عراقدا
شیعه‌لرین علیهینه اولان سلسله پاتلامالار مختلف اؤلکه‌لرین عکس‌العملی و
محکومیّتی اینن اوزلشدی. حزب الله-ین وئردیغی خبره گؤره عراقداکی
قیرغینلار آمریکا و اسرائیلین مدیریّتی اینن باش وئریر.
خبر
آژانسلاری‌نین خبرلرینه گؤره دوشنبه سحر عراقدا 17 پاتلاما اوز وئردی و 67
نفر شهید اولوب و 230 نفرجن یارالاندی. بو پاتلاییشلار بغداد، بصره،
کوت، و کاظمین شهرلری‌نین شیعه منطقه‌لرینده باش وئریب و آخر خبرلره گؤره
تروریستلر 300 نفردن آرتیغی قانا بلشدیریبلر. ملل سازمانی‌نین دبیرکلی
«بان‌کی‌‌مون» بو پاتلاییشلاری محکوم ائله‌ییب، عراقین پرتگاهدا اولدوغونو
بیلدیریب. او، هابئله عراقین سیاسی گروهلارینی عراق بحرانی‌نین تکجه حل
یولو اولان سیاسی مذاکره‌لره چاغیریب.
ملل
سازمانیندان علاوه، دولتلرین بیر سیراسی‌دا عراقین قانلی حمله‌لرین محکوم
ائله‌دیلر. بو اؤلکه‌لرین ایچینده آمریکا و فرانسه‌ده گؤزه دَییر.
لبنانین حزب الله-ی بیر بیانیّه یاییماغینان آمریکا و اسرائیلین گیزلی اللری‌نین عراق شیعه‌لرینی اؤلدورماقدا اولدوغونو بیلدیردی.
بو
بیانیه‌ده بئله گلیب: دنیا مسلمانلاری خصوصاً عراق مسلمانلاری اؤز
چالیشمالارینی تکفیری تروریزم و آمریکایی و صهیونیستی توطئه‌لرین قاباغیندا
بیرلشدیرسینلر چونکی آمریکاو اسرائیل اسلام دنیاسینا سلطه تاپاق
قصدینده‌دیلر.
حزب
الله، مبارک اوروجلوق آیی‌نین حرمتی‌نین سینماسینا اشاره ائدیب آرتیردی:
بو حمله‌لرده تروریستلر مسکونی منطقه‌لری نشانلامیشدیلار و آرواد اوشاغی
قانا بلشدیردیلر.