آلماندا ایکی مین نفردن چوخ اینسانین اوستونده آپاریلمیش تحقیق گؤرسدیر کی دوخانیات مصرف ائدنلرین گئجه‌لر یوخلاماقدا موشکوللری وار و آیریلارینان موقاییسه‌ده یوخولاری آرام اولمور. موحقیقلر بیلیبلر کی بو تحقیقده شیرکت ائدنلرین 1100 نفری‌نین 17 درصدی گئجه‌لر 6 ساعتدن آز یاتیرلار و 28 درصدی‌نین یوخو کیفیتی پریشاندیر.

استفان کوهرس بو تحقیق باره‌ده یازدیغی علمی مقاله‌ده دئییر: بو تحقیق بیرینجی دفعه‌دیر کی سیگار چکنلر و چکمه‌ینلرین یوخولارینی تحقیق ائدیر. تحقیق اولان گروه ائله آداملار ایدیلر کی هئچ جوره روحی ایختیلال سابیقه‌لری یوخیدی و ایطمینان اوچون بالقوه ریسکلی عامیللر ده کونترول اولوب.

بو تحقیقین نتیجه‌لری تکلیکده گؤرسده بیلمز کی سیگار چکماق موستقیم صورتده یوخونو موختل ائدر, نیه کی ایمکانی وار بو آداملارین بعضیسی‌نین آیری عادتلری ده اولسون کی اونلارین یوخولارینا تأثیر ائده. بو عادتلردن گئجه یاریسیناجن تیلویزیون قاباغیندا قالماق و یا بیر آز فیزیکی فعالیت اولماقدیر کی راحت بیر یوخویا سبب اولار.

آما آیری طرفدن دئمک اولار بو تحقیق گؤرسدیر کی نیکوتینین تحریک ائدن اثری بو ایختیلالا سببی اولور.

یوخو کیفیتی چوخ آشاغی اولانلارین چاقلیق, دیابت و اورک ناخوشلوقلاری کیمی موشکوللری‌ده اولار بیلر.

بو تحقیقده 1071 نفر سیگار چکن و 1243 نفر سیگار چکمه‌ین کی بئیینلرینده هئچ موشکول یوخیدی, شیرکت ائله‌میشدیلر. بئیین موشکولونه بو قدر تأکید ائله‌ماق بونا خاطیر ایدی کی اولا بیلر بئیین موشکولو یوخودا ایختیلال یاراتسین و یا سیگار چکماغا ریغبت یاراتسین.

موحقیقلر بو تحقیقده ائله‌ سوآللاردان ایستیفاده ائله‌دیلر کی یوخو کیفیتینی بللی ائدیر, اوست-اوسته سیگار چکنلرین دؤردده بیری‌نین یوخو ایختیلالی واریدی.