هامی بالین فایدالاریندان دانیشیر و بو جهتدن اوندان ایستیقبال چوخ اولور و قیمتی‌نین باها اولماسینا گؤره بازاردا تقلّوبی بال چوخالیر.
آما اصل بالی تقلوبی بالدان نئجه تشخیص وئرمک اولار؟ چوخلی یوللار بونون اوچون دئیرلر؛ مثلاً بیری دئییر کی بیر بال شکرک چالسا اصل دئییل، بیری دئیر کی اصل بالی اوستدن آشاغیا تؤکسن ریشته‌سی قیریلماز، آما دئمه‌لی‌ییک کی بو یوللارین هئچ بیری اصل بالین تشخیصی اوچون ایش وئرمز.
طبیعی و خالیص بال شکرک چالمالیدیر. دئمک اولار کی طبیعی بالی فقط و فقط لابراتواردا و آزماییشگاهدا تشخیص وئرمک اولار.
مصنوعی بال دوزلتمگه چوخلی یوللار وار, اوراجن کی سیزی بیر پتک کنارینا آپاریب گؤرستسه‌لر ده دئمک اولماز کی پتگین اوستونده‌کی بال حتماً طبیعیدیر. مصنوعی بال دوزلتماغین بیر یولو بودور کی گلوکوزلو موادّی سودا و بیتکی شیره‌سینده حل ائدیرلر و مصنوعی بال اله گلیر. آیری یولو بودور کی آریلار گول عوضینه قندابینان تغذیه اولالار.
بالین طبیعی اولوب اولماماسینی تشخیص وئرمک اوچون آیری یوللاردان بیر آز ایطمینانلی یول بودور کی بالی سرین سویون ایچینه تؤکه‌سن. بالین قطره‌لری سودا حل اولماسا و سویون تکینه یاتسا، بو احتیمال کی بو بال طبیعی اولسون چوخدی.