زمینه‌سی اولمادان و خبرسیز آجی اتّفاقلارین بیری، کارلیق و یا قولاغین ائشیتمه‌سی‌نین ضعیفله‌مه‌سیدیر. بیردن بیره قولاغین ائشیتمه قابلیّتی بوتونلوکده و یا قسماً آرادان گئدیر.
پاتلاما سسی، سس دیواری‌نین سینماسی و یا ترقّه سسی، قولاق تومورلاری و عفونتلری و سایر عامللر بؤیوک مشکل‌لره سبب اولا بیلرلر. مثلاً قولاق سکته‌سی متخصصلرین تحقیق ائله‌دیقلاری زمینه‌لردندیر.
بو جور ائشیتمه آزالماسی معمولاً بیر قولاقدا باش وئرر آما داها مهم نکته بودور کی ویروسی ناخوشلوقلار، قولاق عفونتلری و بعضی دوالارین مصرفی، قولاق سکته‌سینه سبب اولا بیلر. قولاق سکته‌سی‌نین بللی عاملی مشخص اولماز و داها چوخ استرسلی شراییطده یارانار.
بیردن بیره کارلیق، ائشیتمه عصب حسّی‌نین آزالماسی اینن یارانیر و شخص بیر آندا قولاغی‌نین آغیرلانماسی و یا کارلیغینا متوجّه اولور.
جنتامایسین، آسپیرین، بروفن، افسرده‌لیق دوالاری و شیمی درمانی دوالاری‌نین باشلاریندا یئر آلان بیر دسته دوالار، اؤز باشینا ایشله‌نن زمان ائشیتمه‌نین عصب حسّینه ضرر وورا بیلر.
آمارا اساساً ایلده بئش مین نفردن بیر نفر بو مشکله دچار اولار و معمولاً بو عارضه بیر قولاقدا گؤروشر. نئچه گون عرضیند مبتلا اولانلارین اوچده بیری‌نین وضعیّتی اوّلکینه تای اولار. مبتلا اولانلارین یاریسی‌دا تدریجله دوزلرلر آما متأسفانه ناخوشلارین دؤردده بیری توختامازلار.
بو عارضه‌نین گؤروندویو زمان طبیبه مراجعه ائله‌ماق لازمدیر چونکی بئله اولماسا خطرلی حادثه‌لر باش وئره بیلر.