کهلیک اوتو بو گونلر غذالاردا ادویه کیمی‌ده استفاده اولونور. آما بو گیاهین چوخلو درمانی خاصیتلری وار کی مین ایللر بویو تانینیب و استفاده اولونوب.
قدیم روم امپراطورلوغوندا کهلیک اوتوندان مسمومیتین درمانیندا استفاده اولوناردی. بیری‌نین مسمومیتی اولسایدی حمام سویونا کهلیک اوتو قاتاردیلار کی اونون درمانینا کؤمک اولسون. بایات غذانین مسمومیتینی آزالتماق اوچون غذانین پیشیرمه‌سینده اوندان استفاده ائلردیلر. آنتی بیوتیکلرین تاپیلماسیندان قاباق یارالارین درمانیندا کهلیک اوتو یاغیندان استفاده ائلردیلر.
کهلیک اوتونون لاپ تأثیرلی مادّه‌سی تیمولدور کی ضد باکتری و ضد قارچ خاصیتینه گؤره دهان‌شویه‌لرده و موضعی پمادلاردا اوندان استفاده اولونار.
بو گیاهین 6 مهم خاصیتی بوندان عبارتدیر:
1. کهلیک اوتو بوغاز آغریسینی توختادار
کهلیک اوتو یاغینداکی کارواکرول مادّه‌سی بوغاز آغریسی‌نین درمانی و تسکینینده مهم تأثیری اولور.
تازالیقدا لهستانین لودزیندا اولان تحقیقده بو گیاهین یاغی‌نین آنتی بیوتیک نقشینی اوینایا بیلدیغی اورتایا چیخیب.
2. قان فشارینی و کلسترولو آزالدار
کهلیک اوتو مصرفی بدنده قان فشارینی آزالدان ماده تولید ائلر. بونا گؤره قان فشاری اولانلار اوچون بو گیاهین مصرفی توصیه اولونور.
تازالیقدا سیچانلار اوستونده اولان تحقیقده قان فشاری اولانلارین اورک دؤیونمه‌سینی آزالتماقدا تأثیرلی اولدوغو بللی اولوب. هابئله بو تحقیقده کهلیک اوتونون مصرفی نتیجه‌سینده قانین کلسترولو، تر گلیسیریدی آزالیر.
غذالارا حددن آرتیق دوز وورونجا کهلیک اوتو کیمی ادویه آرتیرین.
3. غذایی مسمومیتین قاباغینی آلار
کهلیک اوتو غذایی ماده‌لرین آلوده‌لیغی‌نین قاباغینی آلماقدان علاوه، آلوده اولموش غذالارین میکروبونو دا آلا بیلر. میکروبیولوژی آزمایشلرده بللی اولدو کی کهلیک اوتو یاغی پسگلا اینن آلوده اولموش کاهینی میکروب زدایی ائله‌یه. (شیگلا اسهالا سبب اولا عفونی اورگانیزمدیر.) آلوده کاهینی یوزده بیر کهلیک اوتو یاغی اولان مایع اینن یوسان اونداکی میکروبلار تشخیص وئریلمیه‌جاق قدر آزالار.
تزا کهلیک اوتونو حاضرلاتدیغیز سالادین ایچینه قاتین کی اونداکی سبزیلری ضد عفونی ائله‌سین.
4. سیزی سرحال ائلر
کهلیک اوتوندان اولان کارواکرول انسانس روحیه‌لی اولماسیندا یوخاری تأثیری وار. 2013 یاییلان تحقیقاتین نتیجه‌سینه گؤره سیچنلاری بیر هفته بویوندا کارواکرول معرضینده قویماق اونلارین بئینینده‌کی دوپامین و سروتونین مقدارینی آرتیریر.
کارواکرول بئینین فعال اولماسینا سبب اولان مولکولدور و عصبی دامارلاری تنظیمه سالماغینان بئینین فعالیتینی یاخجیلادیر.
تحقیقلره گؤره کهلیک اوتو آز و مداوم شکلده مصرف اولسا انسانی سرحال ائلر.
5. کهلیک اوتونون ضد سرطان خاصیتی
کهلیک اوتوندا بول اولان کارواکرول ماده‌سی هابئله ضد تومور و ضد سرطان بیر ماده‌دیر.
اخیراً چینده اولان تحقیقده کارواکرولون باغیرساقلاردا سرطانلی سلول‌لارین یاییلماسی‌نین قاباغی آلدیغی اورتایا چیخیب. بو ماده یوغون باغیرساقدا سرطانین قاباغینی آلیر.
6. برونشیتین درمانی
کهلیک اوتو یوز ایللر بویودور اؤسکورمه و برونشیت درمانی کیمی مصرف اولور. آلمانین Practice for Internal Medicine and Pneumology مؤسسه‌سی‌نین تحقیقینه گؤره، بو ماده‌نی مصف ائله‌ینلرین یوزده 50-سی‌نین اؤسکورمه‌سی آزالدی. بو علامتلر همان تحقیقده داوا اینن درمان اولانلاردان 10 گون تئز ظاهر اولدو. و البته کی داوادا اولان عوارض کهلیک اوتوندا یوخ ایدی.
کهلیک اوتو نانه‌لر تیره‌سیندن بیر گیاهدیر و کی یارپاقلاری یاش و یا قوروتولموش حالتده استفاده اولونار. ایتالیانین سیسیل منطقه‌سینده کهلیک اوتو بالی مشهوردور. آریلار کهلیک اوتونون گولونه جذب اولوب اوندان بال دوزلدیرلر.