين منطقه‌ده كي قودرتيني آرتيران مؤلّيفه‌لردن قورخورلار و تجروبه
نيشان وئريب كي هميشه فورصت آختاريبلار كي منطقه‌نين دنگه‌سيني اؤز فايدالارينا
بير بيرينه وورسونلار. طبعاً سعودي‌لر جمهوري ايسلامي‌نين منطقه‌ده نئچه طرفلي
نقشي‌نين تقويت اولماسينا مانع اولماق ايستيرلر و چاليشيرلار غربين جمهوري ايسلامي
علئيهينه اولان رويكرديندن، اويناماغا آچيق فضا كيمي ايستيفاده ائديب اؤلكه‌ميزه
ضربه وورسونلار.
اورتا شرقين كئچن اون
ايل سياسي موعاديله‌لرينه باخماق نيشان وئرير كي سعودي‌لر لاب بؤيوك اوتوزانلاردان
اولوبلار. افغنستاندا طالبانين الدن گئتمه‌سي، القاعده‌يه آغير ضربه‌لر، صدام
حسينين ساقيط اولماسي، بن‌علي و حسني مبارك كيمي ديكتاتورلارين ساقيط اولماسي،
لبناندا حريري حوكومتي‌نين ساقيط اولماسي، عبدالله صالحين ساقيط اولماق حاليندا
اولماسي و آل خليفه‌نين بحرين‌ده كي چتين دورومو هاميسي نيشان وئرير كي ماجرالار
عربستانين علئيهينه آخماقدادير. بو وضعيتده سعودي‌لر احساس ائليرلر كي ماجرالار
ائله اولوب كي عملاً ايرانين مانور قودرتي هر طرفدن چوخاليب. ائله بونا خاطير
عربستان اردن‌لي‌لارينان بيرليقدا كئچن اون ايل بويو «شيعه هيلالي‌نين تشكيل تاپما
خطري»نين موناديسي اولوبلار و چاليشيبلار غربه بئله نيشان وئرسينلر كي گرك هر
جورلوغونان جمهوري ايسلامي‌نين مانور قودرتيني‌نين قاباغين آلسينلار.
عين‌حالدا عربستانين بو ايشدن
داخيلي ايستفاده ائله‌ماغيندا نظرده آلمالي‌ييق. سعودي‌لر چوخ شيدّتلي داخيلي
سياسي و ايجتيماعي بوحرانا دوچار اولوبلار. شيعه منطقه‌لرينده اخير درگيرليقلار
باعيث اولدو كي عربستان حاكيملري دؤزنمه‌ييب آچيق صورتده بو جرياني ايرانا نيسبت
وئرسينلر. بللي‌دير كي بو اويان-بويانا آتماق، اعتيراض ريشه‌لرين شيعه‌لرين
چوخ پيس وضعيتده اولماقلارين، دانماق اوچوندور.
عين‌حالدا سعودي نوخبه‌لرين
خليفه‌ليق داعوالارين‌دا نظرده آلمالي‌ييق.
ايران خطريني بؤيوك گؤرستماق لاب
آز فايداسي بو اولاجاق كي شيعه‌لرين ايستكلرين سركوب ائله‌سينلر، سونّي اكثريتين
اؤز نفعلرينه بسيج ائله‌سينلر و سعودي نوخبه‌لرين داخيلي اينسيجاملارين حيفظ ائله‌سينلر.
سعودي‌لرين بو ماجرادا كي هدفلري بير طرفه، جيدي صورتده ديقت يئتيرمه‌لي مسأله، بو
اؤلكه نوخبه‌لري‌نين آچيق عملكردلريدير كي اؤز متنينده درين بير قورخو و ايچريده
قالميش عصبانيتي وار كي ائله‌بيل چوخداندي فورصت آختاريردي عمومي عرصه‌ده ائشيگه
چيخسين و علني اينتيقام آلسين. عربستانين ايندي‌كي عمل شيوه‌سي بير اوشاغا بنزير
كي اؤز يانيندا قودرتلي بير ال احساس ائلير و بو جهتدن دئييلمه‌ميش سؤزلرينه بير
فورصتين اله توشمه‌سيني گومان ائلير.