نظره گلیر پینوکیونون یالان دانیشاندا بورنونون دگیشمه‌سی, واقعیتدن بیر او قدر ده اوزاق دئییلمیش. عالیملر دئییرلر دوزدور کی بورونوموز یالان دانیشاندا اوزانمیر,آما حرارتی چوخالیر.
بیری‌نین یالان دانیشیب دانیشمادیغینی بیلمک اوچون, اونون بورنونون حرارتینی اؤلچمک کیفایت ائلر.
پاپ‌ساینزین وئردیگی خبره گؤره, گرنادا دانیشگاهی‌نین موحقیقلری بو تازا کشفلری‌نین آدینی پینوکیو اثری قویوبلار و اونون عیلّتین‌ده حتماً اؤزوز بیلیرسیز! بلی تخته اوغلانین جریانی کی یالان دانیشاندا بورنو اوزانیردی! ایندی موطالیعه‌لر گؤرسدیر کی بو ناغیل, واقعیتدن بیر او قدر ده اوزاق دئییلمیش. البته افرادین یالان دانیشان واخت بورونلاری اوزانمیر,آما حرارتی داخیلی گؤزون عضله‌لری ایله بیرلیقدا چوخالیر.
بو نئجه اولور؟ بیز حیسّلریمیزین باره‌سینده یالان دانیشاندا, بئینیمیزین اینسولا آدیندا بیر بؤلومو,فعال اولور. موحقیقلرین دئدیگینه گؤره, اینسولا بئینین تشویق سیستمی‌نین بیر بؤلومو کیمی, او زمان فعال اولار کی بیز واقعی حیسّلریمیزی تجروبه ائدک. عالیملر دئییرلر کی اینسولا هم هیجان و هم بدنین حرارتینی کونترول ائدیر. موحقیقلری اینسولانین فعالیتی و حرارتین چوخالماسی آراسیندا گوجلی منفی باغلی‌لیق تاپیبلار.هابئله اونلار بو نتیجه‌یه چاتیبلار کی یوخاری سطحده‌کی ایضطیرابدا اوزون حرارتی چوخالار و او جهتدن اوز قیزارار.
موحقیقلر حرارتی دوربینلردن ایستیفاده ائدیب بو مسأله‌نی ثبت ائدیبلر. هر هانسی جیسمین حرارتی چوخ اولسا تشعشوعاتی داها چوخ اولار. حرارتی دوربینلر بو تشعشوعلاری تشخیص وئریب ثبت ائدیرلر. بو تصویرین نمونه‌سینی بوردا گؤرورسوز.