شرقي آذربايجانين ايسلامي تبليغات
سازماني‌نين عومومي رايطه‌لرين گوزاريشينه گؤره، حجت الاسلام حميد عظيمي بو
انجومنين بيرينجي جلسه‌سي‌نين آچيليشيندا دئدي: اهل بيت شاعيرلري گرك ايسلامي
معاريفي صحيفه سجاديه دوعاسي و شعبانيه موناجاتي كيمي دوعالاردان آلالار.
او دئدي: شاعيرلر گرك موصيبتلري اينديكي
زمانينان توتوشدوروب زمانه يزيدلرين تانيتماسينا ايقدام ائليه‌لر.
عظيمي آرتيردي: اهل بيت(ع) موصيبتين
وجودا گتيرن عاشورا ماجراسي‌نين اصلي عاميلي جابيرلرين جورأتي، خواصين خيانتي و
جماعتين نامردليغي‌ايدي كي هر ايكي طرفين دونيايا و توغلايان ظاهيره ميل‌لري
اولدوغو اوچون عاشورا فاجيعه‌سي ياراندي.
اوستانين ايسلامي تبليغات مودير كولي
هابئله ايسلامي اينقيلابين موعظم رهبري‌نين كرمانشاها اولان سفرينه ايشاره ائديب
دئدي: بو سفرده جماعت صحنه‌ده حاضير اولوب زمانين ويلايت فقيهيندن حيمايت ائتمه‌سينه
شاهيد اولدوق، بير زاد كي ايمام علي(ع) زمانيندا اولماماسي باعيث اولدو او حضرت
ائوده قالسين و ايسلامي جاميعه آللاهين وليسي‌نين هيدايت نعمتيندن محروم اولسون.
عظيمي ايسلامي جاميعه‌نين سياسي
مساييلينه بي‌تفاوت اولماماغي ايسلامي حوكومتين قالماغينا گركلي بيليب و دئدي:
معصوم ايماملار(ع) زماني مخصوصاً ايمام حسين(ع) زماني جماعيت بي‌تفاوت اولماسي
باعيث اولدو جابيرلر ايسلامي اومّته و جاميعه‌يه تسلوط جورأتي تاپسينلار.