کونجودون خاصیتلری
یاغلی دانالارین لاپ فایدالیلاریندان بیری‌ده کونجوددور. انرژی دولو بو دانانین مرکزی هندوستاندیر. و قدیم زمانلار اوندان سربازلارین جسمی وضعیتی‌نین گوجلندیرمه‌سی اوچون استفاده اولوناردی.
کونجودون ضد التهاب و آنتی اکسیدان خاصیتی تانینمیش خاصیتدیر. اونون مصرفی قانین تری گلیسیرید، پیس کلسترول و یا همانLDL و قانین قندینی آزالدار و HDL و یا همان یاخشی کلسترولو چوخالدار.
بونلارین هامیسی اورک دامار ناخوشلوقلارین قاباغینی آلار. کونجود E ویتامینین چوخالماسینا دا سبب اولار. خانیملار هادت زمانلاریندا کونجود چوخ یئسه‌لر التهابلاری و رحم انقباضلاری آزالار و نتیجه‌ده قاعده‌لیق زمانین آغریلاری‌دا آزالار.
کونجود هابئله یائسه خانیملارین آروادلیق هورمونلارین آخماسیندا دا تأثیرلیدیر.
بو ماده پارکینسون ناخوشلوغونا دا یاخجی گلر و کؤرپه‌لرین مرکزی عصب سلوللارین بؤیومه‌سینه کؤمک ائلر و گؤزون ایشیغینی آرتیرار.
بونا گؤره حامله و سوت وئرن خانیملارا کونجودون مصرفی توصیه اولور. کونجودده اولان کلسیوم‌دا داها ساغلام دیشلر و سوموکلره صاحب اولماغا کؤمک ائلر. و قانین فشارین آزالتماقدا و عضله‌لرین ایشینی یاخشیلاتماقدا نقشی وار.
نهایتاً کونجود دمیر منبعی کیمی قانسیزلیغین درمانینا نقشی وار و اوندا اولان B ویتامینلری بدنین سوخت و سازینا کؤمک ائلر.