شرقي آذربايجانين ايسلامي تبليغات كول اداره‌سي
عمومي رابيطه‌لري‌نين گوزاريشينه گؤره، حجت الاسلام حميد عظيمي خانيم موبلّيغ‌لر و
خانيملارين عزادارليق سيره‌لري‌نين جمعينده دئدي: ايمام حسين (ع) و كؤمكلري‌نين
شهادتيندن سونرا حضرت زينب سلام الله عليهانين ريسالتي چوخ حساسيدي. نيه كي دوشمن
چاليشيردي هر يولونان‌دا اولسا عاشورا حاديثه‌سي خبرين سانسور ائله‌سين.
او دئدي: حضرت زينبين(س) ديني غيرتي و
رشادتي، كوفه و شامدا بني‌اميه‌نين توطئه‌لري‌نين اوسوتون آچماقدا، باعيث اولدو تا
بو منحوس طايفانين ايمام علي (ع)ين ائولادي و شيعه‌لرين علئيهينه يارالدان يالان
سس-كويلر ايفشا اولسون.
اوستانين ايسلامي تبليغات كول موديري
آرتيردي: خانيملارين اينديكي عصرده وظيفه‌لري بودور كي بو شرفلي خانيمدان تبعيّت
ائله‌ماغينان ايماملارين يولون ايدامه وئره‌لر و بو فرهنگي اؤز اوشاقلارينا
اينتيقال وئره‌لر.
عظيمي دئدي: بو فرهنگين
ديري ساخلاماسي و بو ايسلامي و تاريخي حادثه‌يه بيدعتلرين گلمه‌سي‌نين قاباغين
آلماق باعيث اولاجاق تا ايمام حسينين (ع) قاني هميشه قايناسين و جوانلارين روحوندا
ايثار و شهادت حيسّي و اينديكي عصرين حاديثه‌لرينن عاليمانه برخورد ائله‌ماق روحي
ديري قالسين.