جنینلیق
زمانیندان بدنین دفاع سیستملریندن بیری اؤز و بیگانه‌لیغی
تشخیص وئریب بیگانه عامل‌لرینن مبارزه ائله‌ماقدیر.
قاندا اولان
مدافعه سلول‌لاریندان علاوه دری‌نین
تمامینی و بورون، نای، گؤز، قولاق کیمی بدن منفذلری‌نین
اورتوسونو بوروین سلول‌لار واردیلار. بو سلول‌لارین
وظیفه‌سی خارجی جرملره یئیین عکس العمل گؤرستماقدیر. بو جرملر
بدنه داخل اولماق همان، سلول‌لار آسقیرماق، اؤسکورماق،
بورون سویو آخماسی و دری‌نین ملتهب اولماسی کیمی عکس
العمل‌لره سبب اولارلار.
ساییلان عکس
العمل‌لر کاملاً طبیعی و عادی‌دیلر.
مثال اوچون هوانین چیرکلی اولدوغو زمان هواداکی ایری ذرّه‌لر،
آسقیریب اؤسکورماغا سبب اولورلار کی بونا آلرژی دئییلمز. مشکل، بدنین مدافعه سلول‌لاری‌نین
حددن آرتیق تحریک اولدوقلاری زمان یارانیر.
بئله اولاندا
شخصین آلرژی ناخوشلوغونا توتولور. چیرکلی هوادا اولان کیمی اؤسکورماغا و تنگی نفس
اولماغا باشلایان اوشاق کیمی. بئله‌نچی وضعیته آلرژیک آسم
دئییلیر.و یا یاز فصلینده هوادا اولان نباتی ذرّه‌لره
گؤره گؤزلری قیزاران و آسقیران بیر جوان قیز.
محیطی عامل‌لرین
معرضینده اولان بدندن محافظت وظیفه‌لری اولان انداملار آلرژیک
ناخوشلوقلارا مبتلا اولا بیلرلر. دری، بورون، تنفس دستگاهی و هضم سیستمی، آرژی‌یه
مبتلا اولان انداملارداندیلار کی سپمه، آسم، رینیت و اسهال کیمی آلرژیک
ناخوشلوقلارا مبتلا اولارلار.
آرلرژیک
رینیت، بورونون ملتهب اولماسینا دئییلیر. دال به دال اؤسکورماق، بورون سویو گلماق،
گؤز و بورونون قاشینماسی، بورون دلیکلری‌نین توتولماسی، گؤزلرین
قیزارماسی و یاشلانماسی و بوغازین قاشینماسی اونون علامتلریندن ساییلیر.
بو علامتلرین
سویوق دَیمه‌یه چوخ اوخشارلیغی وار. سویوق دَیمه اوچ گون چکن ویروسلی
بیر ناخوشلوقدور کی بدنین آغریسی و حرارتی اولار و اوچ گوندن سونرا آرادان گئدر.
بیر حالدا کی آلرژیک رینیتین علامتلری آسقیرماق، گؤز و بورون سویو آخماسی اولور و
داها چوخ زمان اولور.
بعضاً بیر ائو
حیوانی‌نین توکو و یا یئلگینه گؤره آلرژی توتوروق. بعضاً ائوده
سوسری‌نین اولماسی آلرژی گتیریر و گاهدان‌دا
یورقان دؤشکده اولان یون و یئلک آلرژی‌یه سبب اولور.
آلرژی‌نین
تکجه درمانی آلرژی گتیرن زادلاردان اوزاق اولماقدیر. بو ایشی‌ده
یاشادیغیمیز یئره مناسب فیلترلرین قوشولماسی و چیرکلی یئره گئدنده ده ماسکدان
استفاده ائله‌ماقدیر.