دمیر فقری نتیجه‌سینده یارانان قانسیزلیق بدنه کفایت مقداردا دمیرین چاتمادیغیندان میدانا گلر.
قانسیزلیق قانین قیرمیزی گلوبول‌لاری‌نین آزلیغینا دئییلیر کی چوخلو علت‌لری اولا بیلر بیری‌ده بدنین دمیر یوخسول‌لوغودور.
یورقونلوق و حالسیزلیق حسی، دال به دال باش آغریسی، اشتهاسیزلیق، یبوست، تورپاق کیمی عجیب غریب شئیلری یئماغا میل گؤرستماق، بارماق اوجلاری‌نین سویوق اولماسی، باش گیجللنمه و ضعف حسّی، تنگی نفس حسّی و دوداقلارین رنگسیز اولماسی قانسیزلیغین علامتلریندن ساییلیر.
کرخانا یئمه‌لرین یئییلمه‌سی، بعضی یئماق وعده‌لرین حذفی و بوتون یئمه‌لیلردن استفاده ائله‌مه‌ماق بدنه دمیرین چاتماماسی عامل‌لردندیر. بونلار یوخاری سایدیغیمیز علامتلرینن همزمان اولاندا قانسیزلیق احتمالی یوخاریدیر.
قانسیزلیغین تکجه تشخیص یولو قان آزمایشیدیر.
بیر شخصین قانسیزلیغیندا شکی اولاندا دمیر مکمللری یئمه‌مه‌لیدیر بلکه دکتره گئدیب قان آزمایشی وئرمه‌لیدیر. چونکی حددن آرتیق دمیر قبول ائله‌ماق مسموم ائلر و پیس عوارضی وار.
آمارلارا گؤره دنیانین لاپ یایقین سوءتغذیه‌سی دمیر سوخسول‌لوغودور.
دنیا خانملاری‌نین بئش نفردن بیرینده دمیر یوخسول‌لوغو وار و حامله‌لیق زمانی هر ایکی نفردن بیرینه چاتیر.
ویتامین C مصرفی دمیر جذبینه کؤمک ائلر.
بو ناخوشلوغون گرکلی اولدوقلاریندان مریضی درمان حینینده تعقیب ائله‌ماقدیر. یعنی بیر مدت درماندان سونرا حتماً تازادان قان آزمایشی اولمالیدیر کی درمانین نئجه تأثیر قویدوغو اورتایا چیخسین. بئله‌لیغینان درمان دوزون آزالیب آرتیریلماسی و یا حتی دایاندیریلماسی باره‌ده راحت تصمیم توتماق اولار.
نوجوانلار و حامله خانیملار کیمی بو ناخوشلوق معرضینده اولان گروهلارا، پزشک نظری اینن دمیر مکمللری مصرف ائله‌ماق توصیه اولونور.