آغلاییر، قرارسیزدیر، راحت یاتا بیلمیر، اشتهاسیزلاییب و بیر هئی بهانه ائلیر . . . دردینی دیله گتیره بیلمه‌ین اوشاقلاردا بو علامتلری گؤرماق هر آتا آنانی نگران ائلر. مخصوصاً ایکی یاشدان آشاغی اوشاقلاردا کی والدین آغلاماقلارینی آغری علامتی کیمی سایمازلار و اونا ناخوشلوق علامتی کیمی باخمازلار.
اوشاقلارین قرارسیزلیغی مخصوصاً سویوق دَیمیش اوشاقلاردا اکثراً قولاق آغریسی اولور. اورتا قولاغین التهابیندان عمله گلن قولاق آغریسی.
آما اوشاقلاردا قولاق آغریسی‌نین عامل‌لری نه‌لردیر؟
کؤرپه‌لرده و سوت اَمَر اوشاقلاردا قرارسیزلیق و آغلاماق اگر تب و بورون توتولما اینن بیر اولسا چوخ احتمالا قولاق آغریسی سببی اولا بیلر.
اوشاقلارین قولاغی آغری‌یاندا معمولاً قولاقلارینا ال وورارلار. آما دقت ائله‌ماق لازمدیر کی ساییلان علامتلر اولمادیغی تقدیرده اوشاغین قولاغینا ال وورماسی قولاق آغریسی علامتی ساییلا بیلمز. اوشاقلاری قولاق آغریسی اولاندا معمولاً گئجه‌لر آغریدان آییلارلار چونکی قولاق شیشی اوزانمیش حالدا چوخالار.
بو نوع عفونتده ویروسلار و باکتری‌لر بورون، بوغاز و استاش لوله‌سی (اورتا قولاق استاش لوله‌سی طریقی ایله بوغازا و بورونا یول تاپیر) واسطه‌سی اینن اورتاق قولاغی آلوده ائلیرلر.
ائشیک قولاغین التهابی، دیش، بوغاز، لوزه‌لر، دیل و سینوسلارین چیرکی‌ده قولاق آغریسینا سبب اولا بیلر.
قولاق چیرکی معمولاً بیردن بیره اورتا قولاقدان باشلار و مدتی‌ده آز اولار. بعضی اوشاقلاردا قولاق آغریسیندان علاوه قولاق توتولماسی و آز ائشیتمه عارضه‌سی‌ده اولار. بعضاً ده اورتا قولاغین شدّتلی چیرکی اینن عین زماندا قولاق پرده‌سی ییرتیلار و ایچینده‌کی مایعلر قولاق کانالینا تؤکولر. بو زمان، قولاق آغریسی آزالار آما قولاق توتولماسی عارضه‌سی شدّتلَنَر. والدین‌ده معمولاً اونا دقّت یئتیرمزلر.
متخصصلرین دئدیگینه اساساً قولاق پرده‌سی‌نین ییرتیلماسی، مننژیت، بئیین آبسه‌لری، اوز عصبی‌نین فلج اولماسی، قان عفونتی، داخلی قولاغین عفونتی و کارلیق اورتا قولاغین عفونتیندن عمله گله بیلن عارضه‌لردندیلر.
واختیندان تئز دوغان اوشاقلار و اینک سوتو اینن تغذیه ائله‌ین اوشاقلار، داها چوخ اورتا قولاق عفونتینه مبتلا اولارلار.
آیری طرفدن، بهداشت و تغذیه فقری، اوشاغین چوخلوغو، یاشاییشا کفایت قدر فضانین اولماماسی، یاخینلارین سیگار چکمه‌سی، بدنین ایمنیسی‌نین ضعیفلیغی، مدرسه و اوشاق باخچاسی کیمی باغلی یئرلرده قالماق، سویوق هوا و سویوق دَیمیش انسانلارینان تماسدا اولماق و عمومیتده بدنین دفاع سیستمینی ضعیفله‌دن هر عامل اورتاق قولاق عفونتینه سبب اولا بیلر. هابئله لوزه‌لرین بؤیوکلوغو و تئز تئز عفونت ائله‌ماغی و تنفّسی عفونتلر ده احتمالی چوخالدار.