کؤک اولان انسانلاردا آیری مشکل‌ده اولماسا اورک-دامار ناخوشلوغونون احتمالی اونلاردا چوخ اولار.

کؤکلوق اورگه آرتیق یوک و فشار گتیرن ساغلام اولمایان وضعیتدیر. بونا گؤره آریقلاماق لازم مسأله‌دیر.

سیز ایده‌آل و نورمال چکی‌یه ال تاپساز سیزده اورک دامار ناخوشلوغونون احتمالی آزالار. بو، یاغ مصرفی‌نین آزالتماسی، میوه، گؤی و حبوبات مصرفی‌نین آرتیرماسی و بدن تحرّکونون چوخالماسی معناسیندادیر.

یئماق رژیمینی باشلاماق راحت اولا بیلر آما اونو ادامه وئرماق چتیندیر. اوّلده هدفی بللی ائله‌ماغینان یول اوستو مانعلره دوشونوب چتینلیقلارینان نئجه اوز به اوز اولماغا تصمیم توتمالی‌سیز.

مناسب بیر یئماق رژیمی باره‌ده تغذیه متخصصی اینن مشورت ائله‌ماق سیزه یاخجی اولار. یونگول‌لشماق اوچون غذا یئمه‌ماق گاهدان بیر دب اولان رژیملرینن آریقلاماق اولماز. سیز بیر گونده کؤرکلمه‌میسیز کی بیر گونده ده آریقلایاسیز.

یئماق عادتیزه نظر سالین. باخین گؤرون آجالاندا یئماق یئییرسیز یوخسا عادت اوزوندن هر گئجه تلویزیون قاباغیندا اوتوروب یئماق یئییرسیز. بئله اولسا یئماق رژیمیزده دَیشیک‌لیق ائله‌مه‌لیسیز.

ایچیزده اولان یئماق وسوسه‌سینی کنترل ائله‌یین. سیزه کالوریسی یوخاری اولان یئمقلار وئریلنده، اونلاری مؤدبانه ردّ ائله‌یین.

آرام یئیین و تیکه‌لریزی کیچیک گؤتورون. آغزیزداکینی چئینه‌ییب قورتارمامیش اؤبیری تیکه‌نی گؤتورمه‌یین.

گونده بیر دفعه چوخ یئماق عوضینه، نئچه دفعه آز یئیین. جورب به جور میوه‌لر، گؤی، تاخیل، سوت محصول‌لاری، قیرمیزی ات، بالیق و دریسیز تویوق کیمی سالم یئماقلاردان استفاده ائله‌یین.

غذالاری یاغدا قیزارتمایین بلکه اونلاری توست، فئرده پیشیرماق، کباب و سودا پیشیرماق فورموندا حاضرلایین. هابئله گونده ایچدیگیز سویون مقدارینی آرتیرین.

بدن تحرّکوزو آرتیرین

بدن فعالیتی غذا رژیمیندن آرتیق سیزین ساغلاملیغیزا فایدالی اولار. او سیزی آغ جیگر، سوموک و اورک دامار ناخوشولقلاریندان اماندا ساخلار.