عالیملرین دئدیگینه گؤره اولا بیلر قارانلیقدا قالماق گؤز تنبللیغینی موعالیجه ائله‌سین.
لایوساینزین وئردیغی خبره گؤره، کانادانین تورنتو دانیشگاهی‌نین موحقیقلری «موعاصیر بیولوژی»ژورنالیندا چاپ اولان تحقیق نتیجه‌لرینده دئییرلر: قارانلیغین تنبل گؤزونده اثرلی اولدوغونو پیشیک بالالاریندا گؤرسدیبلر، اوخشار نتیجه‌لری اینساندا دا اله گتیرمک اولسا، دونیادا میلیونلار نفرین گؤز تنبللیقلارینی موعالیجه ائتمک اولار.
فرقلی سببلره گؤره دونیا اهالی‌سی‌نین یوزده دؤردونون "آمبلیوپی" و یا «گؤز تنبللیغی» موشکولو وار. میثال اوچون کاتاراکت (آب موروارید) ایشیغین بیر گؤزه دوشمه‌سینه مانع اولا بیلر، نتیجه‌ده بئیین او گؤزدن گلن ایطیلاعاتین اِعمال ائتمگی دایاندیرار، بئله‌لیکله گؤزون گؤرمه‌سی ضعیفلر.
بو موحقیقلرین دئدیگینه گؤره گؤز تنبللیغینا موبتلا اولان اوشاقلاردا سالیم گؤزو باغلاییب عاریضه‌لی گؤزو ایشلمگه مجبور ائتمک اولار. آما گؤز باغلیسینی ساخلاماغا دؤرد بئش یاشلی اوشاغی قانع ائله‌ماق چتین اولار و موعالیجه اولمامیش بؤیوکلرده‌ده گؤز باغلیسی باغلاماق گونلوق حیاتینی موختل ائده بیلر.
قارانلیق اوتاق
موحقیقلر نئچه پیشیک بالاسی‌نین بیر گؤزونو بیر هفته بویو باغلادیلار سونرا نئچه هفته اونلارین گؤزلرینی آچدیلار یعنی عملاً اونلاردا تنبل گؤز یاراتدیلار.
سونرا بو پیشیکلری آیری پیشیلرله بیرلیکده زیل قارانلیق بیر اوتاقدا ساخلادیلار. 10 گوندن سونرا بو پیشیکلری قارانلیقدان چیخارتدیلار. نئچه هفته‌نین عرضینده بللی اولدو کی اونلارین گؤز تنبللیقلاری موعالیجه اولوب.
بو موحقیقلرین تاپدیقلارینا اساساً اعتیقادلاری وار قارانلیق پیشیکلرین گؤرمه سیستملرینی اوّلیّه حالته قایتاریر بئله‌لیکله تازادان تنظیملشماغا ایمکان تاپیر.
بو مئتودون اینسانلار اوسوتونده آزماییش اولماسیندان اوّل گؤز تبللیغی‌نین موعالیجه‌سی اوچون هانسی یاشدان، نه زمان قارانلیقدا قالماقلاری و قارانلیغین شیدّتی بللی اولمالیدیر.