محققلرین دئدیگینه گؤره عاغیللی اندروید موبایل‌لاری اولان انسانلار عالم اولا بیلرلر و موبایل‌لارینی شارژ ائله‌دیقلاری زمان، مهم علمی پروژه‌لرده مشارکت ائلیه بیلرلر.
کالیفرینا برکلی دانشگاهی‌نین محقق‌لری عاغیللی موبایل‌لارا تازا برنامه طراحلیق ائدیبلر کی اؤز انسانلار موبایل‌لاری‌نین استفاده‌سیز گوجلریندن علمی پروژه‌لرین عددلرینی سیندیرماغا استفاده ائله‌سینلر.
محققلرین نظرینه گؤره بو مشارکتلر تازا طبّی درمانلاردان توتموش تازا اولدوزلارین کشفینه قدر بؤیوک ترقّی‌لره سبب اولا بیلر.
بو برنامه، برکلی دانشگاهی‌نین «برکلی‌نین آچیق شبکه محاسبه‌لری‌نین آلت قورولوشلاری» آدیندا پروژه‌لری‌نین بیری‌نین واسطه‌سی اینن طراحلیق اولوب. بو پروژه کامپیوتری برنامه‌سینه گؤره تانینیب. بو برنامه دنیانین دؤرد طرفینده اللیدن آرتیق محاسبه پروژه‌سیندن حمایت ائلیر.
بو برنامه بو پروژه‌لره، دنیانین دؤرد بوجاغیندا کامپیوتر صاحبلری‌نین باغیشلادیغی استفاده‌سیز گوجلردن استفاده ائله‌ماق امکانی وئریر. ائله دیتالارین کی اونلارین آنالیزینه نرمالدا چوخ باهالی سوپر کامپیوترلره احتیاج وار.
بو تازا برنامه «اندروید BOINC» آدلانیر و Google Play Store طریقی اینن اله گله بیلر و عاغیللی اندروید نسخه 2.3 و اوندان یوخاری موبایل‌لارا نصب اولا بیلر.
برکلی دانشگاهی‌نین فضایی علملر آزمایشگاهی‌نین عالمی «دیوید اندرسون»ون دئدیگینه گؤره دنیانین دؤرد طرفینده بیر میلیاردا یاخین اندروید سیستملی الکترونیک دستگاه وار و اونلارین محسابه گوجو دنیانین لاپ بؤیوک سوپر کامپیوترلریندن چوخدور. موبایل دستگاهلاری چوخ جهتدن گله‌جاغین موجی ساییلیرلار و محاسباتی چتینلیقلارین حلّینه کؤمک ائلیه بیلرلر.
بو برنامه عاغیللی تلفنون شارژ اولدوغو زمان و یوزده 95 شارژ اولدوغوندا فعال اولار. بو اوزدن شارژین سرعتینی آزالدا بیلر.
بو برنامه فقط وای فای اینترنتی اینن کامپیوتری پروژه‌لرینن رابطه قورار و پیش فرض تنظیملرینن دَییشه بیلر.