پیتون ایلانین روحی‌نین اونو اؤلدوردوکلری و اتینی یئدیکلری کندلیلردن اینتیقام آلماسی بیر شوخلوغا بنزیر.
آسیا اینفونون وئردیغی خبره گؤره, کامبوجون کامپونگ‌سپو اوستانین پری‌کراساینگ کندی‌نین ساکینلری, بونون قورخوسوندان کی پیتون ایلانی‌نین نوبتی قوربانی اولسونلار, گئجه گوندوزلری یوخدور.
کئچن ایل بو کندین ساکینلریندن یئددی نفر, عظمتلی پیتون ایلانینی بیر کیچیک معبدین یاخینلیغیندا تله‌یه سالیب و اونو اؤلدوردوکدن سونرا اتینن قوناقلیق یولا سالمیشدیلار.
او واختدان بو یانا اونلارین ایکیسی چوخ دهشتلی صورتده اؤلوبلر, بیر نفرده عاغلین الدن وئریب و دلی اولوب.
پری‌کراساینگ کند شوراسی‌نین عضوی پنوم‌پن‌پست روزنامه‌سینه دئدی: اؤلن ایکی نفرین اوستونده ایلان دریسینه بنز فلسلر تاپیلیب.
او آرتیردی: ایلانین اتین یئینلردن بیری دلی اولوب و بیر‌ی‌ده نارگیل آغاجیندان دوشوب و ال-آیاغی سینیب.
منطقه جادوگرلریندن بیری اهالی‌یه هوشدار وئریب کی ایلانین روحی اونو اؤلدوروب یئینلردن اینتیقام آلاجاق.
بو ایلین ژولایین 19-دا اؤلنلرین بیرینی قویلایان زمان بالاجا بیر ایلانین اونون تابوتو اوستونه سوزمه‌سی, هامینی قورخوتدو. اونلار پیتون اینتیقامیندان قورخوب کیچیک ایلانی احتیرامینان گؤتوروب یاواشجانا اوتلارین اوستونه قویدولار کی چیخیب گئتسین.