ویلایت فقیه حکومتی نه اکثریت و نه اقلیت بلکه جماعتین هامیسی‌نین خیدمتینده‌دیر و بو جهتدن لاپ جماعته دایانان حکومتلردندیر. ایسلامی دوشونجه‌ده، صیرفاً قودرت و سوطله اوچون اولان سیاسی رقابت مشروعیتسیز اولدوغو و ایسلامینان موغاییر اولدوغونا گؤره قبول اولونان دئییل. بئله بیر رقابت ایسلامی موحیطی اینحیرافا چکر و سیاسی جنگ سالماغینان جماعتی اعتیقادسیز ائلر و یا اعتیقادین آزالدار و اونلاری ایسلاما نیسبت تردیده سالار. بو شکیلده دئماق اولار کی ایسلامی دوشونجه‌ده بونا دیقّت یئتیرماغینان کی نظری لحاظدان ایختیلاف اولا بیلر و باخیشلار فرقلیدیر، «سیاسی رقابت فقط چریچیوه‌ده» قبول اولوناندیر. بونا گؤره غربده موتداویل اولان معنادا یعنی صیرفاً قودرت اوچون رقابتی قبول ائله‌مه‌ییب.

جومهوری ایسلامی اساسی قانونو، اؤز موقدیمه‌سینده بو مطلبه ایشاره ائدیب و سالیم سیاسی رقابتین چرچیوه‌سینی موشخص ائله‌ییب. بئله‌لیغینان دئماق اولار ایسلامدا سیاسی رقابت آشاغیداکی محدوده‌لرین ایچینده ایمکانلی اولار:

1. قودرته چاتماق آخیر مقصد دئییل. قودرت فقط حق و عدالت دَیَرلرینی ساخلاییب یایماق اوچوندور. حضرت علی (ع) قودرتی حق و عدالتین قورولماسیندا گؤرور.

2. شخصی منفعت، ایمتیاز و پاداشلارا ال تاپماق سیاسی رقابتین اساس انگیزه‌سی دئییل.

3. سیاسی ایختیلافلار یولون ایشیقلانماسی اوچون یاخجیدیر، شخصی منفعتلره گؤره یوخ، بونا گؤره فردی و شخصی منفعتلر اولان یئرلرده ایختیلافلارین ترک ائله‌مه‌سی ضروریدیر.

4. رقابت وساییلی مشروعدور، بونا گؤره ایسراف، تبذیر، تؤهمت، ایفتیرا و بونا تای ایشلر سیاسی رقابتدن ائشیکده‌دیر.

5. داها صلاحلی شخصلر و شخصلرین اولدوغو زمانلار رقابتی ترک ائله‌ماق واجیبدیر و گرک داها صلاحلی شخصه کؤمک اولونا.

6. سیاسی رقابتین هدفی ایسلامی جامیعه‌نین اساس مقصدلری‌نین توسیعه‌سینه داها یاخجی یول تاپماقدیر.