هر زادی اوزاقدان اییله‌ماق سیستمی‌نین ایختیراعسی نئچه گون بوندان قاباق آوریل‌فول یالانی آدلاندیریلسا دا، ژاپونلی عالیملر بو یالانی واقعیّته دؤندردیلر. ژاپونلی موحقیقلر تازا بیر صفحه ایختیراع ائدیبلر کی تاماشاچی اونون تاماشاسیندان علاوه اوندا گؤرونن یئمک تصویرلرینی اییله‌یه‌ده بیلر.
بو نوماییش صفحه‌سی توکیونون اکینچیلیق و تکنولوژی دانیشگاهیندا "هاروکا ماتسوکورا"نین الینن دوزلیب. بو LCDصفحه هر زادین گؤرسندیغی نوقطه‌دن اونون ایینی هاوایا داغیدیر.
بو تکنولوژی صفحه‌نین دؤرد یانیندا یئرلشیب دؤرد هاوا جریانلا بوخارلانان ژِلنن تغذیه اولور.
بو هاوا جریانی دؤرد دانا فن وسیله‌سینن صفحه‌اینن موزای اسیر. بو جریانلارین سمتی و گوجو صفحه‌ده‌کی تصویره باغلی اولور. هاوا جریانی او قدر یوموشاقدیر کی تاماشاچی بو ایین صفحه‌ده کی تصویردن اولدوغون ظن ائلیر.
بو سیستم ایندیلیقدا هر آندا فقط بیر ایی ساچا بیلیر آما اونو دوزلدنلر دئییر بو ایختیراعنین ایکینجی آددیمی ایی دگیشدیرماغا پرینترلرین کارتریجلرینه بنزر بیر کارتریجین قوشماسی اولاجاق.
بو صفحه فلوریدانین اورلانداسیندا IEEEمجازی واقعیت کونفرانسیندا عرضه اولدو.